ភ្នំពេញៈ ស្រី អូន ឈរក្នុងហាងកែសម្ផស្សរបស់ខ្លួនកំពុងគាបសក់ត្រង់ឲ្យស្រ្តីវ័យក្មេងម្នាក់។ ហាងនេះមានភ្ញៀវចូលពេញ គ្មានកៅអីទំនេរនោះទេ។
ផ្ទុយពីអាជីវកម្មផ្សេងទៀតជាច្រើន នៅក្នុងក្រុង ហាងនេះមិនមានបិទប័ណ្ណប្រកាសគាំទ្រគណបក្សប្រជាជន កម្ពុជាកំពុងកាន់អំណាចនេះទេ ប៉ុន្តែក៏គ្មានស្លាកសញ្ញាបក្សប្រឆាំងដែរ។
ប៉ុន្តែស្ត្រីដែលចាត់ទុកខ្លួនឯងជាអ្នកគាំទ្រគណបក្សប្រឆាំងម្នាក់និយាយថា៖ «ទោះបីមានស្លាករបស់គណបក្សសង្គ្រោះជាតិ CNRP ក៏ខ្ញុំមិនហ៊ានដាក់បង្ហាញដែរ»។ មនុស្សរាប់ម៉ឺននាក់បានដើរហែជាក្បួនទៅទទួលលោក សម រង្ស៊ី មេគណបក្សប្រឆាំងដែលទើបត្រឡប់មកវិញកាលពីថ្ងៃសុក្រ ដែលបង្ហាញពីការគាំទ្រគណបក្សនយោបាយរបស់ពួកគេ។ ប៉ុន្តែកម្រិតជំនឿទុកចិត្តនេះមិនបានបង្កើនដល់សហគមន៍អាជីវកម្មនោះទេ។
អ្នកគ្រប់គ្រងសួនធម្មជាតិ សុំមិនបញ្ចេញឈ្មោះនិយាយថា៖ «ប្រជាជនពេលនេះហ៊ាននិយាយប្រសើរជាងកាលពីអតីតកាល ប៉ុន្តែសម្រាប់ប្រជាជនដែលធ្វើអាជីវកម្ម យើងនៅតែភ័យខ្លាចចំពោះសុវត្ថិភាពផ្ទាល់ខ្លួនរបស់ពួកយើង»។
លោក វន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ជាក្រុមមួយដែលជួយដល់កម្មករក្រៅប្រព័ន្ធបានថ្លែងថា ការចូលពាក់ព័ន្ធរបស់ពាណិជ្ជករកំពុងកើនឡើង ប៉ុន្តែការបើកការឃោសនាគឺនៅតែមានកម្រិត។ លោកបានបន្តថា ប្រាក់ចំណេញជាអាទិភាព ហើយវាល្អប្រសើរសម្រាប់ពាណិជ្ជករក្នុងការផ្ដល់ការគាំទ្រដោយ លាក់កំបាំង ជាជាងធ្វើឲ្យបំណងគាំទ្រនយោបាយរបស់ពួកគេត្រូវបានដឹងជាសាធារណៈ។
លោកបញ្ជាក់ថា៖ «ពួកគេចង់ដឹងពីនយោបាយ ហើយចំនួនប្រជាជនដែលគាំទ្រគណបក្សដែលពួកគេស្រឡាញ់កាន់តែកើនឡើង ប៉ុន្តែពួកគេភាគច្រើនគ្រាន់តែធ្វើវាដោយអាថ៌កំបាំង (តាមរយៈការផ្ដល់ប្រាក់) ។ ពួកគេពិតជាបានត្រៀមខ្លួនជាស្រេចដើម្បីបោះឆ្នោតជូនគណបក្សដែលពួកគេស្រឡាញ់»។
ម្ចាស់ហាងផ្កានៅទីក្រុង ភ្នំពេញ ដែលសុំមិនបញ្ចេញឈ្មោះបាននិយាយថា លោកមិនបានចូលរួមការឃោសនាទេ រហូតមកដល់ពេលនេះ ប៉ុន្តែលោកបានផ្ដល់ប្រាក់ ១០ ដុល្លារឲ្យ CNRP ។
