ភ្នំពេញៈ កម្ពុជាទំនងមានលទ្ធភាពច្រើននៅក្នុងការបង្កើតកិច្ចព្រមព្រៀងពាណិជ្ជកម្មសេរីជាមួយនឹងសហភាពសេដ្ឋកិច្ចអឺរ៉ុប-អាស៊ី (EAEU) ស្របពេលការចរចាកិច្ចព្រមព្រៀងនេះបានបង្ហាញសញ្ញាវិជ្ជមានបណ្តើរៗ។ នេះបើយោងតាម លោក ស៊ាង ថៃ អ្នកនាំពាក្យក្រសួងពាណិជ្ជកម្ម។
EAEU ជាសហព័ន្ធសេដ្ឋកិច្ចដែលតំណាងឱ្យប្លុកប្រទេសចំនួន ៥ រួមមាន រុស្ស៊ី អាមេនី បេឡារុស កាហ្សាក់ស្ថាន និងកៀហ្ស៊ីស៊ីស្ថាន ដែលមានប្រជាជនសរុបជាង ១៨៤,៥៧ លាននាក់ ក្នុងឆ្នាំ ២០២០ និងមានផលិតផលក្នុងស្រុក GDP សរុបរួមគ្នាប្រមាណ ៤,៧៧៨ ពាន់ពាន់លានដុល្លារ។
លោក ស៊ាង ថៃ បានប្រាប់ ភ្នំពេញ ប៉ុស្តិ៍ថា បន្ទាប់ពីបញ្ចប់ការចរចាកិច្ចព្រមព្រៀងពាណិជ្ជកម្មសេរីជាមួយប្រទេសចិន និងកូរ៉េខាងត្បូង ក្រុមចរចាអន្តរក្រសួងកម្ពុជាកំពុងបន្តការចរចាជាមួយ EAEU ក្នុងចំណោមការចរចាជាមួយបណ្តាប្រទេសមួយចំនួនទៀត រួមមាន អាមេរិក អង់គ្លេស ជប៉ុន ម៉ុងហ្គោលី និងឥណ្ឌា។
លោកនិយាយថា៖ «យើងមិនទាន់អាចវាយតម្លៃថា ប្រទេសណានឹងមានលទ្ធភាពមុនគេទេ ព្រោះបើក្រុមណារកឃើញថា វានឹងផ្តល់ផលចំណេញ ក្រុមនោះនឹងរាយការណ៍ ដើម្បីសុំការសម្រេចពីរដ្ឋាភិបាល (ប្រទេសទាំងសងខាង) ដើម្បីបើកការចរចា»។
កម្ពុជា និងកូរ៉េខាងត្បូងកាលពីថ្ងៃទី ៣ ខែ កុម្ភៈ ឆ្នាំ ២០២១ បានឯកភាពគ្នាបញ្ចប់កិច្ចចរចាកិច្ចព្រមព្រៀងពាណិជ្ជកម្មសេរីទ្វេភាគី (CKFTA) ដោយរំពឹងថានឹងចុះហត្ថលេខានៅពាក់កណ្តាលឆ្នាំនេះ ខណៈកិច្ចព្រមព្រៀងពាណិជ្ជកម្មសេរីកម្ពុជា-ចិននឹងអនុវត្តជាធរមាននៅឆ្នាំនេះដោយរង់ចាំការអនុម័តពីរដ្ឋសភានៃភាគីទាំង ២ តែប៉ុណ្ណោះ។
រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ ក្នុងកម្មវិធីបញ្ចប់កិច្ចព្រមព្រៀងពាណិជ្ជកម្មសេរីកម្ពុជា-កូរ៉េកាលពីខែមុន បាននិយាយថា ពេលនេះកម្ពុជាកំពុងជំរុញការសិក្សាដើម្បីឈានទៅការបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសមួយចំនួនរួមទាំង EAEU។
លោកថ្លែងថា៖ «យើងបានជួបចរចាជាមួយប្រទេសខ្លះៗហើយពីការរៀបចំឱ្យមានកិច្ចព្រមព្រៀងពាណិជ្ជកម្មសេរី។ យើងមានឆន្ទៈចង់បើកទីផ្សារកម្ពុជាឱ្យបានទូលំទូលាយជូនប្រជាពលរដ្ឋយើងដើម្បីអាចនាំចេញផលិតផល និងដើម្បីធ្វើឱ្យមានតុល្យភាពជញ្ជីងពាណិជ្ជកម្ម ដូច្នេះយើងប្រឹងប្រែងទាំងអស់គ្នាដើម្បីឱ្យសម្រេចបានលទ្ធផលល្អ»។
លោក លឹម ហេង អនុប្រធានសភាពាណិជ្ជកម្មកម្ពុជាកាលពីខែមុនបាននិយាយថា EAEU ជាក្រុមប្រទេសមានប្រជាជនច្រើន និងមានសេដ្ឋកិច្ចរីកចម្រើន ហេតុនេះវាជាទីផ្សារគោលដៅដ៏សំខាន់សម្រាប់ទំនិញកម្ពុជាដែលត្រូវខិតខំចាប់យកចំណែកទីផ្សារនេះឱ្យបានច្រើនបន្ថែមទៀត។
ផលិតផលដែលកម្ពុជានាំចេញទៅ EAEU មានភាគច្រើនជាផលិតផលកសិកម្ម និងវាយនភណ្ឌ ចំណែកផលិតផលនាំពី EAEU មានគ្រឿងម៉ាស៊ីន ត្រាក់ទ័រ និងគ្រឿងបន្លាស់យានយន្តកសិកម្ម។ នេះបើតាមលោក លឹម ហេង។
ទិន្នន័យក្រសួងពាណិជ្ជកម្មបង្ហាញថា ក្នុងឆ្នាំ ២០២០ ពាណិជ្ជកម្មកម្ពុជា និង EAEU មានតម្លៃសរុប ៦៧,៣៧ លានដុល្លារ កើនឡើង ១៨,២២ ភាគរយ បើធៀបនឹងឆ្នាំ ២០១៩ ដែលមាន ៥៦,៩៨ លានដុល្លារ។
ទិន្នន័យឱ្យដឹងទៀតថា ក្នុងនោះកម្ពុជាបាននាំចេញក្នុងតម្លៃ ៥២,១៩ លានដុល្លារកើន ០,៧៣ ភាគរយពីចំនួន ៥១,៨១ លានដុល្លារកាលពីឆ្នាំ ២០១៩ ខណៈការនាំពី EAEU មកកម្ពុជាមានតម្លៃ ១៥,១៨ លានដុល្លារ កើនឡើង ១៩៣,៥៧ ភាគរយ ពីចំនួន ៥,១៧ លានដុល្លារ៕LA