.jpg)
កាតាចេញប័ណ្ណស្នាក់នៅដល់ជនបរទេស ជាថ្នូរនឹងវិនិយោគសម្រាប់ប្រទេសរបស់ខ្លួន។ សហការី
ក្រុងដូហាៈ ប្រព័ន្ធព័ត៌មានរដ្ឋកាតាបានរាយការណ៍ថា ប្រទេសកាតាបានប្រកាសកាលពីថ្ងៃចន្ទថា ខ្លួននឹងផ្ដល់ការអនុញ្ញាតស្នាក់នៅដល់ក្រុមវិនិយោគិនបរទេសជាលើកដំបូងដែលនេះជាវិធានការមួយក្នុងចំណោមវិធានការចុងក្រោយបំផុតជាបន្តបន្ទាប់ដែលបានធ្វើឡើងដើម្បីធ្វើពិពិធកម្មសេដ្ឋកិច្ច។
ទីភ្នាក់ងារព័ត៌មានរដ្ឋ Qatar News Agency របស់ប្រទេសនេះបានរាយការណ៍ថា ជនបរទេសដែលវិនិយោគ «មូលធន» ក្នុងកម្រិតមិនជាក់លាក់មួយក្នុងសេដ្ឋកិច្ចរបស់ប្រទេសកាតានឹងមានសិទ្ធិទទួលបានការអនុញ្ញាតឲ្យស្នាក់នៅក្នុងប្រទេសនេះរយៈពេល ៥ ឆ្នាំដែលអាចបន្តជាថ្មីបាន។
ក្រុមហ៊ុនអភិវឌ្ឍន៍អចលនទ្រព្យសកម្មក្នុងទីផ្សារអចលនទ្រព្យរបស់ប្រទេសកាតាក៏នឹងមានសិទ្ធិទទួលបានផលប្រយោជន៍ពីគម្រោងនេះផងដែរស្ថិតក្រោមច្បាប់ថ្មីនេះ។
កាលពីមុនក្រុមវិនិយោគិនត្រូវបានតម្រូវឲ្យទទួលបានការឧបត្ថម្ភពីក្រុមហ៊ុនរបស់កាតា ឬបុគ្គលជនជាតិកាតាដើម្បីទទួលការអនុញ្ញាតស្នាក់នៅ។
វិធានការនេះធ្វើឡើងក្នុងពេលមានវិបត្តិនយោបាយនៅក្នុងឈូងសមុទ្រពែក្ស ដោយប្រទេសកាតាស្ថិតក្រោមការធ្វើពហិការសេដ្ឋកិច្ច និងការទូតពីបណ្ដាប្រទេសជិតខាងក្នុងរយៈពេល ២ ឆ្នាំកន្លងមកនេះ។
កាតាដែលជាប្រទេសមានសេដ្ឋកិច្ចឈានមុខគេទី ៣ ក្នុងឈូងសមុទ្រពែក្ស ក៏បានស្វែងរកប្រាក់ចំណូលថ្មីៗផងដែរ ដើម្បីផ្ដល់ហិរញ្ញប្បទានដល់ឱនភាពថវិកាដោយសារតែការធ្លាក់ចុះតម្លៃប្រេងចាប់តាំងពីពាក់កណ្ដាលឆ្នាំ ២០១៤ មក។
កាលពីខែមករា ឆ្នាំ ២០១៨ ប្រទេសកាតាដែលសម្បូរឧស្ម័នបានប្រកាសច្បាប់ដែលអនុញ្ញាតឲ្យមានការវិនិយោគកាន់កាប់ ១០០ ភាគរយសម្រាប់ក្រុមវិនិយោគិនបរទេសនៅក្នុងវិស័យភាគច្រើននៃសេដ្ឋកិច្ចក្នុងគោលបំណងបង្កើនប្រាក់ចំណូលពីវិស័យមិនមែនថាមពល។
កាលពីមុនក្រុមវិនិយោគិនបរទេសអាចគ្រប់គ្រងកម្មសិទ្ធិត្រឹមតែ ៤៩ ភាគរយប៉ុណ្ណោះនៃក្រុមហ៊ុនដែលចុះបញ្ជីលើផ្សារហ៊ុនរបស់ប្រទេសកាតា។
ការកែទម្រង់កាលពីថ្ងៃចន្ទនេះ គឺជាកិច្ចខិតខំប្រឹងប្រែងចុងក្រោយបំផុតរបស់ប្រទេសកាតាដែលជាប្រទេសនាំចេញឧស្ម័នធម្មជាតិឈានមុខគេរបស់ពិភពលោក ដើម្បីទទួលបានប្រាក់ចំណូលថ្មីចាប់តាំងពីវិបត្តិឈូងសមុទ្រពែក្សបានកើតមានឡើងមក។
ប្រទេសអារ៉ាប៊ីសាអ៊ូឌីត ប្រទេសអេមីរ៉ាតអារ៉ាប់រួម បារ៉ែន និងអេហ្ស៊ីប បានកាត់ផ្ដាច់ទំនាក់ទំនងជាមួយប្រទេសកាតាកាលពីឆ្នាំ ២០១៧ ដោយចោទប្រកាន់ប្រទេសនេះពីបទជាប់ទាក់ទងនឹងក្រុមជ្រុលនិយម និងមានទំនាក់ទំនងជិតស្និទ្ធជាមួយប្រទេសអ៊ីរ៉ង់ដែលជាសត្រូវដ៏ជូរចត់ក្នុងតំបន់របស់ទីក្រុងរីយ៉ាដ។
ប៉ុន្តែទីក្រុងដូហាបានបដិសេធចំពោះការចោទប្រកាន់នេះ៕ LA
