.jpg)
លោក Tamim bin Hamad Al-Thani និងលោក Erdogan ក្នុងជំនួបកាលពីម្សិលមិញ។ រូបថត AFP
ក្រុងអង់ការ៉ាៈ មន្ដ្រីរបស់ប្រទេសតួកគីឲ្យដឹងថាប្រទេសកាតាបានសន្យាកាលពីថ្ងៃពុធថានឹងវិនិយោគទឹកប្រាក់ ១៥ ពាន់លានដុល្លារនៅក្នុងប្រទេសតួកគី ដែលរងផលប៉ះពាល់យ៉ាងអាក្រក់ដោយសារវិបត្តិរូបិយប័ណ្ណក្នុងគ្រាដែលមានការជាប់គាំងផ្នែកការទូតកាន់តែខ្លាំងឡើងជាមួយអាមេរិក។
លោក Ibrahim Kalin អ្នកនាំពាក្យប្រធានាធិបតីតួកគីបានសរសេរលើបណ្តាញសង្គម Twitter ថា៖ «ប្រទេសកាតាបានសន្យាវិនិយោគផ្ទាល់ទឹកប្រាក់ ១៥ ពាន់លានដុល្លារនៅក្នុងប្រទេសតួកគី»។
លោកថ្លែងថា៖ «ទំនាក់ទំនងតួកគី និងកាតាបានពឹងផ្អែកលើមូលដ្ឋានដ៏រឹងមាំនៃមិត្តភាព និងសាមគ្គីភាពពិតប្រាកដ»។
សេចក្ដីប្រកាសនេះបានធ្វើឡើងបន្ទាប់ពីលោក Tamim bin Hamad Al-Thani មេដឹកនាំរបស់ប្រទេសកាតាបានពិភាក្សាក្នុងពេលបរិភោគអាហារថ្ងៃត្រង់ជាមួយនឹងលោកប្រធានាធិបតីតួកគី Recep Tayyip Erdogan។
ទីភ្នាក់ងារព័ត៌មានផ្លូវការរបស់តួកកី Anadolu បានរាយការណ៍ថាលោក Erdogan បានថ្លែងអំណរគុណដល់មេដឹកនាំ និងប្រជាជនរបស់កាតាសម្រាប់ «ការគាំទ្រតួកគី»។
លោកបានមានប្រសាសន៍ថា ទំនាក់ទំនងជាមួយប្រទេសកាតាដែលលោកបានហៅថាជា «ប្រទេសមិត្តភាព និងជាបងប្អូន» នឹងត្រូវបានជំរុញនៅក្នុងវិស័យជាច្រើន។
លោក Berat Albayrak រដ្ឋមន្ដ្រីក្រសួងហិរញ្ញវត្ថុតួកគីដែលជាកូនប្រសារបស់លោក Erdogan និងលោក Ali Sharif Al-Emadi សមភាគីរបស់លោកមានវត្តមាននៅក្នុងការចរចានេះនៅក្នុងទីក្រុងអង់ការ៉ា។
ប្រទេសតួកគីបានរងនូវការភ្ញាក់ផ្អើលក្នុងរយៈពេលជាច្រើនថ្ងៃថ្មីៗនេះដោយការធ្លាក់ចុះយ៉ាងខ្លាំងនៃតម្លៃរូបិយប័ណ្ណលីរ៉ារបស់ខ្លួន បន្ទាប់ពីលោកប្រធានាធិបតីអាមេរិក ដូណាល់ ត្រាំ បានសរសេរលើបណ្តាញសង្គម Twitter កាលពីថ្ងៃសុក្រសប្តាហ៍មុនថា ក្រុងវ៉ាស៊ីនតោនកំពុងបង្កើន ២ ដងនៃពន្ធនាំចូលលើអាលុយមីញ៉ូម និងដែកថែបសម្រាប់ទីក្រុងអង់ការ៉ា។
វិធានការរបស់ទីក្រុងវ៉ាស៊ីនតោនបានធ្វើឡើងក្នុងអំឡុងពេលកើតមានជម្លោះដែលកំពុងកើតឡើង ដោយសារប្រទេសតួកគីកំពុងចាប់ខ្លួនគ្រូគង្វាលសាសនាអាមេរិកកាលពី ២ ឆ្នាំមុន។
ជាការឆ្លើយតបលោក Erdogan បានអំពាវនាវឲ្យមានការធ្វើពហិការទិញទំនិញអេឡិចត្រូនិករបស់អាមេរិក ខណៈដែលទីក្រុងអង់ការ៉ាបានបង្កើនពន្ធនាំចូលខ្ពស់លើទំនិញអាមេរិកមួយចំនួន។
ភាពចលាចលបានបង្កើនការបារម្ភពីវិបត្តិសេដ្ឋកិច្ចនៅពេលឆាប់ៗនៅក្នុងប្រទេសតួកគី និងបានបណ្ដាលឲ្យមានការប្រកាសអាសន្នថា ក្រុមវិនិយោគិនបរទេសនៅក្នុងប្រទេសនេះរួមទាំងប្រទេសកាតាអាចត្រូវរងផលប៉ះពាល់ ដោយសារលទ្ធផលនេះ។
ប្រទេសតួកគី និងកាតាដែលជាសម្ព័ន្ធមិត្តដ៏ជិតស្និទ្ធបំផុតរបស់អាមេរិកបានក្លាយជាដៃគូសេដ្ឋកិច្ច និងដៃគូនយោបាយជិតស្និទ្ធក្នុងពេលថ្មីៗនេះ។
តួលេខផ្លូវការបានបង្ហាញកាលពីខែមុនថាទីក្រុងដូហាមានការវិនិយោគក្នុងតម្លៃ ២០ ពាន់លានដុល្លារនៅតួកគីហើយទីក្រុងអង់ការ៉ាពេលនេះបានក្លាយជាប្រទេសនាំចេញមួយក្នុងចំណោមអ្នកនាំចេញឈានមុខគេទៅកាតា៕ LA
