.jpg)
អេក្រង់បង្ហាញសន្ទស្សន៍ហ៊ុននៅផ្សារហ៊ុន Euronext Paris ក្នុងទីក្រុងប៉ារីស។ រូបថត AFP
ក្រុងប៉ារីសៈ អត្រាការប្រាក់កម្ចីសម្រាប់ប្រទេសស្ថិតនៅភាគខាងត្បូងក្នុងតំបន់ប្រើប្រាស់អឺរ៉ូ បានកើនឡើងកាលពីថ្ងៃចន្ទ ខណៈវិបត្តិក្នុងប្រទេសតួគកី បានប៉ះពាល់ដល់អារម្មណ៍ទទួលយកហានិភ័យរបស់វិនិយោគិន ដែលក៏កំពុងសម្លឹងមើលយ៉ាងប្រឹងប្រយ័ត្នទៅកាន់ប្រទេសអុីតតាលីផងដែរ។
ការធ្លាក់ថ្លៃខ្លាំងនៃរូបិយប័ណ្ណ លីរ៉ា របស់ប្រទេសតួកគីបានបង្កផលប៉ះពាល់ហួសពីព្រំដែនរបស់ប្រទេសនេះ ខណៈវិនិយោគិនបានរត់គេចចេញពីកាន់កាប់រូបិយប័ណ្ណរបស់ប្រទេសកំពុងអភិវឌ្ឍន៍ខ្លាំងនានាទៅកាន់កាប់ទ្រព្យដែលមានសុវត្ថិភាពជាងនេះវិញ ខណៈតម្លៃភាគរហ៊ុនរបស់ធនាគារនៅអឺរ៉ុប ដែលមានសាខាក្នុងប្រទេសតួកគីបានរងប៉ះពាល់។
ការគេចចេញពីហានិភ័យនេះ ក៏បានចាប់ផ្តើមប៉ះពាល់ផងដែរលើអត្រាប្រាក់កម្ចីក្នុងប្រទេសដែលស្ថិតនៅភាគខាងត្បូងក្នុងតំបន់ប្រើប្រាស់អឺរ៉ូ ជាពិសេសប្រទេសអុីតាលី ដែលរដ្ឋាភិបាលចម្រះដែលគ្រប់គ្រងដោយអ្នកនយោបាយប្រជានិយម កំពុងរៀបចំកញ្ចប់ថវិកាដំបូងរបស់ខ្លួន។
គិតត្រឹមម៉ោង ១២ ម៉ោងសកលកាលពីម្សិលមិញ អត្រាការប្រាក់សម្រាប់មូលបត្របំណុលរដ្ឋាភិបាលអុីតាលីដែលមានអាយុកាល ១០ ឆ្នាំ ក្នុងការជួញដូរនៅទីផ្សារបន្ទាប់ បានកើនឡើងដល់ ៣,០៨២ ភាគរយពី ២,៩៩៣ ភាគរយកាលពីថ្ងៃសុក្រសប្តាហ៍មុន។
ទិន្នផលលើមូលបត្របំណុលរដ្ឋាភិបាលអេស្ប៉ាញដែលមានអាយុកាល ១០ ឆ្នាំ បានកើនឡើងដល់ ១,៥០៥ ភាគរយពី ១,៤០៧ ភាករយ ខណៈមូលបត្របំណុលរដ្ឋាភិបាលព័រទុយហ្កាល់ដែលមានអាយុកាល ១០ ឆ្នាំ បានកើនឡើងដល់ ១,៨៦៤ ភាគរយពី ១,៧៧៨ ភាគរយ។
មូលបត្របំណុលរដ្ឋាភិបាលបារាំងដែលមានអាយុកាល ១០ ឆ្នាំ បានកើនឡើងដល់ ០,៦៨៤ ភាគរយពី ០,៦៧០ ភាគរយ ខណៈមូលបត្របំណូលរបស់អាល្លឺម៉ង់កើនឡើងដែលជាមូលបត្រគោលនៅតំបន់ប្រើប្រាស់ប្រាក់អឺរ៉ូ និងជាទ្រព្យដែលមានសុវត្ថិភាពនោះ បានធ្លាក់ចុះដល់ ០,៣០៨ ភាគរយពី ០,៣១៧ ភាគរយ៕ AFP/KC