លោកបន្តថា ៖ «គណបក្សនេះមិនមានប្រាក់ច្រើនទេ សូម្បីតែសម្រាប់ទិញឯកសណ្ឋានឲ្យអ្នកគាំទ្ររបស់ខ្លួនក៏គ្មានដែរ ដូច្នេះ ខ្ញុំគ្រាន់តែផ្ដល់ប្រាក់មួយចំនួនដោយសង្ឃឹមថា ប្រាក់នេះអាចជួយទិញទឹកឬរបស់ផ្សេងបាន»។
លោក សុន ឆ័យ បានឲ្យដឹងថា CNRP មិនមានពាណិជ្ជករធំៗគាំទ្រដូចគណបក្សកាន់អំណាចទេ តែអាជីវករតូចៗកំពុងមកបំពេញកន្លែងទំនេរនេះ។ លោកលើកឡើងថា៖ «ខ្ញុំគិតថា វាពិតជាគួរឲ្យចាប់អារម្មណ៍ដែលសហគមន៍អាជីវកម្មតូចៗមានបំណងគាំទ្រយើងតាមរបៀបបើកចំហកាន់តែច្រើនឡើងៗ។ នោះជាសញ្ញាមួយដ៏ល្អបំផុត»។
លោក បានថ្លែងថា អ្នកគាំទ្រជាច្រើនមានចាប់ពីម្ចាស់ហាងតូចៗនៅក្នុងទីផ្សាររហូតដល់ហាងដុតនំ សិប្បកម្ម និងហាងលក់វត្ថុអនុស្សាវរីយ៍ ហាងលក់គ្រឿងអលង្ការ និងម្ចាស់ភោជនីយដ្ឋានជាច្រើន។ លោកបន្ថែមថា គណបក្សនេះទទួលបានការគាំទ្រពីបណ្ដាក្រុមហ៊ុនសំណង់មួយចំនួនផងដែរ។
លោក សុន ឆ័យ បានថ្លែងថា កាលពីអតីតកាលនៅពេលដឹងថា ហាងមួយគាំទ្រគណបក្សប្រឆាំងអាជ្ញាធរមូលដ្ឋានយកតម្លៃសេវាក្រៅផ្លូវការ ប៉ុន្តែឥឡូវមិនដូចគ្នាទេ ហើយការគាំទ្រគណបក្សប្រឆាំងកំពុងកើនឡើង។
ពេលសួរថាតើអ្វីអាចមានការផ្លាស់ប្តូរទេបើ CNRP ឈ្នះការបោះឆោ្នតនេះ លោកបញ្ជាក់ថា ពួកគេមានគោលនយោបាយគាំទ្រអាជីវកម្មតូចៗ ដោយសារពួកគេជាអ្នកបង្កើតការងារជាច្រើន និងកំណើនសេដ្ឋកិច្ចដែលមាននិរន្តរភាព។
ម្ចាស់ហាងជាច្រើនបានបដិសេធមិនធ្វើអត្ថាធិប្បាយទេ។ គ្មាននរណាម្នាក់និយាយថា ពួកគេកំពុងត្រូវបានគេទប់ស្កាត់មិនឲ្យចេញទៅក្រៅគាំទ្រដល់ CNRP ដោយសារការសំឡុតបំភ័យពីអាជ្ញាធរមូលដ្ឋាននោះទេ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងថា ការបារម្ភនេះមិនមានមូលដ្ឋាននោះទេ ហើយថា ពាណិជ្ជករគាំទ្រ CNRP ក៏បានលើកទង់ជ័យ របស់គណបក្សប្រឆាំងផងដែរ។
លោកបានបន្តថា៖ «ពួកគេមានបណ្ដាញផ្ទាល់របស់ពួកគេក្នុងការគាំទ្រគ្នាទៅវិញទៅមក។ ពួកគេមានប្រព័ន្ធផ្សព្វផ្សាយព័ត៌មានគាំទ្រដល់ពួកគេពួកគេមានតុលាការការពារពួកគេ។ ពួកគេមិនគួរមានការភ័យខ្លាចទេ»៕
