.jpg)
ពិធីចុះ MoU សហការគាំទ្រលើគម្រោងផលិតផលកសិ-ម្ហូបអាហារ។ រូបថត សហការី
ភ្នំពេញ: កម្ពុជា និងអូស្ត្រាលីកំពុងសហការអនុវត្តគម្រោង «វេទិកាកិច្ចសហប្រតិបត្តិការរវាងវិស័យសាធារណៈ វិស័យឯកជន និងគ្រឹះស្ថានស្រាវជ្រាវ» ក្នុងបំណងផ្តល់កិច្ចគាំទ្រផ្នែកហិរញ្ញវត្ថុ និងបច្ចេកទេសដល់សហគ្រាសធុនតូច និងមធ្យម ដើម្បីផលិតកែច្នៃផលិតផលកសិ-ម្ហូបអាហារថ្មីៗលក់នៅក្នុងទីផ្សារ។ នេះបើយោងតាមសេចក្តីប្រកាសព័ត៌មានរបស់សហគ្រិនខ្មែរ។
សេចក្តីប្រកាសព័ត៌មានបានឲ្យដឹងថា សហគ្រិនខ្មែរដែលជាប្រតិបត្តិករ ១ ក្រោមការគាំទ្រពីក្រសួងសេដ្ឋកិច្ច និងហិរញ្ញវត្ថុរួមជាមួយនឹងកម្មវិធីខ្សែចង្វាក់តម្លៃកសិកម្មកម្ពុជា-អូស្ត្រាលី ដែលជាកម្មវិធីរបស់រដ្ឋាភិបាលអូស្ត្រាលីក្នុងការអភិវឌ្ឍវិស័យកសិកម្មកម្ពុជាឲ្យមានភាពរឹងមាំ និងភាពប្រកួតប្រជែងខ្ពស់ ព្រមទាំងវិទ្យាស្ថានបច្ចេកវិទ្យាកម្ពុជាកំពុងសហការអនុវត្តគម្រោង «វេទិកាកិច្ចសហប្រតិបត្តិការរវាងវិស័យសាធារណៈ វិស័យឯកជន និងគ្រឹះស្ថានស្រាវជ្រាវ»។ គម្រោងនេះនឹងចាប់ផ្តើមទទួលពាក្យស្នើសុំចាប់ពីពាក់កណ្តាលខែមិថុនានេះ។
លោកបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរបានឲ្យដឹងថា ដោយមានការគាំទ្រពីក្រសួងសេដ្ឋកិច្ច សហគ្រិនខ្មែរមានចក្ខុវិស័យក្លាយជាវេទិកាថ្នាក់ជាតិសម្រាប់ការលើកកម្ពស់គ្រប់សកម្មភាពរបស់វិស័យសហគ្រិនភាពនៅកម្ពុជា។
លោកថ្លែងថា៖ «គម្រោងនេះស្ថិតក្នុងវិស័យអាទិភាពមួយរបស់សហគ្រិនខ្មែរ គឺការកែច្នៃផលិតផលកសិកម្ម។ ក្រៅពីជំនួយគាំទ្រដល់ការអភិវឌ្ឍការកែច្នៃ ផលិតផលកសិ-ម្ហូបអាហារសហគ្រាសធុនតូច និងមធ្យមក៏អាចទទួលបានការគាំទ្រផ្សេងទៀតពីសហគ្រិនខ្មែរដូចជា ការបង្កើនសមត្ថភាព និងឱកាសវិនិយោគរួមគ្នាផងដែរ»។
លោក Pablo Kang ឯកអគ្គរាជទូតអូស្ត្រាលីប្រចាំកម្ពុជាបានឲ្យដឹងថា ការជំរុញផលិតកម្មកសិកម្ម និងចំណីអាហារ គឺជាការរួមចំណែករបស់រដ្ឋាភិបាលអូស្ត្រាលីក្នុងការទប់ទល់នឹងវិបត្តិជំងឺកូវីដ១៩ នៅកម្ពុជា៕LA
