.jpg)
លោក ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល ជួបជាមួយលោក W Patrick Murphy ឯកអគ្គរដ្ឋទូត សហរដ្ឋអាមេរិក និងសហការី លើការពង្រឹងកិច្ចសហការប្រតិបត្តិការវិស័យអាកាសចរស៊ីវិល កាលពីថ្ងៃទី ១៨ ឧសភា។ រូបថត SSCA
ភ្នំពេញៈ កម្ពុជាស្វាគមន៍ក្រុមហ៊ុនអាកាសចរណ៍អាមេរិកដែលមានបំណងចាប់ផ្តើមបើកជើងហោះហើរត្រង់មកកម្ពុជា ដើម្បីលើកកម្ពស់ពាណិជ្ជកម្ម ទេសចរណ៍ និងការវិនិយោគ។
លោក ម៉ៅ ហាវណ្ណាល់ រដ្ឋមន្ដ្រីទទួលបន្ទុករដ្ឋលេខាធិការដ្ឋានអាកាសចរស៊ីវិល (SSCA) បានលើកឡើងបែបនេះដល់លោក W Patrick Murphy ឯកអគ្គរដ្ឋទូតអាមេរិកប្រចាំនៅកម្ពុជានៅក្នុងអំឡុងកិច្ចប្រជុំមួយនៅការិយាល័យរបស់ SSCA កាលពីថ្ងៃចន្ទ។
លោក ស៊ិន ចាន់សេរីវុត្ថា អ្នកនាំពាក្យ SSCA បានប្រាប់ភ្នំពេញប៉ុស្ដិ៍កាលពីថ្ងៃអង្គារថា ឯកអគ្គរដ្ឋទូតអាមេរិកបានផ្ដល់យោបល់ថា ត្រូវមានយន្តហោះ Boeing ដែលផលិតនៅអាមេរិកប្រតិបត្តិការនៅដែនអាកាសរបស់កម្ពុជា ដើម្បីបង្កើនល្បឿនការងារលើកិច្ចព្រមព្រៀងសេវាផ្លូវអាកាសរវាងប្រទេសទាំង ២ ចាប់តាំងការបើកការចរចាកាលពីឆ្នាំ ២០១៤។
លោកថ្លែងថា៖ «ទាក់ទងនឹងកិច្ចព្រមព្រៀងសេវាផ្លូវអាកាសរវាងប្រទេសកម្ពុជា និងអាមេរិក ប្រទេសទាំង ២ នៅតែមានបញ្ហាសំខាន់ពីរ គឺទី ១ អំពីពាក្យបច្ចេកទេសដែលយើងបកប្រែនិយមន័យផ្សេងគ្នា ប៉ុន្តែយើងនៅតែអាចបើកការចរចាបាន និងចំណុចទី ២ ក្រុមហ៊ុនអាមេរិកទាមទារឲ្យមានការធ្វើសេវាកម្មផ្ទៃដីដោយភាគីអាមេរិកផ្ទាល់។ នេះជាបញ្ហាប្រឈមបន្តិចបន្តួច»។
លោក ចាន់សេរីវុត្ថា បានឲ្យដឹងថា ដោយផ្អែកលើកិច្ចព្រមព្រៀងការធ្វើសេវាកម្មផ្ទៃដីសម្បទានគឺរដ្ឋាភិបាលបានអនុញ្ញាតរួចហើយឲ្យក្រុមហ៊ុនមួយគ្រប់គ្រង។ លោកបន្តថា ប៉ុន្តែក្រុមហ៊ុនអាកាសចរណ៍អាមេរិកចង់មានការធ្វើសេវាកម្មផ្ទៃដីដែលធ្វើឡើងដោយក្រុមហ៊ុនអាមេរិក ដោយសារតែពួកគេបារម្ភអំពីសុវត្ថិភាព ឬបញ្ហាភេរវកម្ម។
លោកលើកឡើងថា៖ «រដ្ឋមន្ដ្រីរបស់យើងបានផ្ដល់យោបល់ដល់លោកឯកអគ្គរដ្ឋទូតត្រូវជូនដំណឹងទៅក្រុមហ៊ុនអាកាសចរណ៍អាមេរិកណាមួយដែលចង់ចាប់ផ្ដើមជើងហោះហើរមកប្រទេសកម្ពុជា គួរតែមកជួបប្រជុំដោយផ្ទាល់ជាមួយ SSCA ហើយយើងនឹងបើកផ្លូវចរចាសម្រាប់ពួកគេ»។
ចាប់ពីឆ្នាំ ១៩៩០ ទៅដល់ឆ្នាំ ២០០០ ប្រទេសកម្ពុជាធ្លាប់មានយន្តហោះ Boeing ដែលផលិតនៅអាមេរិកប្រតិបត្តិការផងដែរ។ ទោះយ៉ាងណាដោយសារកត្តាទីផ្សារ ក្រុមហ៊ុនអាកាសចរណ៍ជាច្រើនបានផ្លាស់ប្តូរទៅប្រើប្រាស់យន្តហោះ Airbus ដែលផលិតនៅអឺរ៉ុបវិញដោយសារតែមានតម្លៃទាប និងមានបច្ចេកទេសងាយស្រួល។
លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាបានឲ្យដឹងតាមរយៈអ៊ីមែលថា អាមេរិក និងប្រទេសកម្ពុជាតែងតែធ្វើការពិភាក្សាគ្នាយ៉ាងទៀងទាត់នូវឱកាសពាណិជ្ជកម្មនៅក្នុងវិស័យផ្សេងៗ ដែលរួមមានការនាំចេញបច្ចេកវិទ្យាអាកាសចរណ៍ និងសេវាកម្មទៅប្រទេសកម្ពុជា។
លោកស្រីបានឲ្យដឹងថា កិច្ចព្រមព្រៀងបើកចំហជើងមេឃ គឺជាកិច្ចព្រមព្រៀងទ្វេភាគីមួយជួយជំរុញការធ្វើដំណើរអន្តរជាតិរវាងអាមេរិក និងបណ្ដាប្រទេសដៃគូរបស់ខ្លួន «កិច្ចព្រមព្រៀងបើកចំហជើងមេឃអាចអនុញ្ញាតឲ្យក្រុមហ៊ុនអាកាសចរណ៍អាមេរិកធ្វើការហោះហើរត្រង់ទៅព្រលានយន្តហោះរបស់ប្រទេសកម្ពុជា និងជួយបង្កើនទេសចរអាមេរិកមកកាន់ប្រទេសកម្ពុជា។ អាមេរិកមានកិច្ចព្រមព្រៀងបើកចំហជើងមេឃជាមួយបណ្ដាប្រទេសជាង ១០០ លើពិភពលោក»។
របាយការណ៍របស់ការិយាល័យជំរឿនអាមេរិកបានឲ្យដឹងថា ពាណិជ្ជកម្មទ្វេភាគីរវាងប្រទេសទាំង ២ មានចំនួនសរុប ១,១៣៦ ពាន់លានដុល្លារក្នុង ២ ខែដំបូងឆ្នាំនេះកើនឡើង ៣៩,៩៦ ភាគរយធៀបនឹង ៨១២ លានដុល្លារកាលពីឆ្នាំ ២០១៩។ ក្នុងនោះកម្ពុជាបាននាំចេញទំនិញមានតម្លៃជាង ១ ពាន់លានដុល្លារទៅអាមេរិកកើនឡើងជាង ៤៦,៩៦ និងនាំចូលចំនួន ៥៣,២ លានដុល្លារធ្លាក់ចុះ ២៨,៩៧ ភាគរយ៕LA
