ភ្នំពេញ៖ កសិករដាំមៀននៅខេត្តបាត់ដំបង ដែលជាខេត្តដាំដុះមៀនធំជាងគេមួយរបស់កម្ពុជាកំពុងប្រឈមនឹងធ្លាក់ចុះតម្លៃ ខណៈឈ្មួញពីចិន និងថៃ បានកាត់បន្ថយការទិញដោយសារតែវិបត្តិវីរុសកូរ៉ូណា។
ផ្លែមៀនដែលដាំភាគច្រើននៅខេត្តបាត់ដំបង និងខេត្តប៉ៃលិនភាគច្រើនត្រូវបាននាំចេញទៅចិន និងថៃ ខណៈនៅសល់បានប្រើប្រាស់ក្នុងស្រុក។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបងបានប្រាប់ភ្នំពេញប៉ុស្ដិ៍កាលពីថ្ងៃអង្គារថា ថ្មីៗនេះការនាំចេញផ្លែមៀនទៅប្រទេស ចិន តាមរយៈប្រទេស ថៃ បានថយចុះ ដោយសារតែផលប៉ះពាល់នៃការរីករាលដាលវីរុសកូវីដ ១៩ ដែលធ្វើឲ្យតម្លៃបានធ្លាក់ចុះពី ៣ ៦០០ រៀល ក្នុងមួយគីឡូក្រាមកាលពីឆ្នាំមុនមកនៅត្រឹម ២ ៥០០ រៀល ក្នុងមួយគីឡូក្រាម។ លោកបានថ្លែងថា៖ «តម្លៃបានធ្លាក់ចុះដោយសារតែការបញ្ជាទិញរបស់ឈ្មួញថៃធ្លាក់ចុះ»។
លោក គឹម ហួត បានឲ្យដឹងថា ផ្ទៃដីដាំដុះមៀននៅខេត្តបាត់ដំបងមានទំហំ ៤ ២៧៩ ហិកតា ជាមធ្យមប្រមូលផលបាន ១៤ តោនក្នុង ១ ហិកតា។ កាលពីឆ្នាំមុន កសិករបានប្រមូលផលផ្លែមៀនបាន ៥៤ ៨៦៦ តោន។
លោក អ៊ុង ប៊ុនលី កសិករដាំមៀននៅខេត្តបាត់ដំបងលើផ្ទៃដីទំហំ ២០ ហិកតា បានឲ្យដឹងថា បច្ចុប្បន្នផ្លែមៀនរបស់លោកលក់ក្នុងទីផ្សារក្នុងស្រុកតែប៉ុណ្ណោះ ដោយសារតែអតិថិជនមកពីប្រទេស ថៃ កាត់បន្ថយការបញ្ជាទិញ ដោយសារតែការរីករាលដាលវីរុសកូវីដ ១៩។ លោកបញ្ជាក់ថា៖ «រដូវនេះខ្ញុំមិនមើលឃើញអតិថិជនថៃច្រើនមកទិញផ្លែមៀនពីយើងនោះទេ។ ខ្ញុំគិតថា ប្រទេស ចិន កាត់បន្ថយតម្រូវការផ្លែមៀន ដូច្នេះវាមានផលប៉ះពាល់ដល់ទីផ្សាររបស់យើង។ បើកម្ពុជាមានរោងចក្រកែច្នៃ និងវេចខ្ចប់ យើងនឹងមិនពឹងផ្អែកលើអតិថិជនថៃទៀតទេ»។
ទោះបីយ៉ាងនេះសម្រាប់ខេត្តប៉ៃលិនកសិករនៅទទួលបានអត្ថប្រយោជន៍ពីកសិកម្មផ្លែមៀននេះ ដដែលទោះបីមានការប្រឈមនឹងបញ្ហាកូវីដ ១៩ ក៏ដោយ ព្រោះសហគមន៍មៀននៅខេត្តប៉ៃលិនបានធ្វើកិច្ចសន្យាកសិកម្មជាមួយនឹងក្រុមហ៊ុនបញ្ជាទិញ។
លោក ស្រេង ស្រ៊ាង កសិករដាំមៀន និងជាសមាជិកសហគមន៍កសិករមៀនប៉ៃលិនបានឲ្យដឹងថា ការធ្វើកសិកម្មតាមកិច្ចសន្យាបានរក្សាតម្លៃផ្លែមៀនប៉ៃលិនមានស្ថិរភាពប្រហែល ៣ ០០០ រៀល ក្នុង ១ គីឡូក្រាម។ បច្ចុប្បន្នលោកបានលក់ផ្លែមៀនប្រហែល ១៥ តោនរួចហើយ។ លោកលើកឡើងថា៖ «ការធ្វើកសិកម្មតាមកិច្ចសន្យាបានជួយរក្សាតម្លៃរបស់យើង»។
លោក អ៊ុន ថេង សមាជិកក្រុមប្រឹក្សាភិបាលសហគមន៍កសិករមៀនប៉ៃលិនបានឲ្យដឹងថា ភាគច្រើនផ្លែមៀនប៉ៃលិន ត្រូវបាននាំចេញទៅប្រទេស ថៃ ដែលផ្លែមៀននេះត្រូវបានកែច្នៃ និងវេចខ្ចប់សម្រាប់ការនាំចេញទៅចិន។
លោកបន្តថា ជារៀងរាល់ឆ្នាំ ការនាំចេញផ្លែមៀនប៉ៃលិនទៅប្រទេស ចិន មានប្រហែល ៨ ០០០ តោន តាមរយៈប្រទេស ថៃ។ លោកបន្ថែមថា កសិដ្ឋានដាំដុះមៀននៅខេត្តប៉ៃលិន មានប្រហែល ៩០០ ហិកតា។
ប៉ៃលិន និងខេត្តបាត់ដំបងជាទីតាំងដាំដុះផ្លែមៀនធំជាងគេក្នុងប្រទេសដែលមានរហូតដល់ជិត ៨០ ភាគរយ នៃផ្ទៃដីដាំដុះសរុបទូទាំងប្រទេស៕LA