.jpg)
ប៉េកាំងៈ ក្រសួងពាណិជ្ជកម្មរបស់ប្រទេស ចិន បានឲ្យដឹងកាលពីថ្ងៃព្រហស្បតិ៍ថា មន្ដ្រីជាន់ខ្ពស់អាមេរិកនឹងធ្វើដំណើរមកទីក្រុងប៉េកាំងសម្រាប់ការចរចាសង្គ្រាមពាណិជ្ជកម្មជុំថ្មីមួយនៅថ្ងៃទី ២៨ និងថ្ងៃទី ២៩ ខែ មីនា បន្ទាប់មកនឹងមានដំណើរទៅកាន់អាមេរិកវិញដោយអ្នកចរចាជាន់ខ្ពស់របស់ចិននៅខែមេសា។
ដំណើរទស្សនកិច្ចទៅវិញទៅមកនេះ ដោយសារតែទីក្រុងវ៉ាស៊ីនតោន និងទីក្រុងប៉េកាំងនឹងត្រូវតែតស៊ូសម្រេចឲ្យបានកិច្ចព្រមព្រៀងពាណិជ្ជកម្មចុងក្រោយមួយ ជាមួយនឹងការទាមទាររបស់មន្ដ្រីអាមេរិកឲ្យមានការផ្លាស់ប្តូរច្រើនចំពោះគោលនយោបាយឧស្សាហកម្មរបស់ប្រទេស ចិន។
លោក Gao Feng អ្នកនាំពាក្យក្រសួងពាណិជ្ជកម្មបានឲ្យដឹងនៅក្នុងសន្និសីទខ្លីប្រចាំសប្ដាហ៍មួយថា លោក Robert Lighthizer តំណាងពាណិជ្ជកម្ម និងលោក Steven Mnuchin រដ្ឋមន្ដ្រីក្រសួងហិរញ្ញវត្ថុរបស់អាមេរិក នឹងមកទៅទីក្រុងប៉េកាំងនៅសប្ដាហ៍ក្រោយ។
បន្ទាប់ពីដំណើរទស្សនកិច្ចរបស់ពួកគេ លោក Liu He ឧបនាយករដ្ឋមន្ដ្រីរបស់ប្រទេស ចិន នឹងធ្វើដំណើរទៅអាមេរិកនៅខែមេសា ដើម្បីបន្តការចរចា។ នេះបើយោងតាមលោក Gao។
លោកប្រធានាធិបតីអាមេរិក ដូណាល់ ត្រាំ បានព្រមានកាលពីថ្ងៃព្រហស្បតិ៍ថា ពន្ធនាំចូលទំនិញចិនមកកាន់អាមេរិកអាចបន្តដាក់ឲ្យដំណើរការ «ក្នុងរយៈពេលដ៏សំខាន់មួយ» ដែលនឹងកាត់បន្ថយក្ដីសង្ឃឹមថា កិច្ចព្រមព្រៀងពន្ធនាំចូលទាំងនេះនឹងត្រូវលុបចោល។
ក្នុងរយៈពេល៨ ខែចុងក្រោយនេះ អាមេរិក និងចិនបានហូតពន្ធនាំចូលលើពាណិជ្ជកម្មទំនិញទ្វេភាគីមានតម្លៃជាង ៣៦០ ពាន់លានដុល្លារ ដែលដាក់សម្ពាធលើវិស័យផលិតកម្មប្រទេសទាំង ២៕ AFP/LA
