កសិដ្ឋានចិញ្ចឹមក្រពើមួយនៅខេត្តកណ្តាល។ អ្នកចិញ្ចឹមក្រពើនៅកម្ពុជាភាគច្រើនចិញ្ចឹមលក់កូនជាជាងលក់ស្បែក។ ហេង ជីវ័ន
ភ្នំពេញៈ កសិដ្ឋានចិញ្ចឹមក្រពើ ១៦ កន្លែងបន្ថែមទៀតត្រូវបានទទួលស្គាល់ដោយអនុសញ្ញាអន្តរជាតិដែលជាអនុសញ្ញាដើម្បីការនាំចេញដោយស្របច្បាប់ទៅទីផ្សារអន្តរជាតិ។ នេះបើយោងតាមលោក អិន ហ៊ល អនុប្រធាននាយកដ្ឋានអភិរក្សជលផលនៅក្រសួងកសិកម្មបានឲ្យដឹងកាលពីម្សិលមិញ។
លោក ហ៊ល បានឲ្យដឹងថាមានកសិដ្ឋានចិញ្ចឹមក្រពើប្រហែល ៧០០ កន្លែងនៅក្នុងប្រទេសកម្ពុជាក្នុងនោះមានកសិដ្ឋានចិញ្ចឹមក្រពើ ៤៤៥ កន្លែងត្រូវបានចុះបញ្ជីនៅក្រសួងកសិកម្ម។
ការទទួលស្គាល់ពីអនុសញ្ញា Cites នូវកសិដ្ឋានចិញ្ចឹមក្រពើ ១៦ កន្លែងថ្មីៗនេះរបស់កម្ពុជាបានធ្វើឲ្យចំនួនកសិដ្ឋានចិញ្ចឹមក្រពើសរុបនៅកម្ពុជាដែលទទួលស្គាល់ដោយ Cites បានកើនឡើងដល់ ២១ កន្លែងដែលអាចជួញដូរស្បែកក្រពើទៅទីផ្សារអន្តរជាតិដោយស្របច្បាប់។ លោកបានថ្លែងថា៖ «ការទទួលស្គាល់ដោយ Cites មានសារៈសំខាន់សម្រាប់ឧស្សាហកម្មក្រពើដែលវានឹងជួយធ្វើឲ្យទីផ្សារមានស្ថិរភាព ហើយកសិករអាចបន្ថែមតម្លៃលើការនាំចេញបាន»។
លោកបន្ថែមថា កសិដ្ឋានចិញ្ចឹមក្រពើទ្រង់ទ្រាយធំៗមានទីតាំងនៅខេត្តសៀមរាប បាត់ដំបង កំពង់ធំ កំពង់ឆ្នាំង បន្ទាយមានជ័យ កណ្ដាល ពោធិ៍សាត់ ដែលបានប៉ាន់ប្រមាណមានក្រពើធំជាង ២០ ០០០ ក្បាល និងកូនក្រពើមានចំនួន ៣០០- ០០០ ក្បាល។
លោកបន្តថា៖ «ក្រពើត្រូវបានចាត់ទុកថាជាប្រភេទសត្វដែលងាយរងគ្រោះដូច្នេះអង្គការ Cites គាំទ្រសម្រាប់ការពារ ហើយនិងបញ្ជាក់កូតាក្រពើរបស់យើងសម្រាប់ការនាំចេញដើម្បីបន្តការការពារដល់ការនាំចេញ»។
លោកបានថ្លែងថា៖ «កសិករចិញ្ចឹមក្រពើភាគច្រើនចង់លក់កូនក្រពើជាជាងលក់ស្បែក ដោយសារសមត្ថភាព និងបច្ចេកទេសអ្នកចិញ្ចឹមនៅមានកម្រិត»។
លោកបានបន្ថែមថាទីផ្សារក្រពើភាគច្រើនគឺប្រទេសថៃ និងវៀតណាម។
លោក លី ហ្វេន កសិករចិញ្ចឹមក្រពើនៅឃុំក្របីរៀល ស្រុកសៀមរាប ខេត្តសៀមរាបដែលជាកសិករមួយរូបក្នុងចំណោមកសិករចិញ្ចឹមក្រពើ ១៦ រូបដែលទទួលស្គាល់ដោយអង្គការ Cites បានថ្លែងថា លោកកំពុងស្វែងរកការនាំចេញលើកដំបូងទៅប្រទេសថៃនៅខែមិថុនាខាងមុខនេះ។
លោកបានថ្លែងថា៖ «នេះគឺជាអ្វីដែលខ្ញុំកំពុងរង់ចាំ ខ្ញុំនឹងនាំចេញកូនក្រពើរបស់ខ្ញុំទៅប្រទេសថៃនៅខែមិថុនា ហើយកំពុងស្វែងរកវិនិយោគិនជនជាតិចិនសម្រាប់ការពង្រីកកសិដ្ឋានរបស់ខ្ញុំ ដោយសារតែខ្ញុំត្រូវបានផ្ដល់លក្ខណសម្បត្តិគ្រប់គ្រាន់ដោយអង្គការ Cites ដែលខ្ញុំអាចជួញដូរជាផ្លូវការបាន»។
លោកបានបន្តទៀតថា បច្ចុប្បន្នកូនក្រពើមានតម្លៃចាប់ពី ១៣ ដុល្លារទៅ ១៥ ដុល្លារសម្រាប់កូនក្រពើអាយុមួយខែហើយលោកមានក្រពើមេ ២ ០០០ ក្បាល ដែលអាចបង្កើតកូនក្រពើបាន ១២ ០០០ ក្បាលក្នុង ១ ឆ្នាំ៕ LA
