ក្រុងអូតាវ៉ាៈ ក្រុមអ្នកស្រាវជ្រាវរបស់កាណាដា បានរកឃើញយុទ្ធនាការបង្កើតព័ត៌មានមិនពិតមួយដែលអាចមានទំនាក់ទំនងទៅនឹងអ៊ីរ៉ង់ ដើម្បីបាចសាចព័ត៌មានមិនពិតដោយផ្តោតទិសដៅជាចម្បងលើអ៊ីស្រាអែល អារ៉ាប៊ីសាអ៊ូឌីត និងសហរដ្ឋអាមេរិក។
ក្រុមអ្នកស្រាវជ្រាវមកពីសាកលវិទ្យាល័យ Toronto ឲ្យដឹងថា ក្រុមនេះបានក្លែងខ្លួនធ្វើជាស្ថាប័នព័ត៌មានស្របច្បាប់ ដើម្បី «សាបព្រោះព័ត៌មានមិនពិត និងពង្រឹងព័ត៌មាននានាដែលមានភាពសំខាន់ខ្លាំងចំពោះអារ៉ាប់ប៊ីសាអ៊ូឌីត អាមេរិក និងអ៊ីស្រាអែល»។
ក្រុមយុទ្ធនាការដែលក្រុមអ្នកស្រាវជ្រាវបានហៅថា «សត្វល្អិតគ្មានទីបញ្ចប់» នោះ ក្រោយមកនឹងប្រើប្រាស់អត្តសញ្ញាណអនឡាញក្លែងក្លាយ ដើម្បីពង្រឹងព័ត៌មានទាំងនោះ តាមរយៈការសរសេរអំពីព័ត៌មានទាំងនោះ ឬចែករំលែកលីង (link) ទៅកាន់មនុស្សផ្សេងទៀត។
ព័ត៌មានដែលត្រូវបានបោះផ្សាយក្នុងប្រព័ន្ធផ្សព្វផ្សាយទូលំទូលាយ ជាញឹកញាប់ត្រូវបានជ្រើសរើសយកមកផ្សព្វផ្សាយបន្តដោយអ្នកកាសែតផ្សេងទៀត។
ក្រុមអ្នកស្រាវជ្រាវបានដកស្រង់ឧទាហរណ៍មួយអំពីរឿងរ៉ាវរបស់ទីភ្នាក់ងារព័ត៌មាន Reuters កាលពីឆ្នាំ ២០១៧ ដែលត្រូវបានព័ត៌មានក្លែងក្លាយរាយការណ៍ថា Reuters មានបំណងបោះពុម្ពកាសែតឈ្មោះ The Local ក្នុងប្រទេស ស្វ៊ីស។ ព័ត៌មាននេះត្រូវបានយកមកផ្សាយបន្តដោយកាសែតផ្សេងទៀតមុនពេល Reuters ចេញមុខបកស្រាយអំពីបញ្ហានេះ៕ AFP/KC