ក្រុងវ៉ាស៊ីនតោនៈ ប្រធានក្រុមចរចារបស់ទីក្រុងវ៉ាស៊ីនតោនបាននិយាយកាលពីថ្ងៃពុធថា ការចរចាពាណិជ្ជកម្មរបស់សហរដ្ឋអាមេរិក និងសហភាពអឺរ៉ុប និងអង់គ្លេសបានជាប់គាំងជាផ្នែកមួយបណ្តាលមកពីការសង្ស័យនៃស្តង់ដាម្ហូបអាហារអាមេរិកគ្មានសុវត្ថិភាព។
លោក Robert Lighthizer តំណាងពាណិជ្ជកម្មអាមេរិកបានប្រាប់តំណាងរាស្ត្រនៅវិមានរដ្ឋសភា Capitol Hill ថា៖ «ខ្ញុំគិតថាមានការចង់បានធ្វើរឿងនេះឲ្យសម្រេច ប៉ុន្តែសម្រាប់ហេតុផលអ្វីក៏ដោយ យើងមិនសម្រេចបានការរីកចម្រើនច្រើននោះទេ»។
លោកបន្តទៀតថា៖ «មានការយល់ឃើញនៅក្នុងតំបន់អឺរ៉ុប ដែលខ្ញុំគិតថា ត្រូវបានគេចែករំលែកដោយសង្ឃឹមថាមិនកើតមានច្រើននៅអង់គ្លេសនោះទេ ពេលដែលអង់គ្លេសនៅជាមួយអឺរ៉ុប ដែលថាម្ហូបអាហារអាមេរិកគ្មានសុវត្ថិភាព»។
លោកក៏បានអះអាងដែរថា៖ «មានរឿងលំបាកៗជាច្រើនជាមួយអឺរ៉ុប និងនឹងកាន់តែលំបាកជាមួយអង់គ្លេស។ ខ្ញុំក៏សង្ឃឹមផងដែរថា យើងនឹងធ្វើការងារតាមមធ្យោបាយរបស់យើងជម្នះរឿងនេះ»។
លោក Lighthizer បានប្រាប់សមាជិកសភាថា សហរដ្ឋអាមេរិកមានផលិតផលកសិកម្មល្អបំផុតក្នុងពិភពលោក ព្រមទាំងសុវត្ថិភាពបំផុត និងស្តង់ដាខ្ពស់បំផុត។
លោកនិយាយថា៖ «ខ្ញុំគិតថា យើងមិនគួរយល់ច្រឡំវិទ្យាសាស្ត្រជាមួយចំណូលចិត្តរបស់អ្នកប្រើប្រាស់នោះទេ»។
លោកនិយាយថា កសិកម្មជាចំណុចគន្លឹះសំខាន់បំផុតនៃការចរចាពាណិជ្ជកម្មថ្មីៗនេះ ហើយវាជាចំណុចឈ្នះធំណាស់សម្រាប់ប្រជាជនអាមេរិកក្នុងកិច្ចព្រមព្រៀងពាណិជ្ជកម្មសេរីអាមេរិក-ម៉ិកស៊ិក-កាណាដា (USMCA) និង ក្នុងកិច្ចព្រមព្រៀងដែលសម្រេចបានជាមួយ ចិន និងជប៉ុនផងដែរ។
លោកបានព្រមានថា ទោះបីយ៉ាងណាជាមួយនឹងអង់គ្លេស «យើងនឹងមានបញ្ហាច្រើនផ្នែក កសិកម្ម» ក្នុងការចរចា។
លោក Lighthizer បានប្តេជ្ញាថានឹងគ្មានការសម្រួលណាមួយចំពោះការនាំចេញកសិកផលអាមេរិកទេ។
ការចរចាពាណិជ្ជកម្មអាមេរិក អឺរ៉ុបបានជាប់គាំងរយៈពេលជាច្រើនខែ ដែលខ្ទាស់ជាប់ដោយជម្លោះជុំវិញការឧបត្ថម្ភធនដល់ក្រុមហ៊ុនយន្តហោះ Boeing របស់អាមេរិក និង Airbus នៅក្នុងតំបន់អឺរ៉ុប និងការយកពន្ធឌីជីថលព្រមទាំងកសិកម្ម។
កាលពីដើមខែឧសភា អង់គ្លេស និងសហរដ្ឋអាមេរិកចាប់ផ្តើមចរចាសម្រាប់កិច្ចព្រមព្រៀងពាណិជ្ជកម្មសេរីដ៏មានមហិច្ឆតា ដើម្បីអនុវត្តបន្ទាប់ពីរយៈពេលនៃការផ្លាស់ប្តូរបណ្តោះអាសន្នក្រោយការចាកចេញពីតំបន់អឺរ៉ុបរបស់អង់គ្លេសនៅចុងឆ្នាំនេះ។
ពន្ធខ្ពស់របស់អង់គ្លេសលើវិស័យបច្ចេកវិទ្យាអាមេរិក ក៏ជាចំណុចតានតឹងក្នុងការពិភាក្សា។
លោក Lighthizer និយាយថាលោកប្រធានាធិបតី ដូណាល់ ត្រាំ កំពុងស្វែងរកកិច្ចព្រមព្រៀងពាណិជ្ជកម្មទូលំទូលាយបន្ថែមទៀត៕ RR