.jpg)
ក្រុងវ៉ាស៊ីនតោនៈ មន្រ្តីរបស់ក្រុមហ៊ុន Boeing និងនិយតករសហព័ន្ធ នៅសប្ដាហ៍ក្រោយនឹងប្រឈមការចោទសួរដោយសភាអាមេរិកអំពីការធ្លាក់ចុះយន្តហោះ Boeing 737 MAX 8 ពីរគ្រឿង ដែលបណ្ដាលឲ្យមនុស្សស្លាប់ក្នុងរយៈពេលប៉ុន្មានខែថ្មីៗនេះ។
លោក Ted Cruz សមាជិកព្រឹទ្ធសភាប្រចាំរដ្ឋតិចសាស មកពីគណបក្សសាធារណរដ្ឋ បានអំពាវនាវឲ្យមានការបើកសវនាការមួយរបស់អនុគណៈកម្មាធិការពាណិជ្ជកម្មទទួលបន្ទុកអាកាសចរណ៍ និងអវកាស នៅថ្ងៃទី ២៧ ខែ មីនា ជាមួយមន្ដ្រីក្រសួងដឹកជញ្ជូនចំនួន ៣ នាក់ ជាពិសេសប្រធានស្ដីទីរដ្ឋបាលអាកាសចរណ៍សហព័ន្ធ (AFF)។
លោក Cruz មានបំណងរៀបចំសវនាការលើកទី២ ដើម្បីចោទសួរមន្ដ្រីរបស់ក្រុមហ៊ុន Boeing ព្រមទាំងក្រុមអ្នកបើកបរ និងមនុស្សផ្សេងៗទៀតនៅក្នុងឧស្សាហកម្មនេះ។ នេះបើសេចក្ដីប្រកាសព័ត៌មាន។
មនុស្សជាង ៣០០ នាក់ បានស្លាប់ក្នុងការធ្លាក់ចុះយន្តហោះ 737 MAX 8 ពីរគ្រឿងនេះ ដែលបានកើតឡើងភ្លាមៗ បន្ទាប់ពីការហោះឡើងក្នុងប្រទេស ឥណ្ឌូនេស៊ី កាលពីខែតុលា និងនៅប្រទេស អេត្យូពី កាលពីដើមខែនេះ។
ក្រុមហ៊ុន Boeing និងរដ្ឋបាល FAA កំពុងស្ថិតក្រោមការស៊ើបអង្កេតដោយក្រសួងដឹកជញ្ជូន ទាក់ទងនឹងការធ្វើការងារក្នុងការដាក់បង្ហាញយន្តហោះនេះ ជាពិសេសប្រព័ន្ធបង្ការការរលត់ម៉ាស៊ីន (MCAS) ថ្មីនិងមានការជាប់ទាក់ទងនៅក្នុងការធ្លាក់ចុះយន្តហោះរបស់ក្រុមហ៊ុន Lion Air កាលពីខែតុលា។
ក្រុមអ្នកបើកបរបានត្អូញត្អែរថា ពួកគេមិនត្រូវបានជូនដំណឹងអំពីប្រព័ន្ធថ្មីនេះទេ ដែលប្រព័ន្ធនេះអាចបង្ខំឲ្យក្បាលយន្តហោះនេះសំយុងចុះ បើវាទទួលសញ្ញាដោយភាន់ច្រឡំពីសេនស័រ ដែលធ្វើឲ្យវាហាក់ដូចជាទទួលសញ្ញាថា យន្តហោះនេះកំពុងស្ថិតក្នុងហានិភ័យនៃការរលត់ម៉ាស៊ីន៕ AFP/LA
