ភ្នំពេញ: កម្ពុជា និងហុងគ្រី នឹងមានរៀបចំកិច្ចប្រជុំលើកទី ១ នៃគណៈកម្មការចម្រុះស្តីពីកិច្ចសហប្រតិបត្តិការលើវិស័យសេដ្ឋកិច្ចជាមួយគ្នានៅចុងឆ្នាំនេះក្នុងគោលបំណងដើម្បីជំរុញពាណិជ្ជកម្មទ្វេភាគីឲ្យកាន់តែធំជាងមុន។
គម្រោងនេះត្រូវបានធ្វើឡើងក្នុងកិច្ចប្រជុំរវាងលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម ជាមួយលោក Istvan Joo អនុរដ្ឋលេខាធិការក្រសួងការបរទេស និងពាណិជ្ជកម្មនៃប្រទេស ហុងគ្រី កាលពីថ្ងៃទី ៣ ខែកញ្ញា តាមរយៈវីដេអូខនហ្វើរ៉ិន។
សេចក្តីប្រកាសព័ត៌មានបានឲ្យដឹងថា ភាគីទាំង ២ នឹងរៀចំកិច្ចប្រជុំនេះចំនួន ២ លើកគឺនៅថ្ងៃទី ៣០ ខែវិច្ឆិកា និងថ្ងៃទី ១ ខែ ធ្នូ ឆ្នាំ ២០២០ នៅប្រទេសកម្ពុជា។
សេចក្តីប្រកាសព័ត៌មានបានបន្តថាហុងគ្រីប្តេជ្ញាពង្រឹងកិច្ចសហប្រតិបត្តិការសេដ្ឋកិច្ចជាមួយកម្ពុជាលើវិស័យសំខាន់ៗដូចជា កសិកម្ម កសិឧស្សាហកម្ម គ្រប់គ្រងធារាសាស្ត្រ ពាណិជ្ជកម្មអេឡិចត្រូនិក និងវិស័យអប់រំ។
លោក លឹម ហេង អនុប្រធានសភាពាណិជ្ជកម្មកម្ពុជាឲ្យដឹងថាវេទិកានេះនឹងបើកឱកាសទីផ្សារឲ្យកម្ពុជាបន្ថែមទៀត ខណៈទំហំពាណិជ្ជកម្មទ្វេភាគីរវាងប្រទេសទាំង ២ នៅមានចំនួនតិចតួចនៅឡើយ។
លោកថ្លែងថា៖ «កិច្ចប្រជុំនេះនឹងជំរុញទំនាក់ទំនងសេដ្ឋកិច្ច និងការវិនិយោគរវាងភាគីទាំង ២ បើទោះជាទំហំពាណិជ្ជកម្មរវាងប្រទេសទាំង ២ នៅមានកម្រិតទាបក៏ដោយ»។
កាលពីឆ្នាំ ២០១៩ កម្ពុជា និងហុងគ្រីបានចុះហត្ថលេខាលើកិច្ចព្រមព្រៀងស្តីពីសហប្រតិបត្តិការសេដ្ឋកិច្ចលើវិស័យអាទិភាពចំនួន ២៤ មាន ដូចជា ការជំរុញពាណិជ្ជកម្ម ពាណិជ្ជកម្មអេឡិចត្រូនិក សហគ្រាសខ្នាតតូច និងមធ្យម កសិកម្ម ទេសចរណ៍ ធនាគារ និងហិរញ្ញវត្ថុ។ល៕ LA