The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា ហ្វីលីពីន ប្តេជ្ញា​ជំរុញ​ពាណិជ្ជកម្ម និង​ការ​វិនិយោគ

កម្ពុជា ហ្វីលីពីន ប្តេជ្ញា​ជំរុញ​ពាណិជ្ជកម្ម និង​ការ​វិនិយោគ

អង្ករ​កម្ពុជា​ជា​ទំនិញ​ថ្មី​មួយ​ដែល​នឹង​ជ្រៀត​ចូល​ទីផ្សារ​ហ្វីលីពីន។
អង្ករ​កម្ពុជា​ជា​ទំនិញ​ថ្មី​មួយ​ដែល​នឹង​ជ្រៀត​ចូល​ទីផ្សារ​ហ្វីលីពីន។ ភ្នំពេញ ប៉ុស្តិ៍

កម្ពុជា ហ្វីលីពីន ប្តេជ្ញា​ជំរុញ​ពាណិជ្ជកម្ម និង​ការ​វិនិយោគ

ភ្នំពេញៈ កម្ពុជា និង​ហ្វីលីពីន ប្តេជ្ញា​ជំរុញ​ពាណិជ្ជកម្ម​និង​ការ​វិនិយោគ​រវាង​ប្រទេស​ជា​សមាជិក​អាស៊ាន​ទាំង​ពីរ​នេះ។

ការ​ប្តេជ្ញា​នេះ​ធ្វើ​ឡើង​ក្នុង​ជំនួប​រវាង​លោក​ឧប​នាយក​រដ្ឋ​មន្ត្រី សុខ អាន និង​លោក Noe A. Wong ឯក​អគ្គ​រដ្ឋ​ទូត​ចប់​អាណត្តិ​របស់​ហ្វីលីពីន ប្រចាំ​នៅ​កម្ពុជា​កាល​ពី​ថ្ងៃ​ចន្ទ។

លោក ឯក ថា អនុ​ប្រធាន​អង្គភាព​ប្រតិកម្ម​រហ័ស​នៃ​ទីស្តីការ​គណៈ​រដ្ឋ​មន្រ្តី​បាន​ប្រាប់​អ្នក​យក​ព័ត៌មាន​បន្ទាប់​ពី​ជំនួប​ដោយ​ស្រង់​សម្តី​លោក សុខ អាន ថា ទំហំ​ពាណិជ្ជកម្ម និង​ចំនួន​ភ្ញៀវ​ទេសចរ​កើន​ឡើង​គួរ​ឲ្យ​កត់​សម្គាល់​បន្ទាប់​ពី​មាន​ការ​ដាក់​ឲ្យ​ដំណើរការ​សេវា​ហោះ​ហើរ​ត្រង់​ពី ទីក្រុង​ម៉ានីល មក​កាន់ ខេត្ត​សៀមរាប កាល​ពី ឆ្នាំ​២០១២។ លោក​ថា ភាគី​ទាំង​ពីរ​ទាមទារ​ឲ្យ​មាន​ការ​ខិតខំ​ជំរុញ​បន្ថែម​ទៀត ដោយ​សារ​ទំហំ​ពាណិជ្ជកម្ម​នេះ​នៅ​មាន​កម្រិត​ទាប​នៅ​ឡើយ។

លោក សុខ អាន ថ្លែង​ថា «[យើង] ជំរុញ​ឲ្យ​មាន​ការ​ផ្លាស់​ប្តូរ​ពាណិជ្ជកម្ម និង​វិនិយោគ​ឲ្យ​កាន់​តែ​មាន​ច្រើន​ថែម​ទៀត​រវាង​ប្រទេស​ទាំង​ពីរ ព្រោះ​កន្លង​មក​នេះ​យើង​ឃើញ​ថា ក្រោយ​ពី​មាន​ការ​ហោះ​ហើរ​ត្រង់​ពី ទីក្រុង​ម៉ានីល មក​កាន់ ខេត្ត​សៀមរាប គឺ​ចំនួន​ភ្ញៀវ​ទេសចរ​មាន​ការ​កើន​ឡើង​ផង​ដែរ»។

