ក្រុងតូរ៉ុនតូៈ តុលាការក្នុងទីក្រុងតូរ៉ុនតូកាលពីថ្ងៃពុធបានបញ្ជាឲ្យក្រុមហ៊ុន Volkswagen (VW) បង់ប្រាក់ពិន័យ ១៩៦,៥ លានដុល្លារកាណាដា (១៥០ លានដុល្លារអាមេរិក) បន្ទាប់ពីក្រុមហ៊ុនផលិតរថយន្តមួយនេះបានសារភាពកំហុសចំពោះការរំលោភច្បាប់បរិស្ថានក្នុងរឿងអាស្រូវបោកបន្លំការបញ្ចេញកាបូន។
តុលាការបានទទួលយកកិច្ចព្រមព្រៀងមួយដែលក្រុមហ៊ុនផលិតរថយន្តរបស់អាល្លឺម៉ង់មួយនេះ សម្រេចបានជាមួយរដ្ឋាភិបាលកាណាដាដែលកាលពីខែធ្នូបានដាក់ការចោទប្រកាន់ជាផ្លូវការប្រឆាំងនឹងក្រុមហ៊ុននេះ។
ប្រាក់ពិន័យនេះគឺជាការបន្ថែមលើប្រាក់ពិន័យជិត ២,៤ ពាន់លានដុល្លារកាណាដា ដែលក្រុមហ៊ុន Volkswagen បានព្រមព្រៀងបង់ក្នុងឆ្នាំ ២០១៦ ដើម្បីសងជំងឺចិត្តដល់ប្រទេសកាណាដាដែលបានទិញរថយន្តប្រហែល ១៣០ ០០០ គ្រឿង ដែលមិនបានឆ្លើយតបទៅនឹងស្តង់ដារបស់កាណាដាចាប់ពីឆ្នាំ ២០០៩ ដល់ឆ្នាំដែលត្រូវពិន័យព្រមទាំងប្រាក់ពិន័យចំនួន ១៧,៥ លានដុល្លារកាណាដា សម្រាប់ការផ្សព្វផ្សាយពាណិជ្ជកម្មក្លែងក្លាយ។
កាលពីខែធ្នូឆ្នាំមុន ទីក្រុងអូតាវ៉ាបានចោទប្រកាន់ក្រុមហ៊ុនផលិតរថយន្តមួយនេះពីបទដឹងឮអំពីការនាំចូលរថយន្តចូលក្នុងប្រទេសកាណាដាដែលមិនឆ្លើយតបនឹងស្តង់ដាបញ្ចេញកាបូន បន្ទាប់ពីចំណាយពេលស៊ើបអង្កេតអស់រយៈពេល ៤ ឆ្នាំ។
ចៅក្រម Enzo Rodinelli បានចេញបញ្ជាកាលពីថ្ងៃពុធថា ក្រុមហ៊ុន Volk-swagen មានពេល ៣០ ថ្ងៃដើម្បីបង់ប្រាក់ពិន័យនេះ។
យោងតាមព្រះរាជអាជ្ញាលោក Tom Lemon ទឹកប្រាក់នេះ «មានទំហំច្រើនជាង ២៦ ដងធៀបនឹងប្រាក់ពិន័យខ្ពស់បំផុតដែលធ្លាប់មាន (ដែលត្រូវបានដាក់ពិន័យ) សម្រាប់បទល្មើសបរិស្ថាននៅប្រទេស កាណាដា»។
ប្រាក់ពិន័យនេះតំណាងឲ្យការពិន័យចំនួន ១ ៤៥០ ដុល្លារកាណាដា សម្រាប់រថយន្ត ១ គ្រឿង នៃរថយន្តម៉ាក Volk-swagen, Audi និង Porsche សរុបចំនួន ១៣០ ០០០ គ្រឿង ដែលត្រូវបាននាំចូលក្នុងប្រទេស កាណាដាក្នុងអំឡុងពេលនោះព្រមទាំងទឹកប្រាក់សរុបចំនួន ៨ លានដុល្លារកាណាដា ពីបទបង្កឲ្យអ្នកប្រើប្រាស់យល់ច្រឡំ។
ក្រុមហ៊ុន Volkswagen បានសារភាពក្នុងឆ្នាំ ២០១៥ ថា ខ្លួនបំពាក់សូហ្វវែរដោយចេតនាលើរថយន្តជាង ១១ លានគ្រឿង ដើម្បីបន្លំការបញ្ចេញកាបូនក្នុងពេលធ្វើតេស្តដោយអាជ្ញាធរ៕ KC