ទីក្រុងដូហាៈ ក្រុមហ៊ុនអាកាសចរណ៍ Qatar Airways នៃប្រទេសកាតា បានឲ្យដឹងថា ខ្លួននឹងមិនទិញយន្តហោះថ្មីនៅឆ្នាំ ២០២០ និង ២០២១ នោះទេ ដោយពន្យារការបញ្ជាទិញជាមួយក្រុមហ៊ុនផលិតយន្តហោះ Boeing របស់អាមេរិក និង Airbus របស់អឺរ៉ុប។
ក្រុមហ៊ុនអាកាសចរណ៍ក្នុងតំបន់ឈូងសមុទ្រពែរ្ស៍ដែលហោះហើរទៅកាន់គោលដៅជាង ១៧០ ដែលមានយន្តហោះសរុប ២៣៤ គិតត្រឹមខែមីនាបានទទួលរងដោយសារការបិទអាកាសយានដ្ឋាន និងការហាមឃាត់ការធ្វើដំណើរដែលត្រូវបានដាក់ចេញដើម្បីទប់ស្កាត់ការរីករាលដាលនៃកូវីដ ១៩។
សមាគមដឹកជញ្ជូនផ្លូវអាកាសអន្តរជាតិបានឲ្យដឹងកាលពីខែមេសាថា ចរាចរណ៍ផ្លូវអាកាសក្នុងតំបន់មជ្ឈិមបូព៌ា និងអាហ្វ្រិកខាងជើងនឹងធ្លាក់ចុះជាងពាក់កណ្តាលក្នុងឆ្នាំនេះ។
លោក Akbar al-Baker នាយកប្រតិបត្តិនៃក្រុមហ៊ុនអាកាសចរណ៍ Qatar បានប្រាប់ថា៖ «យើងបានជូនដំណឹងដល់ក្រុមហ៊ុនទាំង ២ គឺ Boeing និង Airbus រួចហើយថា យើងនឹងមិនទទួលយកយន្តហោះណាមួយក្នុងឆ្នាំនេះ ឬឆ្នាំក្រោយនោះទេ»។
លោកបន្តថា៖ «រាល់យន្តហោះផ្សេងទៀតដែលយើងបានបញ្ជាទិញ ដែលត្រូវបានរំពឹងជញ្ជូនមកឲ្យយើងក្នុងរយៈពេល ២ ឆ្នាំ ឬ ៣ ឆ្នាំខាងមុខនោះ ពេលនេះនឹងត្រូវពន្យាររហូតដល់រយៈពេលយូរជិត ៨ ទៅ ១០ ឆ្នាំ»។
លោកនិយាយថា ប្រសិនបើចរាចរណ៍កើនឡើងដល់កម្រិតខ្ពស់ជាងការរំពឹងទុកយន្តហោះដែលត្រូវបានពន្យារអាចត្រូវបានទទួលយកមកវិញឆាប់។
ក្រុមហ៊ុននេះឲ្យដឹងថា បច្ចុប្បន្នខ្លួនកំពុងតែបម្រើការហោះហើរដល់គោលដៅសំខាន់ៗប្រហែល ៤០ ប៉ុណ្ណោះ។
ក្រុមហ៊ុនអាកាសចរណ៍ Qatar កំពុងប្រឹងជម្នះរួចជាស្រេចទៅហើយចំពោះអស្ថិរភាពហិរញ្ញវត្ថុដែលបានបង្ហាញពីការខាតបង់ ៦៣៩ លានដុល្លាររយៈពេល ១ ឆ្នាំដល់ខែមីនា ឆ្នាំ ២០១៩៕ RR