.jpg)
ក្នុងឆ្នាំ ២០១៧ ទំហំពាណិជ្ជកម្មទ្វេភាគីអាស៊ាន និងឥណ្ឌា សរុបមាន ៧៣,៥៩ ពាន់លានដុល្លារ។ រូបថត FICCI
ភ្នំពេញៈ ស្ថានទូតឥណ្ឌាប្រចាំប្រទេស កម្ពុជា និងរៀបចំខួបលើកទី៥០ នៃកិច្ចសហប្រតិបត្តិការបច្ចេកទេស និងសេដ្ឋកិច្ចឥណ្ឌា (ITEC) នៅថ្ងៃអង្គារសប្តារហ៍នេះនៅរាជធានីភ្នំពេញ ដើម្បីពង្រឹងទំនាក់ទំនងរវាងប្រទេសទាំង ២ ខណៈវិនិយោគិនឥណ្ឌាបង្ហាញពីចំណាប់អារម្មណ៍ក្នុងការវិនិយោគលើវិស័យមួយចំនួននៅកម្ពុជា។
កម្មវិធី ITEC ដែល នឹងធ្វើឡើងនៅសណ្ឋាគារ The Great Duke នឹងមានការចូលរួមពីឯកអគ្គរដ្ឋទូតឥណ្ឌា និងមន្ត្រី រដ្ឋាភិបាលកម្ពុជា ព្រមទាំងមានការចូលរួមពីនិស្សិតឆ្នើមរបស់ ITEC ប្រមាណជាង ២០០ នាក់ផងដែរ។ ITEC ត្រូវបានបង្កើតនៅឆ្នាំ ១៩៦៤ ក្រោមជំនួយរដ្ឋាភិបាលឥណ្ឌា ដែលមានជំនួយកម្មវិធីទេ្វភាគីរហូតដល់ ១៥៨ ប្រទេស។
តាមរយៈកិច្ចសហប្រតិបត្តិការទ្វេភាគីនានា ក្រោមកម្មវីធិ ITEC ការកសាងសមត្ថភាពត្រូវបាន លើកកម្ពស់ដោយការរៀបចំកម្មវិធីបណ្តុះបណ្តាលនៅក្នុងវិស័យរដ្ឋបាល គណនេយ្យ អភិបាលកិច្ច បច្ចេកវិទ្យា ធនាគារ ព័ត៌មានបច្ចេកទេស ការប្រើប្រាស់ថាមពល ការគ្រប់គ្រង ទេសចរណ៍ ការអនុវត្តច្បាប់ជាដើម ដែលផ្តោតទៅដល់មន្ត្រីនៅតាមក្រសួង និង មន្ទីរនៅក្នុងប្រទេស កម្ពុជា។
មានបុគ្គលិកប្រមាណ ១ ៦០០ នាក់ បម្រើការនៅតាមក្រសួង មន្ទីរ ស្ថាប័នឯករាជ្យនៅកម្ពុជា ដូចជា ធនាគារជាតិនៃកម្ពុជា អគ្គិសនីកម្ពុជាជាដើម ដែលទទួលបានប្រយោជន៍ពីកម្មវិធីវគ្គបណ្តុះបណ្តាលទៅតាមជំនាញនានា។ នេះបើយោងតាមសេចក្តីប្រកាសព័ត៌មាន។
សេចក្តីប្រកាសព័ត៌មានបន្តថា ក្នុងអំឡុងឆ្នាំ ២០១៨ មកដល់ពេលនេះបុគ្គលិក ១៥០ នាក់ត្រូវបានបញ្ជូន ទៅសិក្សានៅក្នុងកម្មវិធីវគ្គបណ្តុះបណ្តាលនៅក្នុងពហុវិស័យតំបន់។
ចំណាប់អារម្មណ៍វិនិយោគិន
ក្នុងអំឡុងកិច្ចប្រជុំកំពូលអាស៊ាន-ឥណ្ឌា លើកទី៤ នៅក្នុងទីក្រុងញូវដេលី កាលពីសប្តាហ៍មុន រដ្ឋមន្ត្រីក្រសួងពាណិជ្ជកម្មកម្ពុជាលោក ប៉ាន សូរស័ក្តិ បានជួបពិភាក្សាជាមួយប្រធានសហព័ន្ធសភាពាណិជ្ជកម្ម និងឧស្សាហកម្មឥណ្ឌា លោក សាន់ឌិប សូម៉ានី ដែលបានបង្ហាញពីចំណាប់អារម្មណ៍វិនិយោគលើវិស័យអាទិភាព នៅកម្ពុជា ដូចជា វិទ្យាសាស្រ្ត និងបចេ្ចកវិទ្យា ទេសចរណ៍ ហេដ្ឋារចនាសម្ព័ន្ធ និងកសិឧស្សាហកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្ម រវាងប្រទេសទាំង ២ ឲ្យបានខ្លាំងក្លា។ នេះបើតាមសេចក្ដីប្រកាសនៅលើទំព័រហ្វេសប៊ុក របស់ក្រសួងពាណិជ្ជកម្ម។
ក្នុងជំនួបនោះ លោក ប៉ាន សូរស័ក្តិ បានស្នើឲ្យមានវិយោគិនឥណ្ឌាកាន់តែច្រើនមកកម្ពុជា ខណៈប្រទេសនេះ មានអំណោយផលទាំងទីតាំងភូមិសាស្ត្រ និងគោលការណ៍លើកទឹកចិត្ត វិនិយោគផ្សេងៗ។
លោកបន្តថា វិស័យកសិឧស្សាហកម្ម ក៏មានសក្តានុពលសម្រាប់ការកែច្នៃនាំចេញទៅកាន់ឥណ្ឌា ផងដែរ។ លោក ប៉ាន សូរស័ក្តិ ក៏ជំរុញឲ្យមានជើងហោះហើរ ត្រង់ពីឥណ្ឌា មកកម្ពុជា ដើម្បីលើកកម្ពស់វិស័យទេសចរណ៍ វប្បធម៌ និងកិច្ចសហប្រតិបត្តិការធុរកិច្ចនៃប្រទេសទាំង ២ ផងដែរ។
ទំហំពាណិជ្ជកម្មទ្វេភាគី និងលំហូរវិនិយោគដោយផ្ទាល់ (FDI) ពីរវាងឥណ្ឌា និងសមាជិកអាស៊ាន មានការកើនឡើង ៣ ដង ចាប់តាំងពីកិច្ចព្រមព្រៀងពាណិជ្ជកម្មសេរីអាស៊ានឥណ្ឌា (AIFTA) បានចូលជាធរមានកាលពីឆ្នាំ ២០១០។
ក្នុងឆ្នាំ ២០១៧ ទំហំពាណិជ្ជកម្មទ្វេភាគីអាស៊ាន និងឥណ្ឌា សរុបមាន ៧៣,៥៩ ពាន់លានដុល្លារ កើនឡើង ២៥,៥ ភាគរយ ធៀបនឹងឆ្នាំ ២០១៦ ដែលមាន ៥៨,៦ ពាន់លានដុល្លារ។ ក្នុងអំឡុងពេលដូចគ្នានេះដែរ លំហូរ FDI ពីឥណ្ឌាមកអាស៊ាន កើនឡើងពី ១,៤៧ ពាន់លានដុល្លារ ក្នុងឆ្នាំ ២០១៥ ដល់ ១,៧៣ ពាន់លានដុល្លារ ក្នុងឆ្នាំ ២០១៧។ នេះបើតាមក្រសួងពាណិជ្ជកម្មកម្ពុជា៕
