.jpg)
វិភាគដោយ៖ លោក ឡុង សំណាង/ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល ។
ក្នុងអំឡុងប៉ុន្មានសប្តាហ៍ចុងក្រោយនេះ តម្លៃមាសបានបំបែកនូវតម្លៃ ១ ៩២១ ដុល្លារអាមេរិកក្នុង ១ អោនស៍ដែលជាតម្លៃខ្ពស់បំផុតក្នុងប្រវត្តិសាស្ត្ររបស់មាស។ បច្ចុប្បន្នតម្លៃមាសក្នុងទីផ្សារកំពុងស្ថិតនៅក្នុងតម្លៃ ១ ៩៨៤ ដុល្លារអាមេរិកក្នុង ១ អោនស៍។
បើសង្កេតទៅលើបម្រែបម្រួលនៃគម្លាតថ្លៃនៃរូបិយប័ណ្ណ លោហធាតុមានតម្លៃ ប្រេងឆៅ សន្ទស្សន៍ភាគហ៊ុន ព្រមទាំងផលិតផលវិនិយោគផ្សេងទៀត យើងនឹងឃើញថា ឱកាសដ៏មានតម្លៃជាច្រើនកំពុងត្រូវបានទាញយកដោយវិនិយោគិនក្នុងទីផ្សារឧបករណ៍និស្សន្ទ។ ជាក់ស្ដែងដូចដែលបានជ្រាបហើយថា ករណីកើនឡើងនៃមេរោគកូវីដ១៩ កំពុងរុញច្រានឲ្យមានការធ្លាក់ចុះនៃសេដ្ឋកិច្ចរបស់ប្រទេសនានា។
ដោយឡែកសម្រាប់សហរដ្ឋអាមេរិកដែលបច្ចុប្បន្នកំពុងរងនូវផលប៉ះពាល់ខ្លាំងបំផុតនោះបានបង្ហាញនូវការធ្លាក់ចុះនូវសេដ្ឋកិច្ចយ៉ាងខ្លាំងតាមរយៈការចេញផ្សាយនូវទិន្នន័យសេដ្ឋកិច្ចរបស់ខ្លួនសម្រាប់រយៈពេលចុងក្រោយនេះ។ ថ្មីៗនេះ ផលិតផលក្នុងស្រុកសរុប (GDP) សម្រាប់ត្រីមាសទី ២ នេះមានការធ្លាក់ចុះចំនួន ៣២,៩% បន្ថែមទៀត ធៀបនឹងត្រីមាសទី ១។
ម្យ៉ាងវិញទៀតចាប់ពីខែមិថុនាមកដល់បច្ចុប្បន្ន ផលិតកម្មប្រេងឆៅក៏មានការធ្លាក់ចុះខ្លាំងក្នុងចន្លោះពី ២ លានបារ៉ែល ទៅ ១០ លានបារ៉ែលក្នុង ១ ថ្ងៃ ហើយបើធៀបទៅនឹងខែមេសា ឆ្នាំ ២០២០ គឺមានការធ្លាក់ចុះរហូតដល់ ១២ លានបារ៉ែល។
ជាដំណោះស្រាយ រដ្ឋាភិបាលអាមេរិកបានចេញនូវគោលនយោបាយចាក់បញ្ចូលសាច់ប្រាក់ទៅក្នុងសេដ្ឋកិច្ចតាមរយៈការទិញនូវបណ្ណបំណុលក្នុងតំបន់មួយចំនួនក្នុងគោលបំណងលើកស្ទួយសេដ្ឋកិច្ចក្នុងស្រុកឲ្យមានការងើបត្រឡប់មកវិញ។ ពាក់ព័ន្ធនឹងព្រឹត្តិការណ៍នយោបាយ សហរដ្ឋអាមេរិកកំពុងខិតជិតដល់នូវការបោះឆ្នោតអាណត្តិទី ២ នៃប្រធានាធិបតី ដែលគណៈបក្សនយោបាយកំពុងពិភាក្សានូវគម្រោងចាក់បញ្ចូលសាច់ប្រាក់ទៅក្នុងទីផ្សារក្នុងទំហំសាច់ប្រាក់ប្រមាណ ២,២ ទ្រីលានដុល្លារអាមេរិកតាមរយៈការទិញនូវបណ្ណរតនាគារ និងបណ្ណបំណុលអចលនទ្រព្យ។
ផ្អែកទៅលើការវិភាគតាមព័ត៌មានខាងលើនេះក្នុងខែសីហានេះ តម្លៃនៃប្រាក់ដុល្លារអាមេរិកនឹងបន្តធ្លាក់ចុះ តម្លៃមាសនឹងបន្តកើនឡើងរហូតដល់ ២ ០០០ ទៅ ២ ១០០ ដុល្លារអាមេរិកក្នុង ១ អោនស៍៕
