.jpg)
អ្នកប្រើប្រាស់កំពុងទាញយកកម្មវិធី Guided Direk ពីទូរស័ព្ទស្មាតហ្វូន។ ហុង មិនា
ភ្នំពេញៈ កម្មវិធីបញ្ជាកក់មគ្គុទេ្ទសក៍ទេសចរណ៍ App Guide Direk ដំបូងត្រូវបានដាក់ឲ្យដំណើរការនៅកម្ពុជាដោយភ្នាក់ងារទេសចរណ៍ក្នុងស្រុក ម៉ាតុង ក្នុងគោលបំណងជួយស្វែងរកទីផ្សារបន្ថែមទៀតដល់មគ្គុទេ្ទសក៍ទេសចរណ៍។ នេះបើតាមនាយកប្រតិបត្តិ App Guide Direk របស់ម៉ាតុង។
កម្មវិធីកក់មគ្គុទ្ទេសក៍ទេសចរណ៍ App Guide Direk នេះត្រូវបានដាក់ឲ្យដំណើរការ កាលពីល្ងាចថ្ងៃសុក្រ ហើយវាក៏នឹងជួយលើកកម្ពស់វិស័យទេសចរណ៍នៅកម្ពុជាផងដែរ។
លោក ឃីម ម៉ាឡែន នាយកប្រតិបតិ្ត App Guide Direk បានថ្លែងក្នុងកម្មវិធីដាក់ឲ្យដំណើរការ App នេះកាលពីថ្ងៃទី ១៩ កក្កដា ថា ក្រុមហ៊ុនទេសចរណ៍ម៉ាតុងបានផ្តួចផ្តើមគំនិតបង្កើត App Guide Direk ក្នុងគោលបំណងបើកទីផ្សារឲ្យកាន់តែទូលំទូលាយដល់មគ្គុទ្ទេសក៍ ព្រោះភ្ញៀវទេសចរជាតិ និងអន្តរជាតិអាចធ្វើការកក់អ្នកមគ្គុទ្ទេសក៍តាមកម្មវិធី Guide Direk នៅលើទូរស័ព្ទដៃ។
លោកថ្លែងថា៖ «ខ្ញុំមើលឃើញថា កង្វះខាតនៅក្នុងទីផ្សារសម្រាប់មគ្គុទ្ទេសក៍ទេសចរណ៍នៅធំ ហើយយើងឃើញមានបញ្ហារបស់ពួកគេពឹងផ្អែកតែលើភ្នាក់ងារទេសចរណ៍ និងក្រុមហ៊ុនទេសចរណ៍ ដូច្នេះយើងព្យាយាមបង្កើត កម្មវិធីកក់មគ្គុទ្ទេសក៍ទេសចរណ៍ ដើម្បីជួយបង្កើនទីផ្សារឲ្យពួកគេបន្ថែម»។
តាមលោក ម៉ាឡែន កម្មវិធីនេះ ក៏នឹងជួយទាក់ទាញភ្ញៀវទេសចរមកទស្សនាកម្ពុជាកាន់តែច្រើនថែមទៀត។លោកបានថ្លែងថា៖ «យើងសង្ឃឹមថា ក្រោយពីដាក់ឲ្យដំណើរការកម្មវិធីនេះ ភ្ញៀវបរទេសមិនមកលេងតែខេត្តសៀមរាបមួយទេ ពួកគេនឹងមកលេងជុំវិញស្រុកខ្មែរ ព្រោះយើងក៏ព្យាយាមផ្សព្វផ្សាយពីកម្ពុជាដែរ»។
លោក សាត ខ្នា មគ្គុទ្ទេសក៍ទេសចរណ៍ជាភាសាអង់គ្លេសនៅទីក្រុងភ្នំពេញដែលប្រើប្រាស់គណនីនៅ Guide Direk សង្ឃឹមថា កម្មវិធីនេះនឹងជួយដល់ទីផ្សារមគ្គុទ្ទេសក៍ទេសចរណ៍ ខណៈពួកគេនឹងមិនពឹងផ្អែកទាំងស្រុងពីក្រុមហ៊ុនទេសចរណ៍ និងពីភ្នាក់ងារទេសចរណ៍ទៀតទេ។
លោកបញ្ជាក់ថា៖ «កន្លងមកភ្ញៀវគាត់មកតាមក្រុមហ៊ុនទេសចរណ៍ ក្រុមហ៊ុនទេសចរណ៍ជាអ្នកចាត់ចែងទាំងអស់រួមមានអ្នកនាំភ្ញៀវ ឡាន កន្លែងហូបអាហារជាដើម»។ លោកបានថ្លែងបន្តថា៖ «តែបើគាត់អាចកក់តាមកម្មវិធីនេះ លុយនឹងចូលមកគណនីយើង[អ្នកនាំភ្ញៀវ] ផ្ទាល់តែម្តង ខ្ញុំគិតថា App មួយនេះ រកទីផ្សារឲ្យអ្នកនាំភ្ញៀវទាំងអ្នកថ្មី និងចាស់»។
លោក ខៀវ ធី ប្រធានសមាគមមគ្គុទ្ទេសក៍អង្គរកម្ពុជា បានប្រាប់ភ្នំពេញប៉ុស្តិ៍ថា កម្មវិធី Guide Direk នឹងជួយជំរុញទីផ្សារមគ្គុទ្ទេសក៍ទេសចរណ៍ និងការផ្សាព្វផ្សាយផលិតផលទេសចរណ៍របស់កម្ពុជានៅលើពិភពលោក។
លោកបានថ្លែងថា៖ «ខ្ញុំគិតថា Guide Direk គឺជាច្រកថ្មីមួយទៀតសម្រាប់ទីផ្សារមគ្គុទ្ទេសក៍ ហើយកម្មវិធីនេះនឹងជួយជំរុញផលិតផលទេសចរណ៍របស់យើងទៅកាន់ពិភពខាងក្រៅកាន់តែទូលំទូលាយ ព្រោះ Guide Direk គឺមិនគ្រាន់តែជាសេវាកម្មមគ្គុទ្ទេសក៍ទេសចរណ៍ទេ ប៉ុន្តែវានឹងជួយផ្សព្វផ្សាយពីផលិតផលទេសរណ៍ផងដែរ»។
តាមលោក ធី បានឲ្យដឹងថា មគ្គុទ្ទេសក៍នៅកម្ពុជាសរុបប្រមាណ ៥ ០០០ នាក់ ក្នុងនោះ មគ្គុទ្ទេសក៍ទេសចរណ៍ប្រមាណ ៣ ០០០ នាក់ ដែលមានអាជ្ញាប័ណ្ណបម្រើការងារក្នុងវិស័យទេសចរណ៍។
ក្នុងឆមាសទី១ ឆ្នាំ ២០១៩ ភ្ញៀវទេសចរបរទេស ដែលទិញសំបុត្រចូលទស្សនារមណីយដ្ឋានអង្គរមានចំនួន ១,២៤ លាននាក់ បានធ្លាក់ចុះជាង ៨ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ខណៈចំណូលពីការលក់សំបុត្រធ្លាក់ចុះប្រហែល ៩ ភាគរយ មកនៅ ៥៥ លានដុល្លារ៕LA