លោក សុខ អាន ក៏​បាន​ស្នើ​ឲ្យ​ភាគី ប្រទេស​ហ្វីលីពីន ជួយ​នាំ​ចូល​អង្ករ​ពី​កម្ពុជា ដោយ​លោក​លើក​ឡើង​ថា កម្ពុជា សល់​ស្រូវ​ជាង ៤ លាន​តោន​ក្នុង ១ ឆ្នាំៗ។

លោក​បន្ត​ថា៖ «យើង​ចង់​នាំ​អង្ករ​ឲ្យ​កាន់​តែ​ច្រើន​ប្រសើរ​ជា​ជាង​នាំ​ចេញ​ស្រូវ ព្រោះ​យើង​ចង់​បង្កើត​ឲ្យ​មាន​រោង​ម៉ាស៊ីន​កិន​ស្រូវ​កាន់​តែ​ច្រើន​ដើម្បី​បង្កើត​ការងារ​ក្នុង​ស្រុក»។

លោក Noe A. Wong ឲ្យ​ដឹង​ថា លោក​នឹង​ខិត​ខំ​បន្ត​ជំរុញ និង​អំពាវនាវ​បន្ថែម​ទៀត​ដល់​វិនិយោគិន និង​ពាណិជ្ជករ​ហ្វីលីពីន ឲ្យ​មក កម្ពុជា ដើម្បី​ជំរុញ​ការ​វិនិយោគ និង​ពាណិជ្ជកម្ម​ទ្វេ​ភាគី​រវាង​ប្រទេស​ទាំង​ពីរ​កាន់​តែ​មាន​កំណើន​ថែម​ទៀត។

លោក​ថ្លែង​ថា៖ «នៅ​ពេល​ដ៏​ខ្លី​ខាង​មុខ​នេះ​នឹង​អាច​មាន​ការ​ហោះ​ហើរ​ត្រង់​ពី ទីក្រុង​ម៉ានីល មក​កាន់ ទីក្រុង​ភ្នំពេញ»។

បើ​យោង​តាម​លោក ឯក ថា ពាណិជ្ជកម្ម​ទ្វេ​ភាគី​ប្រទេស​ទាំង​ពីរ​សម្រេច​បាន​ប្រមាណ​ជាង ២៣ លាន​ដុល្លារ ក្នុង​នោះ​ការ​នាំ​ចេញ​ពី កម្ពុជា មាន​ជាង ១៤ លាន​ដុល្លារ​ហើយ ហ្វីលីពីន នាំ​ចូល​មក កម្ពុជា មាន​ជាង ៧ លាន​ដុល្លារ។ រយៈ​ពេល ៣ ខែ​ដំបូង ឆ្នាំ​២០១៤ ពាណិជ្ជកម្ម​ទ្វេ​ភាគី​មាន​ជាង ៥ លាន​ដុល្លារ ក្នុង​នោះ​ការ​នាំ​ចេញ​របស់ កម្ពុជា មាន​ជាង ១ លាន​ដុល្លារ និង​នាំ​ចូល​ពី ហ្វីលីពីន មាន​ជាង ៤ លាន​ដុល្លារ។

តួលេខ​ពី​ក្រសួង​ទេសចរណ៍ បង្ហាញ​ថា ចំនួន​ភ្ញៀវ​ទេសចរ ហ្វីលីពីន សរុប ១១១ ៣៥៨ នាក់​បាន​មក​ទស្សនា​កម្ពុជា កាល​ពី ឆ្នាំ​២០១៣ កើន​ឡើង​ជាង ២២ ភាគរយ​ធៀប​នឹង ឆ្នាំ​២០១២ ដែល​មាន ៩៧ ៤៨៧ នាក់។ សម្រាប់​ឆមាស ទី១ ឆ្នាំ​នេះ ភ្ញៀវ​ទេសចរ​មាន​ចំនួន ៥២ ០៩៩ នាក់​ធ្លាក់​ចុះ​ជិត ៣ ភាគរយ​ធៀប​ទៅ​នឹង ៥៨ ០០០ នាក់​ក្នុង​រយៈ​ពេល​ដូច​គ្នា​កាល​ពី ឆ្នាំ​២០១៣៕

អត្ថបទគួរចាប់អារម្មណ៍