ភ្នំពេញៈ កម្ពុជា-អាមេរិក បានប្ដេជ្ញាថា នឹងបន្តការលើកកម្ពស់ការធ្វើពាណិជ្ជកម្ម និងការវិនិយោគរួមគ្នា ខណៈពេលប្រទេសទាំង ២ ប្រារព្ធខួបលើកទី ៧០ នៃការបង្កើតទំនាក់ទំនងការទូតរវាងប្រទេសទាំង ២។
នៅក្នុងអំឡុងពេលចាប់ផ្ដើម «ខែពាណិជ្ជកម្ម និងការវិនិយោគ» នៃខួបលើកទី ៧០ នៃការបង្កើតទំនាក់ទំនងការទូតរវាងកម្ពុជា និងអាមេរិកកាលពីរាត្រីថ្ងៃព្រហស្បតិ៍ លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មបានលើកឡើងថា សក្ដានុពលសម្រាប់ពាណិជ្ជកម្មទ្វេភាគីរវាងកម្ពុជា និងអាមេរិកបានកើនឡើងយ៉ាងរហ័សពីមួយឆ្នាំទៅមួយឆ្នាំ។ ជាមួយគ្នានេះលោកក៏បានស្នើឲ្យអាមេរិកជួយបង្កើនការវិនិយោគនៅកម្ពុជាផងដែរ។
លោកថ្លែងថា៖ «ខ្ញុំអំពាវនាវដល់លោកអគ្គរដ្ឋទូតឲ្យជំរុញក្រុមវិនិយោគិនរបស់អាមេរិកចូលមកវិនិយោគក្នុងប្រទេសកម្ពុជាឲ្យបានកាន់តែច្រើន ពិសេសលើវិស័យពាណិជ្ជកម្មអេឡិចត្រូនិក»។
លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាបាននិយាយថា បច្ចុប្បន្នមានក្រុមហ៊ុនអាមេរិកជាច្រើនកំពុងនាំយកការវិនិយោគដែលមានតម្លាភាព គុណភាពខ្ពស់ជាមួយនឹងបច្ចេកវិទ្យាលំដាប់ពិភពលោក និងកម្មវិធីបណ្ដុះបណ្ដាលព្រមទាំងស្ដង់ដាបរិស្ថាន និងការងារលំដាប់ខ្ពស់ៗមកកាន់ប្រទេសកម្ពុជា។ លោកបន្តថា អាមេរិកគឺជាទីផ្សារនាំចេញឈានមុខគេរបស់កម្ពុជា ដោយការនាំចេញកាលពីឆ្នាំ ២០១៩ មានតម្លៃជិត ៥,៤ ពាន់លានដុល្លារកើនឡើងពី ៣ ពាន់លានដុល្លារកាលពីឆ្នាំ ២០១៥។
លោកបានកត់សម្គាល់ថា ទោះបីពិភពលោកកំពុងប្រឈមនឹងការរីករាលដាលជំងឺកូវីដ១៩ ក៏ការនាំចេញរបស់កម្ពុជាទៅអាមេរិកនៅតែបន្តកើនឡើងដដែល ដោយមានតម្លៃរហូតដល់ ២,៧៥ ពាន់លានដុល្លារនៅក្នុងឆមាសទី ១ ឆ្នាំនេះ កើន ២៣ ភាគរយបើធៀបនឹងរយៈពេលដូចគ្នាឆ្នាំមុន។
លោកថ្លែងថា៖ «ការនាំចេញនេះបានតំណាង និងគាំទ្រដល់ការបង្កើតការងាររាប់សែនដល់ប្រជាជនកម្ពុជា ពិសេសកម្មកររោងចក្រ និងកសិករ។ ការនាំចេញរបស់កម្ពុជាក៏បានផ្តល់អត្ថប្រយោជន៍ដល់អតិថិជនអាមេរិក ដែលជាជម្រើសច្រើនលើផលិតផលផ្សេងៗ ដែលអ្នកអាចស្វែងរកមាន ដូចជា ផលិតផលកាត់ដេរ និងស្បែកជើង ម្រេចកំពត និងអង្ករ ជាដើម»។
ប្រធានសភាពាណិជ្ជកម្មអាមេរិកនៅកម្ពុជា លោក Allen Dodgson Tan បានឲ្យដឹងថា ពាណិជ្ជកម្ម និងការវិនិយោគអាមេរិកនៅកម្ពុជាបានរួមចំណែកដល់ការអភិវឌ្ឍប្រទេស និងភាពជិតស្និទ្ធរវាងប្រជាជនខ្មែរ និងប្រជាជនអាមេរិកផងដែរ។
លោកនិយាយថា៖ «ការវិនិយោគរបស់អាមេរិកបានជួយក្នុងការបង្កើតក្រុមហ៊ុន និងបង្កើនស្ដង់ដារស់នៅសម្រាប់ប្រជាជនខ្មែរ ហើយជាមួយគ្នានេះអតិថិជនអាមេរិកក៏ទទួលបានអត្ថប្រយោជន៍ពីគុណភាព និងតម្លៃសមរម្យនៃទំនិញដែលផលិតដោយកម្មករកម្ពុជាផងដែរ»។
លោកលើកឡើងថា ផលិតផលអាមេរិកជាច្រើនកំពុងមានវត្តមាននៅកម្ពុជាដូចជា Coca-Cola, Blistex, Palmers និង Ford ព្រមទាំងផលិតផលកសិកម្មត្រាក់ទ័រចនឌា និងឡសម្ងួត Scafco ក្នុងចំណោមយីហោដែលជឿទុកចិត្តបំផុតដោយអតិថិជន និងក្រុមហ៊ុនកម្ពុជា។ ផលិតផលអាមេរិកតំណាងឲ្យគុណភាព និងតម្លៃ។
លោកថ្លែងថា៖ «ទំនាក់ទំនងពាណិជ្ជកម្មរវាងប្រទេសទាំង ២ បានផ្ដល់អត្ថប្រយោជន៍ច្រើនដល់ប្រជាជននៃប្រទេសទាំង ២»។
អាមេរិកបានផ្ដល់ឲ្យកម្ពុជានូវភាពអនុគ្រោះពាណិជ្ជកម្មស្ថិតក្រោមកម្មវិធីប្រព័ន្ធ GSP ដែលផ្ដល់លទ្ធភាពឲ្យកម្ពុជាអាចនាំទំនិញចូលទៅទីផ្សារខ្លួនដោយរួចពន្ធសម្រាប់ផលិតផលជាង ៥ ០០០ មុខ។ ទំនិញធ្វើដំណើរជិត ១ ពាន់លានដុល្លារត្រូវបាននាំចេញទៅអាមេរិកកាលពីឆ្នាំ ២០១៩ ដោយស្ថិតក្រោមប្រព័ន្ធ GSP នេះ៕LA