ភ្នំពេញៈ មន្ត្រីក្រសួងការងារបានឲ្យដឹងថា ការរីករាលដាលនៃកូវីដ ១៩ នៅក្នុងប្រទេស កម្ពុជា មិនទាន់មានការគំរាមកំហែងដែលនឹងអាចឈានទៅរកការបិទរោងចក្រនោះទេ ប៉ុន្តែនឹងធ្វើឲ្យប៉ះពាល់ដល់ការនាំចេញរបស់កម្ពុជា។
ក្រសួងសុខាភិបាលបានបញ្ជាក់ថា គិតត្រឹមថ្ងៃពុធករណីឆ្លងកូវីដ ១៩ នៅកម្ពុជាបានកើនឡើងដល់ ៣៥ នាក់ នៅក្នុងប្រទេស កម្ពុជា។ ការរីករាលដាលនេះបានធ្វើឲ្យមានការបិទសាលារៀន ក្លិបកម្សាន្ត និងកម្មវិធីប្រគំតន្ត្រី ឬការជួបជុំសាសនានៅទូទាំងប្រទេស ដើម្បីទប់ស្កាត់ការរីករាលដាល។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងថា ការរីករាលដាលវីរុសកូវីដ ១៩ ហាក់ដូចជាមិនទាន់ប៉ះពាល់ដែលនឹងនាំទៅដល់ការបិទរោងចក្រកាត់ដេរនៅកម្ពុជានៅឡើយទេ។
លោកថ្លែងថា៖ «បច្ចុប្បន្នឧស្សាហកម្មកាត់ដេរមិនទាន់រងផលប៉ះពាល់ដោយសារតែការរីករាលដាលវីរុសកូវីដ ១៩ នៅឡើយទេ ប៉ុន្តែការនាំចេញផលិតផលសម្លៀកបំពាក់នឹងថមថយល្បឿនទៅទីផ្សារអឺរ៉ុប និងអាមេរិក ប្រសិនបើវីរុសកូវីដ ១៩ បន្តរីករាលដាល»។
លោក ហេង សួរ បានឲ្យដឹងថាក្នុងចំណោមរោងចក្រ ៥០ បានផ្អាកប្រតិបត្តិការដោយសារតែកង្វះវត្ថុធាតុដើម។ គិតត្រឹមថ្ងៃទី ១៧ ខែមីនា នៅពេលនេះរោងចក្រ ១៧ កំពុងចាប់ផ្ដើមសកម្មភាពឡើងវិញដោយមានកម្មករ ១៤ ៦១៧ នាក់ បន្ទាប់ពីមានការផ្គត់ផ្គង់វត្ថុធាតុដើមឡើងវិញ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) បានឲ្យដឹងថា កង្វះវត្ថុធាតុដើមទំនងជាបញ្ចប់នៅពេលឆាប់ៗនេះ ដោយសារតែប្រទេស ចិន បានស្ទុះងើបឡើងវិញ។
លោកបានឲ្យដឹងថា ក្នុងអំឡុងថ្ងៃទី ៩ ដល់ថ្ងៃទី ១៥ ខែមីនា នាវា ១៣ គ្រឿង បានមកដល់កំពង់ផែស្វយ័តក្រុងព្រះសីហនុជាមួយនឹងកុងតឺន័រដឹកសម្ភារកាត់ដេរ និងស្បែកជើងជាង ៩០០ ទូ។
លោកបានថ្លែងថា៖ «កង្វះសម្ភារនឹងត្រូវបានដោះស្រាយនៅខែខាងមុខនេះ ដោយសារតែការកែលម្អស្ថានការណ៍នៅប្រទេសចិន។ ការបារម្ភការឆ្ពោះទៅមុខគឺទីផ្សារនាំចេញរបស់យើងគឺអាមេរិក និងអឺរ៉ុបដែលរងផលប៉ះពាល់យ៉ាងខ្លាំងដោយវីរុសកូវីដ១៩»។
ការនាំចេញទំនិញធ្វើដំណើររបស់កម្ពុជាទៅអាមេរិកកាលពីឆ្នាំមុនមានតម្លៃ ១,២ ពាន់លានដុល្លារ កើនឡើង ២ ដងកាលពីឆ្នាំ ២០១៨។ នេះបើយោងតាមសមាគមរោងចក្រកាត់ដេរនៅកម្ពុជា (GMAC)។
អាមេរិកបន្តក្នុងការធ្វើជាប្រទេសទិញឈានមុខគេនៃទំនិញធ្វើដំណើរកម្ពុជា ដែលមានចំនួនប្រហែល ៨០ ភាគរយ នៃការនាំចេញទាំងអស់។
ធនាគារជាតិនៃកម្ពុជាបានរាយការណ៍ថា ប្រទេស កម្ពុជា បាននាំចេញផលិតផលមានតម្លៃ ១៤,៦៣ ពាន់លានដុល្លារ កាលពីឆ្នាំមុនកើនឡើង ១២,៧ ភាគរយ ធៀបនឹងឆ្នាំ ២០១៨ ខណៈការនាំចូលបានកើនឡើងដល់ ២២,៣៤ ពាន់លានដុល្លារ កើនឡើង ១៨,៦ ភាគរយ៕LA