.jpg)
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា ដឹកនាំជំនួបពិភាក្សាតាមប្រព័ន្ធវីដេអូ ជាមួយលោក Zhong Shan រដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន កាលពីថ្ងៃទី ២០ កក្កដា។ រូបថត ក្រសួងពាណិជ្ជកម្ម
ភ្នំពេញៈ ក្រសួងពាណិជ្ជកម្មបានប្រកាសថា ការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងចិនបានបញ្ចប់រួចរាល់ហើយកាលពីថ្ងៃចន្ទ ដោយកម្ពុជាសង្ឃឹមថា ផលិតផលរបស់ខ្លួនកាន់តែច្រើននឹងត្រូវបាននាំចេញទៅកាន់ទីផ្សារប្រទេសចិន។
ការប្រកាសនេះធ្វើឡើងក្នុងជំនួបពិភាក្សាតាមប្រព័ន្ធវីដេអូរវាងលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជាជាមួយលោក Zhong Shan រដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន។
លោក ប៉ាន សូរស័ក្ដិ បានឲ្យដឹងថា កិច្ចព្រមព្រៀងពាណិជ្ជកម្មសេរីនេះនឹងផ្ដល់ផលប្រយោជន៍សេដ្ឋកិច្ច និងសង្គមជាច្រើនដល់ប្រជាជនប្រទេសទាំង ២ តាមរយៈការធ្វើសេរីភាវូបនីយកម្មពាណិជ្ជកម្មទំនិញ និងសេវាព្រមទាំងការជំរុញការវិនិយោគយ៉ាងទូលំទូលាយបន្ថែមទៀត។ លោកបន្តថា ជាជំហានបន្ទាប់ ភាគីទាំង ២ នឹងអនុវត្តនីតិវិធីផ្ទៃក្នុងរៀងៗខ្លួន ដើម្បីឈានទៅចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីឲ្យបានក្នុងឆ្នាំនេះ។
លោកថ្លែងថា៖ «ការបញ្ចប់ការចរចាលើកិច្ចព្រមព្រៀងពាណិជ្ជកម្មសេរីដោយជោគជ័យក្នុងរយៈពេលមួយដ៏ខ្លីនេះបានបង្ហាញពីឆន្ទៈនៃថ្នាក់ដឹកនាំនៃប្រទេសទាំង ២ ក្នុងការពង្រឹងទំនាក់ទំនងឲ្យកាន់តែជិតស្និទ្ធ និងទូលំទូលាយ។ កិច្ចព្រមព្រៀងនេះបានឆ្លុះបញ្ចាំងអំពីទំនាក់ទំនងយូរអង្វែងជាប្រពៃណីក៏ដូចជាកិច្ចសហប្រតិបត្តិការក្នុងភាពជាដៃគូគ្រប់ជ្រុងជ្រោយរវាងប្រទេសទាំង ២»។
ប្រទេសទាំង ២ ចាប់ផ្តើមពិភាក្សាពីលទ្ធភាពនៃកិច្ចព្រមព្រៀង FTA កាលពីខែធ្នូ ឆ្នាំ ២០១៩ និង ចាប់ផ្តើមចរចាជុំទី ១ កាលពីខែមករា ឆ្នាំ ២០២០។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃអង្គារថា ភាគីទាំង ២ បានប្រកាសបញ្ចប់ការចរចាមានន័យថា បានឯកភាពលើឯកសារចរចាទាំងឡាយរួចហើយ។ ដូចនេះភាគីទាំង ២ នឹងពិចារណាពីកម្មវិធី និងទីកន្លែងសម្រាប់ចុះហត្ថលេខាក្នុងពេលខាងមុខ ដើម្បីអាចចាប់ផ្ដើមអនុវត្តកិច្ចព្រមព្រៀងនេះឲ្យបានឆាប់។
លោកប្រាប់ថា៖ «យើងសង្ឃឹមថា ក្រោយពីកិច្ចព្រមព្រៀងនេះចូលជាធរមាន ការនាំចេញរបស់កម្ពុជាទៅកាន់ប្រទេសចិន នឹងកើនឡើងប្រមាណ ២៥ ភាគរយ ព្រោះមុខទំនិញជាច្រើនមុខនឹងទទួលបានសម្បទាន ក្រោមកិច្ចព្រមព្រៀងនេះ»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជាប្រាប់ភ្នំពេញប៉ុស្តិ៍កាលពីខែមុនថា កិច្ចព្រមព្រៀងពាណិជ្ជកម្មសេរីជាមួយចិននឹងជំរុញយ៉ាងខ្លាំងដល់ការនាំចេញរបស់កម្ពុជា មិនត្រឹមតែក្នុងវិស័យកាត់ដេរនោះទេ។
លោកថ្លែងថា៖ «ពីអ្វីដែលយើងបានអានសេចក្តីថ្លែងការណ៍របស់ក្រសួងពាណិជ្ជកម្មទាក់ទងនឹងលទ្ធផលការចរចាលើកទី ៣ ការនាំចេញពីកម្ពុជានឹងកើនឡើងជាង ២០ ភាគរយ»។ លោកបន្តថា៖ «ទន្ទឹមនឹងនេះយើងនឹងឃើញការវិនិយោគបន្ថែមលើការផ្គត់ផ្គង់វត្ថុធាតុដើមសម្រាប់សម្លៀកបំពាក់ ស្បែកជើង និងទំនិញធ្វើដំណើរ គ្រឿងអេឡិចត្រូនិក និងឧស្សាហកម្មដទៃទៀត»។
លោកនាយករដ្ឋមន្ដ្រី ហ៊ុន សែន នឹងដឹកនាំក្រុមមន្ដ្រីជាន់ខ្ពស់កម្ពុជាទៅចុះហត្ថលេខាលើ FTA រវាងកម្ពុជា និងចិននៅខែសីហាខាងមុខ។ នេះបើតាម លោក វង្ស៊ី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
កម្ពុជារំពឹងថា នឹងជំរុញពាណិជ្ជកម្មទ្វេភាគីដល់ ១០ ពាន់លានដុល្លារនៅឆ្នាំ ២០២៣។ ទំហំពាណិជ្ជកម្មទ្វេភាគីរវាងកម្ពុជា និងចិនមានតម្លៃ ៩,៤២ ពាន់លានដុល្លារ ក្នុងឆ្នាំ ២០១៩ កើន ២៧,២៩ ភាគរយ បើធៀបឆ្នាំ ២០១៨ ដែលមាន ៧,៤ ពាន់លានដុល្លារ។ នេះបើតាមស្ថានទូតចិននៅកម្ពុជា៕LA
