.jpg)
យន្តហោះរបស់ក្រុមហ៊ុនអាកាសចរណ៍ Qatar Airways ដែលចតនៅព្រលានយន្តហោះមួយនៅបារាំង។ រូបថត AFPs
ភ្នំពេញៈ ក្រុមហ៊ុនអាកាសចរណ៍ កាតាអ៊ែរវ៉េ (Qatar Airways) នឹងដំណើរការផ្លូវហោះហើរត្រង់ថ្មីមួយរវាងទីក្រុងដូហា ប្រទេសកាតា និងខេត្តសៀមរាប ដើម្បីចាប់យកសក្ដានុពលទេសចរណ៍នៅទីនោះដែលមន្ដ្រីបានឲ្យដឹងថា ផ្លូវហោះហើរត្រង់នេះនឹងរួមចំណែកបង្កើនការមកដល់ទេសចរបរទេសដែលបានធ្លាក់ចុះកាលពីឆ្នាំមុន។
សេចក្ដីប្រកាសព័ត៌មានបានពីក្រុមហ៊ុន VINCI Airports ដែលទទួលបានសម្បទានអភិវឌ្ឍព្រលានយន្តហោះនៅប្រទេសកម្ពុជាបានឲ្យដឹងថា ព្រលានយន្តហោះ Lyon-Saint Exupéry airport (ប្រទេសបារាំង) និងព្រលានយន្តហោះអន្តរជាតិសៀមរាបកម្ពុជាក្នុងពេលឆាប់ៗនឹងស្វាគមន៍ផ្លូវហោះហើរត្រង់ថ្មីទៅទីក្រុងដូហារបស់ប្រទេសកាតា។
ក្រុមហ៊ុននេះបានឲ្យដឹងថា សេចក្ដីប្រកាសត្រូវបានធ្វើឡើងដោយក្រុមហ៊ុនអាកាសចរណ៍ Qatar Airways នៅក្នុងពិព័រណ៍អាកាសចរណ៍នៅប្រទេសកូវ៉ែត។ ផ្លូវហោះហើរទាំង ២ នេះនឹងត្រូវបម្រើជើងហោះហើរមួយប្រចាំសប្ដាហ៍ ៥ ដងជាមួយនឹងទីក្រុងលីយ៉ុង និងទីក្រុងដូហាដែលចាប់ផ្ដើមនៅថ្ងៃទី ២៣ ខែមិថុនា និងសៀមរាប និងទីក្រុងដូហានៅថ្ងៃទី ១៦ ខែវិច្ឆិកា ឆ្នាំ ២០២០។
ក្រុមហ៊ុនបន្តថា៖ «ផ្លូវហោះហើរថ្មីសៀមរាបដូហានឹងបន្តបង្កើនសម្ទុះភ្ញៀវទេសចរមកប្រាសាទអង្គរវត្ត ដែលជាតំបន់បេតិកភណ្ឌពិភពលោករបស់អង្គការយូណេស្កូ»។
លោក Alain Brun អគ្គនាយកក្រុមហ៊ុន Cambodia Airports ដែលជាក្រុមហ៊ុនអភិវឌ្ឍន៍ និងគ្រប់គ្រងព្រលានយន្តហោះអន្តរជាតិ ៣ នៅក្នុងប្រទេសកម្ពុជាបានឲ្យដឹងថា ផ្លូវហោះហើរថ្មីនេះនឹងរួមចំណែកដល់ឧស្សាហកម្មទេសចរណ៍នៅសៀមរាប និងផ្ដល់ទិសដៅកាន់តែច្រើននៃជម្រើសសម្រាប់អ្នកដំណើរ។
លោកថ្លែងថា៖ «សេវាថ្មីនេះនឹងរួមចំណែកក្នុងការបង្កើនជាថ្មីទិសដៅសៀមរាបដោយការបង្កើនការតភ្ជាប់បន្ថែមទៀត និងការផ្ដល់ដល់អ្នកដំណើរនូវជម្រើសការធ្វើដំណើរកាន់តែច្រើន»។
លោក តុប សុភ័ក្ត អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្ដិ៍កាលពីម្សិលមិញថា ទន្ទឹមនឹងនេះការមកដល់ភ្ញៀវទេសចរបរទេសមកកាន់សៀមរាបបានធ្លាក់ចុះ ១៥ ភាគរយ កាលពីឆ្នាំមុន ផ្លូវហោះហើរថ្មីដែលតភ្ជាប់ទៅទីក្រុងដូហានឹងជាការរួមចំណែកផ្សេងទៀតសម្រាប់ការទាក់ទាញភ្ញៀវទេសចរកាន់តែច្រើន។
លោកបានបញ្ជាក់ទៀតថា៖ «ទិសដៅថ្មីនេះច្បាស់ណាស់នឹងជួយទាក់ទាញមិនគ្រាន់តែភ្ញៀវទេសចរកាន់តែច្រើនប៉ុណ្ណោះទេ ប៉ុន្តែថែមទាំងការវិនិយោគផងដែរ។ វាក៏ជួយកាត់បន្ថយពេលវេលា និងការចំណាយអ្នកដំណើរផងដែរ»។
កាលពីឆ្នាំមុន ប្រទេសកម្ពុជាបានស្វាគមន៍ភ្ញៀវទេសចរបរទេសប្រហែល ៦,៧ លាននាក់បានកើនឡើង ៨ ភាគរយធៀបនឹងឆ្នាំ ២០១៨។ នេះបើយោងតាមទិន្នន័យបឋមបានពីលោក សុភ័ក្ដ៕LA
