ភ្នំពេញៈ កម្ពុជា និងចក្រភពអង់គ្លេសប្តេជ្ញាថា នឹងជំរុញកិច្ចសហប្រតិបត្តិការពាណិជ្ជកម្មទ្វេភាគីបន្ថែមទៀត ខណៈពេលប្រទេសទាំង ២ កំពុងសម្លឹងពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគី (FTA) ជាមួយគ្នា។
ការសន្យានេះបានធ្វើឡើងក្នុងជំនួបពិភាក្សារវាងលោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មជាមួយនឹងលោក Marc Thayre អនុប្រធានបេសកកម្មរបស់ស្ថានទូតចក្រភពអង់គ្លេសប្រចាំកម្ពុជាកាលពីថ្ងៃទី ១៥ ខែកញ្ញា។
នៅក្នុងជំនួបនេះភាគីទាំង ២ បានពិភាក្សាគ្នាពីគោលនយោបាយពាណិជ្ជកម្មរបស់ចក្រភពអង់គ្លេសបន្ទាប់ពីការចាកចេញពីសហភាពអឺរ៉ុប (Brexit) និងដំណើរវិវឌ្ឍន៍នៃការជ្រើសរើសអគ្គនាយកថ្មីរបស់អង្គការពាណិជ្ជកម្មពិភពលោកដែលក្នុងនោះក៏មានបេក្ខភាពមកពីអង់គ្លេសផងដែរ។
លោក សុភ័ក្ត្រ បានថ្លែងថា៖ «យើងសូមអំពាវនាវឲ្យប្រទេសអភិវឌ្ឍន៍ទាំងអស់ រួមទាំងចក្រភពអង់គ្លេសឲ្យបន្តគាំទ្រសកម្មភាពពាណិជ្ជកម្មដល់ប្រទេសកំពុងអភិវឌ្ឍន៍ និងប្រទេសមានការអភិវឌ្ឍតិចតួចតាមរយៈការផ្តល់ប្រព្រឹត្តកម្មដោយឡែក និងពិសេស (S&DT) ក្នុងការធ្វើពាណិជ្ជកម្ម»។
លោកបន្ថែមថា ទំហំពាណិជ្ជកម្មទ្វេភាគីរវាងកម្ពុជា និងអង់គ្លេសបានកើនឡើងជារៀងរាល់ឆ្នាំ។ ជាក់ស្តែង ទំហំពាណិជ្ជកម្មទ្វេភាគីកាលពីឆ្នាំ ២០១៩ មានទឹកប្រាក់ ១,០៥ ពាន់លានដុល្លារ ដោយការនាំចេញរបស់កម្ពុជាទៅទីផ្សារចក្រភពអង់គ្លេសមានតម្លៃ ៩៧៨ លានដុល្លារ។
ផលិតផលសំខាន់របស់កម្ពុជានាំចេញទៅអង់គ្លេសរួមមាន សម្លៀកបំពាក់ ស្បែកជើង កង់ និងអង្ករ។
លោកបានបញ្ជាក់ថា៖ «យើងមានសុទិដ្ឋិនិយមលើកិច្ចសហប្រតិបត្តិការជាវិជ្ជមានជាមួយចក្រភពអង់គ្លេស ពិសេសលើវិស័យពាណិជ្ជកម្ម ដើម្បីជំរុញកំណើនសេដ្ឋកិច្ច ដែលកំពុងរងផលប៉ះពាល់ដោយសារការរាតត្បាតជាសកលនៃជំងឺកូវីដ១៩»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ចក្រភពអង់គ្លេសជាទីផ្សារធំលំដាប់ទី ៣ សម្រាប់អង្ករកម្ពុជានៅសហភាពអឺរ៉ុបកាលពីឆ្នាំ ២០១៩ ដោយកម្ពុជាបានចេញអង្ករចំនួន ១៤ ៨១៦ តោនទៅកាន់ទីផ្សារចក្រភពអង់គ្លេស។
លោកថ្លែងថា៖ «យើងសង្ឃឹមថាការនាំចេញអង្ករទៅអង់គ្លេសនឹងកើនឡើងបន្ថែមទៀត ក្រោយពីអង់គ្លេសផ្តាច់ចេញពីសហភាពអឺរ៉ុបជាផ្លូវការ ខណៈអង្ករយើងនឹងមិនជាប់វិធានការការពាររបស់សហភាពអឺរ៉ុប (Safe guard) ទៀតទេ ហើយប្រទេសគាត់ក៏អត់មានអ្នកផលិតស្រូវដែរ ដូច្នេះគាត់អាចឲ្យយើងនាំចូលអង្ករដោយមិនយកពន្ធ»។
ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីកាលពីខែកក្កដាលោក សុខ សុភ័ក្ត្រ ធ្លាប់បានអះអាងថា ក្រៅពីកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េខាងត្បូង រដ្ឋាភិបាលកម្ពុជាក៏កំពុងសម្លឹងមើលពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយចក្រភពអង់គ្លេស ផងដែរ៕ LA