.jpg)
លោក Justin Trudeau ប្រកាសវិធានការថ្មីដើម្បីស្រោចស្រង់សេដ្ឋកិច្ច។ AFP
ក្រុងអូតាវ៉ាៈ នាយករដ្ឋមន្ត្រីប្រទេសកាណាដាលោក Justin Trudeau កាលពីថ្ងៃសុក្របានប្រកាសនូវស៊េរីវិធានការ (Series of Measures) ដើម្បីបង្កើនការស្រោចស្រង់សេដ្ឋកិច្ចជាតិកាណាដាដែលជាចំនួនស្ទើរទ្វេដងនៃចំនួនដែលបានសន្យាក្នុងរយៈពេល ២ ថ្ងៃមុនដោយមានប្រាក់ដល់ទៅ ២០០ ពាន់លានដុល្លារកាណាដា។
វិធានការនោះមានរួមបញ្ចូលទាំងការឧបត្ថម្ភធនលើប្រាក់ខែចំនួន ៧៥ ភាគរយ ដល់បុគ្គលិកសហគ្រាសខ្នាតតូច និងមធ្យមដែលរងផលប៉ះពាល់ដោយសារវិបត្តិវីរុសកូរ៉ូណា និងការផ្តល់ជូនច្រើនទៀតដូចជា ការពន្យារការបង់ពន្ធ ការបង់ឥណទាន និងការផ្តល់កម្ចីក្នុងអត្រាការប្រាក់ទាបដល់អាជីវកម្មក្នុងប្រទេសកាណាដាជាដើម។
ធនាគារកាណាដាកំពុងទម្លាក់ការប្រាក់គោលនៅត្រឹម ០,២៥ ភាគរយ ដែលជាផ្នែកមួយនៃការបន្ថយផលប៉ះពាល់នៃការរាលដាលវីរុសកូរ៉ូណាចំពោះសេដ្ឋកិច្ច។
កញ្ចប់ជំនួយត្រូវបានប្រកាសដាក់ជារបាយការណ៍ដាក់ជូនទៅរដ្ឋសភាកាលពីថ្ងៃសុក្រដោយរបាយការណ៍នោះបានព្យាករថា សេដ្ឋកិច្ចកាណាដានឹងធ្លាក់ចុះ ៥,១ ភាគរយ ក្នុងឆ្នាំ ២០២០ ដែលជាការធ្លាក់ចុះដ៏អាក្រក់បំផុតចាប់តាំងពីឆ្នាំ ១៩៦២។
របាយការណ៍សង្ខេបផ្ញើទៅរដ្ឋសភាបានសរសេរថា៖ «បច្ចុប្បន្ននេះទស្សនវិស័យសេដ្ឋកិច្ច និងសារពើពន្ធមិនច្បាស់លាស់ទាល់តែសោះ។ សេណារីយោមួយចំនួនកំពុងពិចារណា ប៉ុន្តែគ្មានសេណារីយោណាមួយអាចសម្រេចបាននោះទេ»។
របាយការណ៍បានសន្និដ្ឋានថា វិធានការគម្លាតសង្គម និងការនៅដាច់ឆ្ងាយបណ្តាលមកពីកូវីដ ១៩ នាពេលនេះ «នឹងរក្សារហូតដល់ខែសីហាដែលមានរយៈពេល ៦ ខែពេញ»។
របាយការណ៍ក៏បានសន្និដ្ឋានដែរថា តម្លៃប្រេងនឹងនៅតែធ្លាក់ចុះទាបដូចតម្លៃបច្ចុប្បន្ន។
ក្នុងសេណារីយោនេះឱនភាពថវិការបស់រដ្ឋសហព័ន្ធសម្រាប់ឆ្នាំសារពើពន្ធឆ្នាំនេះ ដោយចាប់ផ្តើមពីថ្ងៃទី ១ ខែមេសាមានចំនួន ១១២,៧ ពាន់លានដុល្លារកាណាដាលើសការព្យាករឆ្នាំ ២០១៩-២០២០ ចំនួន ៥ ដងដែលសមមូលនឹង ៥,២ ភាគរយនៃផលិតផលក្នុងស្រុកសរុបរបស់កាណាដា។
