.jpg)
លោកស្រី Freeland និងរដ្ឋមន្ត្រីក្រសួងការបរទេសអាមេរិកក្នុងជំនួបនៅដើមខែនេះក្នុងទីក្រុងវ៉ាស៊ីនតោនឌីស៊ី។ រូបថត AFP
ក្រុងអូតាវ៉ាៈ ប្រទេស កាណាដា កំពុងពិចារណាបន្ថែមពីឈ្មោះទំនិញទៅក្នុងបញ្ជីដកហូតពន្ធរបស់ខ្លួន ដើម្បីបង្កើនសម្ពាធទៅលើទីក្រុងវ៉ាស៊ីនតោន ឲ្យបោះបង់ការដកហូតពន្ធលើអាលុយមីញ៉ូម និងដែកថែប។ នេះបើយោងតាមការថ្លែងរបស់លោកស្រី Chrystia Freeland រដ្ឋមន្ត្រីក្រសួងការបទេសកាណាដា។
លោកស្រី Freeland បានប្រាប់ក្រុមអ្នកយកព័ត៌មានក្នុងទីក្រុងអូតាវ៉ា ប្រទេស កាណាដា ថា៖ «យើងកំពុងសម្លឹងមើលរកវិធីនានាដែលយើងអាចកែសម្រួលបញ្ជីដកហូតពន្ធសងសឹកដើម្បីឲ្យមានផលប៉ះពាល់កាន់តែខ្លាំងថែមទៀត»។
កាលពីខែកក្កដា ឆ្នាំ ២០១៧ ប្រទេស កាណាដា បានវាយប្រហារតបតវិញទៅកាន់សហរដ្ឋអាមេរិកជាមួយនឹងការដកហូតពន្ធសងសឹកទៅលើទំនិញរបស់អាមេរិករួមទាំង ទឹកក្រូច ទឹកប៉េងបោះ និងស្រាវីស្គី ដែលមានតម្លៃសរុប ១៦,៦ ពាន់លានដុល្លារកាណាដា (១២,៥ ពាន់លានដុល្លារអាមេរិក)។
ការដកហូតពន្ធនេះបានកើតមានឡើងបន្ទាប់ពីលោកប្រធានាធិបតីអាមេរិក ដូណាល់ ត្រាំ បានដកហូតពន្ធ ២៥ ភាគរយ លើការនាំចូលផលិតផលដែក និង ១០ ភាគរយ លើអាលុយមីញ៉ូម។
លោក David MacNaughton ឯកអគ្គរាជទូតកាណាដាប្រចាំទីក្រុងវ៉ាស៊ីនតោន ត្រូវបានរាយការណ៍ថាបានប្រាប់អ្នកកាសែតផ្នែកកសិកម្មក្នុងទីក្រុងវ៉ាស៊ីនតោនកាលពីថ្ងៃចន្ទថា ផលិតផលកសិកម្មអាមេរិកចំនួនដ៏ច្រើន ដូចជាផ្លែប៉ោម សាច់ជ្រូក និងស្រា អាចស្ថិតក្នុងបញ្ជីពន្ធសងសឹកដែលត្រូវបានធ្វើបច្ចុប្បន្នភាពនេះ។
ប៉ុន្តែកាសែត Politico បានរាយការណ៍ដោយដកស្រង់សម្តីរបស់លោក ខណៈដែលលោកបានថ្លែងថា វិធានការនេះមិនគួរត្រូវបានបកស្រាយថាជាការបង្កើនជម្លោះពាណិជ្ជកម្មនោះទេ។
ជំនួសមកវិញ លោក MacNaughton បានពន្យល់ថា ទំនិញដែលនឹងត្រូវបន្ថែមទៅក្នុងបញ្ជីនេះនឹង ជួយបំពេញឱនភាពពន្ធដែលត្រូវបានបង្កើតឡើងនៅពេលប្រទេស កាណាដា បានលើកលែងពន្ធលើទំនិញអាមេរិកក្នុងតម្លៃជាង ២៨៥ ពាន់លានដុល្លារកាណាដា (២១៤ ពាន់លានដុល្លារអាមេរិក)។
កាលពីខែមុន លោកស្រី Freeland បានថ្លែងថា ទីក្រុងអូតាវ៉ានឹងមិនផ្តល់សច្ចាប័នដល់កិច្ចព្រមព្រៀងពាណិជ្ជកម្មប្រចាំទ្វីបអាមេរិកដែលទើបនឹងសម្រេចបានជាមួយសហរដ្ឋអាមេរិក និងប្រទេស ម៉ិកស៊ិក នោះទេ លុះត្រាតែពន្ធលើដែកថែប និងអាលុយមីញ៉ូមរបស់អាមេរិកត្រូវបានដកចេញ៕ AFP/KC
