.jpg)
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន ថ្លែងកាលពីពេលកន្លងទៅ។ រូបថត ក្រសួងសាធារណការ និងដឹកជញ្ជូន
ភ្នំពេញៈ ក្រសួងសាធារណការ និងដឹកជញ្ជូនបានឲ្យដឹងថា គម្រោងសាងសង់ផ្លូវ និងស្ពានឆ្លងកាត់ទន្លេសាបពីខេត្តកំពង់ឆ្នាំងទៅខេត្តកំពង់ធំនឹងអាចចាប់ផ្តើមនៅក្នុងអំឡុងឆ្នាំ ២០២១ ខណៈការសិក្សាពីលក្ខណៈបច្ចេកទេសត្រូវបានបញ្ចប់រួចរាល់ហើយ។
គម្រោងសាងសង់ផ្លូវតភ្ជាប់ពីស្រុកកំពង់លែង ខេត្តកំពង់ឆ្នាំងទៅកាន់ក្រុងស្ទឹងសែនខេត្តកំពង់ធំមានចម្ងាយសរុប ៥៧,៣ គីឡូម៉ែត្រ ដោយមានការសាងសង់ស្ពានកាត់ទន្លេសាបប្រវែង ៣ ៩០០ ម៉ែត្រផងនោះត្រូវបានលោកនាយករដ្ឋមន្ត្រី ហ៊ុន សែន ប្រកាសកាលពីពាក់កណ្តាលខែមីនា ឆ្នាំ ២០១៩។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនកាលពីម្សិលមិញបានប្រាប់ភ្នំពេញប៉ុស្តិ៍ ថាការងារបច្ចេកទេសត្រូវបានបញ្ចប់រួចរាល់ហើយ ដោយពេលនេះក្រសួងសាធារណការ និងដឹកជញ្ជូនកំពុងពិភាក្សាជាមួយក្រសួងសេដ្ឋកិច្ច និងហិរញ្ញវត្ថុមុននឹងយកទៅពិភាក្សាជាមួយភាគីចិន។ លោកបន្តថា ផ្លូវនេះនឹងប្រើប្រាស់ថវិកាមួយចំនួនរបស់រដ្ឋាភិបាលកម្ពុជា និងកម្ចីពីរដ្ឋាភិបាលប្រទេស ចិន។
លោកបន្តថា តាមគម្រោងរដ្ឋាភិបាលនឹងសាងសង់ផ្លូវអាទិភាពតភ្ជាប់មួយចំនួនជាមុនសិន។ លោកបានថ្លែងថា៖ «ដោយសារផ្លូវជាតិលេខ ១០ និងផ្លូវមួយចំនួនទៀតដូចជាផ្លូវលេខ ៤១ និងផ្លូវលេខ ៣៣ ជាអាទិភាពមុននោះ ដូច្នេះការសាងសង់ផ្លូវនេះអាចនឹងធ្វើឡើងក្នុងឆ្នាំ ២០២១»។
តាមលោក សុរិយា ផ្លូវជាតិលេខ ១០ ដែលតភ្ជាប់ពីខេត្តបាត់ដំបងទៅកាន់ខេត្តកោះកុងដោយឆ្លងកាត់ខេត្តពោធិ៍សាត់នេះអាចនឹងត្រូវចាប់ផ្តើមបើកការដ្ឋានសាងសង់នៅក្នុងឆ្នាំ ២០១៩ នេះ។
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនធ្លាប់បាននិយាយថា គម្រោងនេះនឹងចំណាយទឹកប្រាក់ប្រមាណ ២០០ លានដុល្លារដែលអាចជាប្រាក់ខ្ចីពីប្រទេសចិន។
អភិបាលខេត្តកំពង់ឆ្នាំងលោក ឈួរ ច័ន្ទឌឿន បានប្រាប់ថា ការអភិវឌ្ឍនេះជាការតភ្ជាប់ផ្លូវដឹកជញ្ជូនដ៏សំខាន់សម្រាប់គោលបំណងពាណិជ្ជកម្ម កសិកម្ម និងទេសចរណ៍។
លោកបន្តថានេះជាផ្លូវរបៀងរាជធានីភ្នំពេញដែលតភ្ជាប់ពីតំបន់ភាគខាងជើងប្រទេសទៅកាន់ភាគខាងត្បូងដោយឆ្លងកាត់ទន្លេសាប។
លោកថ្លែងថា៖ «តាមរយៈផ្លូវឆ្លងកាត់ទន្លេសាបនេះ វានឹងចូលរួមចំណែកយ៉ាងច្រើនក្នុងកំណើនសេដ្ឋកិច្ចជាតិ ជាពិសេសខេត្តកំពង់ឆ្នាំង និងកំពង់ធំលើវិស័យទេសចរណ៍ ការដឹកជញ្ជូនផលិតផលកសិកម្ម និងអចលនទ្រព្យ»។
លោកបានប្រាប់ទៀតថា ការសាងសង់ផ្លូវនេះនឹងមិនសូវមានផលប៉ះពាល់ច្រើនចំពោះទ្រព្យសម្បត្តិឯកជនទេ ព្រោះភាគច្រើនជាដីតំបន់លិចទឹកដែលជាសម្បត្តិរដ្ឋ៕ LA