កាណាដាដែលជាប្រទេសផលិតប្រេងធំបំផុតទី ៤ ក្នុងពិភពលោកត្រូវបានបំផ្លាញដោយតម្លៃប្រេងឆៅធ្លាក់ចុះទាបដែលបណ្តាលឲ្យសេដ្ឋកិច្ចជាប់គាំង ព្រោះតែការរីករាលដាលវីរុសកូរ៉ូណាព្រមទាំងសង្គ្រាមតម្លៃប្រេងរវាងរុស្ស៊ី និងអារ៉ាប៊ីសាអ៊ូឌីត។
ការិយាល័យនាយករដ្ឋមន្ត្រីបានឲ្យដឹងថា ការឧបត្ថម្ភធនប្រាក់ខែ ៧៥ ភាគរយសម្រាប់អាជីវកម្មដែលមានលក្ខណសម្បត្តិទទួលបានដោយកើនពី ១០ ភាគរយ ដែលបានប្រកាសកាលពីសប្តាហ៍មុនគឺមានរយៈពេល ៣ ខែដើម្បីដំណើរការឡើងវិញរហូតដល់ថ្ងៃទី ១៥ ខែមីនា។
លោកនាយករដ្ឋមន្ត្រី Trudeau និយាយថា៖ «អាជីវកម្មខ្នាតតូចជាឆ្អឹងខ្នងនៃសេដ្ឋកិច្ចរបស់យើង ហើយពួកគេកំពុងប្រឈមការលំបាក និងភាពមិនច្បាស់លាស់ផ្នែកសេដ្ឋកិច្ចក្នុងអំឡុងការរីករាលដាលកូវីដ ១៩»។
លោកបន្ថែមថា៖ «នេះជាហេតុផលដែលយើងកំពុងចាត់វិធានការបន្ថែមដើម្បីជួយពួកគេទទួលបានហិរញ្ញវត្ថុដែលត្រូវការដើម្បីថែរក្សាបុគ្គលិក និងទូទាត់ការចំណាយ»។
ប្រជាជនកាណាដាជាង ១ លាននាក់ បានបាត់បង់ការងាររបស់ពួកគេចាប់តាំងពីសប្តាហ៍មុន ដោយសារការធ្លាក់ចុះសេដ្ឋកិច្ចដ៏មហាអាក្រក់បង្កដោយជំងឺរាតត្បាតទូទាំងសកលលោក។
ធនាគារកាណាដាបានឲ្យដឹងក្នុងសេចក្តីប្រកាសរបស់ខ្លួនកាលពីលើកមុនដោយពន្យល់ថា ការសម្រេចចិត្តលើអត្រាការប្រាក់មិនទាន់កំណត់ពេលនោះទេ ការផ្ទុះឡើងនេះមានផលលំបាកយ៉ាងខ្លាំងសម្រាប់ប្រជាជនកាណាដា និងវិស័យសេដ្ឋកិច្ចតែម្តងដូចជាតម្លៃប្រេងក្នុងពិភពលោកបានធ្លាក់ចុះ ដោយធនាគារកាណាដាបាននិយាយក្នុងសេចក្តីប្រកាសរបស់ខ្លួនកាលពីលើកមុនថា ការសម្រេចចិត្តលើអត្រាការប្រាក់មិនទាន់កំណត់ពេលនោះទេ។
ធនាគារកាណាដាបានឲ្យដឹងថា៖ «គោលបំណងនៃការកាត់អត្រាការប្រាក់គឺដើម្បីគាំទ្រដល់ប្រព័ន្ធហិរញ្ញវត្ថុក្នុងតួនាទីកណ្តាលរបស់ខ្លួននៃការផ្តល់ឥណទានក្នុងសេដ្ឋកិច្ច ហើយដាក់ចេញនូវមូលដ្ឋានគ្រឹះសម្រាប់ការវិលត្រឡប់របស់វិស័យសេដ្ឋកិច្ចទៅរកប្រក្រតីភាពឡើងវិញ»៕ RR
