ក្រុងប៉ារីសៈ ប្រធានាធិបតីបារាំងលោក Emmanuel Macron បានឲ្យដឹងថា លោកមិនទាន់ប្រាកដថានឹងមានលទ្ធភាពសម្រាប់សហភាពអឺរ៉ុប (EU) និងចក្រភពអង់គ្លេសដើម្បីសម្រេចបានកិច្ចព្រមព្រៀងពាណិជ្ជកម្មមួយនៅត្រឹមចុងឆ្នាំនេះ ឬបែបណានោះទេ។
ចក្រភពអង់គ្លេស និង EU នឹងចាប់ផ្ដើមការចរចាក្នុងគោលបំណងសម្រេចបានកិច្ចព្រមព្រៀងពាណិជ្ជកម្មមួយត្រឹមអំឡុងពេលអន្តរកាលក្រោយ Brexit បញ្ចប់នៅចុងខែធ្នូ។
ប៉ុន្តែប្រទេសបារាំងបានឲ្យដឹងថា ការចរចារបស់ចក្រភពអង់គ្លេសនឹងមានការពិបាក ពិសេសនៅក្នុងពេលវេលាដ៏តឹងរ៉ឹងបែបនេះ។
លោក Macron បានឲ្យដឹងនៅក្នុងជំនួបមួយជាមួយក្រុមអ្នកនេសាទ ដែលមានការបារម្ភសម្រាប់ជីវភាពរស់នៅរបស់ពួកគេ បន្ទាប់ពី Brexit នៅក្នុងព្រឹត្តិការណ៍ពាណិជ្ជកម្មកសិកម្មនៅទីក្រុងប៉ារីសថា៖ «ខ្ញុំមិនប្រាកដថា កិច្ចព្រមព្រៀងមួយនឹងសម្រេចបាននៅចន្លោះពេលនេះ ឬនៅចុងឆ្នាំនេះទេ»។
លោកបានបន្តថា៖ «ម្យ៉ាងវិញទៀតវានឹងកាន់តែតានតឹងខ្លាំងឡើង ដោយសារតែចក្រភពអង់គ្លេសពិបាកខ្លាំងបំផុត»។ លោកបន្ថែមថា សិទ្ធិនេសាទនឹងជាចំណុចដ៏សំខាន់មួយនៃការខ្វែងគំនិតគ្នា។
ចក្រភពអង់គ្លេសបានបញ្ចប់ជាផ្លូវការសមាជិកភាពរបស់ EU រយៈពេល ៤៧ ឆ្នាំរបស់ខ្លួនកាលពីថ្ងៃទី ៣១ ខែមករា បន្ទាប់ពីជិត ៤ ឆ្នាំនៃការបោះឆ្នោតចាកចេញពីប្លុកនេះនៅក្នុងការស្ទង់មតិកាលពីឆ្នាំ ២០១៦។
ប្រទេសបារាំង និងបណ្ដាប្រទេសជាច្រើនផ្សេងទៀតចង់រក្សាការនេសាទក្នុងទឹករបស់ចក្រភពអង់គ្លេស ខណៈទីក្រុងឡុងដ៍ចង់បានស្វ័យភាពពេញលេញ និងកម្រិតលទ្ធភាពសម្រាប់ក្រុមអ្នកនេសាទអឺរ៉ុប។
លោក Michel Barnier ប្រធានក្រុមអ្នកចរចារបស់ EU បានឲ្យដឹងថា អាទិភាពខ្ពស់របស់ EU គឺការនេសាទត្រី សន្ដិសុខ និងការរក្សាលក្ខខណ្ឌពាណិជ្ជកម្មស្មើភាពសម្រាប់ក្រុមហ៊ុនរបស់អឺរ៉ុប។
លោកក៏បានបដិសេធយ៉ាងខ្លាំងនូវការផ្ដល់យោបល់របស់ចក្រភពអង់គ្លេសថា ក្រុមហ៊ុននៅទីក្រុងឡុងដ៍អាចត្រូវបានផ្ដល់លទ្ធភាពអចិន្ត្រៃយ៍ដ៏ទូលំទូលាយចូលទីផ្សារ EU ដោយគ្មានលក្ខខណ្ឌ។
ជារួមទូកនេសាទប្រទេសបារាំងរកបានប្រាក់ចំណូល ៣០ ភាគរយរបស់ពួកគេពីការចាប់ត្រីនៅក្នុងដែនសមុទ្រចក្រភពអង់គ្លេស ជាពិសេសក្នុងតំបន់ដែលមានត្រីច្រើន។
ក្រុមមន្ដ្រីប្រទេសបារាំងឲ្យដឹងថាចក្រភពអង់គ្លេសនាំចេញត្រីភាគច្រើនទៅសហភាពអឺរ៉ុបដែលបញ្ជាក់ថា ក្រុមអ្នកនេសាទចក្រភពអង់គ្លេសមានការបាត់បង់ច្រើន ប្រសិនបើភាគីទាំង ២ បរាជ័យក្នុងការសម្រេចបានកិច្ចព្រមព្រៀងមួយ៕ LA