ភ្នំពេញៈ លោកនាយករដ្ឋមន្ត្រី ហ៊ុន សែន នៅថ្ងៃនេះនឹងចូលរួមសម្ពោធដាក់ឲ្យដំណើរការជាផ្លូវការសេវាដឹកអ្នកដំណើរតាមផ្លូវទឹកដែលជាផ្នែកមួយនៃការលើកកម្ពស់សេវាដឹកអ្នកដំណើរសាធារណៈរបស់រដ្ឋាភិបាលកម្ពុជា។ នេះបើតាមអ្នកនាំពាក្យក្រសួងសាធារណការ និងដឹកជញ្ជូន។
នេះជាការបង្ហាញខ្លួននៅក្នុងពិធីសម្ពោធសមិទ្ធផលជាសាធារណៈលើកដំបូងរបស់លោកនាយករដ្ឋមន្ត្រី បន្ទាប់ពីការបោះឆ្នោតជាតិបាន ៣ ថ្ងៃ។
ការសម្ពោធដាក់ឲ្យប្រើប្រាស់ជាផ្លូវការនូវសេវាកម្មដឹកជញ្ជូនអ្នកដំណើរតាមផ្លូវទឹកនេះ គឺចេញពីតំបន់ឫស្សីកែវឆ្ពោះទៅកាន់ក្រុងតាខ្មៅ។
កាណូតដឹកជញ្ជូនអ្នកដំណើរចំនួន ៤ ដែលកាណូតនីមួយៗអាចផ្ទុកមនុស្សបាន ៦០ នាក់នេះបានបើកដំណើរការសាកល្បងចាប់តាំងពីថ្ងៃទី ៦ ខែមេសា ដោយមិនគិតថ្លៃ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ភ្នំពេញ-ប៉ុស្តិ៍ កាលពីថ្ងៃម្សិលមិញថាការកកស្ទះចរាចរណ៍ក្នុងទីក្រុងភ្នំពេញបានតម្រូវឲ្យក្រសួងធ្វើការសហការជាមួយនឹងសាលារាជធានីភ្នំពេញ បង្កើតនូវសេវាដឹកជញ្ជូនតាមផ្លូវទឹកនេះឡើង។
សេវាកម្មដឹកអ្នកដំណើរដែលប្រតិបត្តិការប្រចាំថ្ងៃនេះចេញដំណើរពីចំណតខណ្ឌឫស្សីកែវទៅក្រុងតាខ្មៅ និងពីក្រុងតាខ្មៅឆ្ពោះមកខណ្ឌឫស្សីកែវវិញ។
លោកបន្តថាសេវាកម្មនេះនឹងត្រូវតភ្ជាប់ទៅដល់ព្រែកព្នៅក្នុងពេលខាងមុខឆាប់ៗ ខណៈពេលនេះអាជ្ញាធរកំពុងស្វែងរកទីតាំងដើម្បីសាងសង់ផែ។
លោកថ្លែងថា៖ «កាណូតរបស់យើងបានធ្វើដំណើររៀងរាល់ថ្ងៃដោយចំណាយពេលប្រហែល ៤០ នាទីពីឫស្សីកែវទៅក្រុងតាខ្មៅ។ ការធ្វើដំណើរតាមផ្លូវទឹកនឹងរួមចំណែកកាត់បន្ថយការកកស្ទះក្នុងរាជធានីភ្នំពេញបានមួយកម្រិត»។
បើទោះយ៉ាងនេះក្តីចាប់តាំងពីដាក់ឲ្យដំណើរការមកហាក់មិនសូវមានអ្នកដំណើរច្រើនទេ ដោយមានអ្នកដំណើរជាមធ្យមត្រឹមជាង ១០ នាក់ប៉ុណ្ណោះក្នុងការជិះ ១ លើក។ នេះបើតាមការបញ្ជាក់ពីបុគ្គលិកម្នាក់ដែលបម្រើការនៅចំណតផ្សារចាស់។
បច្ចុប្បន្ននេះរដ្ឋាភិបាលកំពុងជំរុញការប្រើប្រាស់សេវាដឹកអ្នកដំណើរសាធារណៈដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ ដោយក្នុងនោះរាជរដ្ឋាភិបាលបានដាក់ឲ្យមានសេវារថយន្តក្រុងដឹកជញ្ជូនសាធារណៈ និងរថភ្លើងពីស្ថានីយរាជាយស្ម័យយានភ្នំពេញទៅកាន់ព្រលានយន្តហោះអន្តរជាតិភ្នំពេញជាដើម។
អ្នកស្រី ចាន់ ចរិយា វ័យ ៤០ ឆ្នាំដែលកំពុងអង្គុយរង់ចាំរថយន្តក្រុងនៅចំណតក្បែរមន្ទីរពេទ្យកាល់ម៉ែតកាលពីម្សិលមិញបានប្រាប់ថា អ្នកស្រីតែងធ្វើដំណើរតាមរថយន្តក្រុងទៅធ្វើការជារៀងរាល់ថ្ងៃ។
អ្នកស្រីបន្តថា៖ «បើទោះបីជាការធ្វើដំណើរតាមរថយន្តក្រុងត្រូវចំណាយពេលយូរ តែមានសុវត្ថិភាព និងមិនចំណាយប្រាក់ច្រើននោះទេ»។
បន្ទាប់ពីបើកឲ្យដំណើរការជាផ្លូវការកាលពីចុងឆ្នាំ ២០១៥ បច្ចុប្បន្នរថយន្តក្រុងរបស់រដ្ឋាករស្វយ័តដឹកជញ្ជូនសាធារណៈមានខ្សែរត់ចំនួន ៨ ក្នុងការភ្ជាប់តំបន់នានាក្នុងរាជធានីភ្នំពេញ និងចេញទៅផ្លូវជាតិទាំង ៦ ចាប់ពីម៉ោង ៥:៣០ នាទីរហូតដល់ម៉ោង ២០:៣០ នាទីជារៀងរាល់ថ្ងៃជាមួយនឹងរថយន្ត ១៥៥ គ្រឿង ដោយមានមនុស្សជិះជាង ២ ម៉ឺននាក់ក្នុង ១ ថ្ងៃ៕