.jpg)
លោក វេង សាខុន ធ្វើជាសាក្សីក្នុងពិធីចុះកិច្ចសន្យាផលិតកម្មកសិកម្ម។ ហេង ជីវ័ន
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ការចុះកិច្ចសន្យាផលិតកម្មកសិកម្មនៅកម្ពុជាកំពុងមានសម្ទុះកើនឡើងខ្លាំងនៅដើមឆ្នាំ ២០២០ នេះដោយក្នុងរយៈពេលជិត ៦ ខែមកនេះមាន កិច្ចសន្យាប្រមាណជាង ៥០០ ករណី ត្រូវបានធ្វើរួចរាល់។
ទិន្នន័យក្រសួងកសិកម្ម រុក្ខាប្រមាញ់ និងនេសាទបង្ហាញថា ក្នុងរយៈពេលជិត ៦ ខែនេះវិស័យឯកជនបានចុះកិច្ចសន្យាផលិតកម្មកសិកម្មជាមួយប្រជាកសិករបានសរុប ៥១៦ ករណី ខណៈកាលពីឆ្នាំ ២០១៩ ទាំងមូលមានត្រឹមតែ ៤៩៨ ករណីប៉ុណ្ណោះ។
ការលើកឡើងរបស់លោក វេង សាខុន ត្រូវបានធ្វើឡើងក្នុងឱកាសចូលរួមធ្វើជាសាក្សីក្នុងពិធីចុះកិច្ចសន្យាផលិតកម្មកសិកម្មស្តីពី «ការទិញ លក់ ចែកចាយផលិតផលកសិកម្មរវាងក្រុមហ៊ុន LY LY Food Industry Co., LTD និង LY LY Kameda Co., Ltd ជាមួយក្រុមផលិត ផ្គត់ផ្គង់ ចែកចាយផលិតផលកសិកម្ម» កាលពីថ្ងៃព្រហស្បតិ៍។
លោក វេង សាខុន បានឲ្យដឹងថា កិច្ចសន្យាផលិតកម្មកសិកម្មកំពុងជួយជំរុញខ្សែចង្វាក់តម្លៃផលិតកម្មកែច្នៃរបស់កម្ពុជាទាំងនៅក្នុងស្រុក និងការប្រកួតប្រជែងលើទីផ្សារអន្តរជាតិ។ កិច្ចសន្យាផលិតកម្មកសិកម្ម មិនត្រឹមតែជួយលើកកម្ពស់ផលិតភាពផលិតកម្មកសិកម្មប៉ុណ្ណោះទេ តែវាក៏ជួយធ្វើឲ្យកម្ពុជាប្រើប្រាស់វត្ថុធាតុដើមអស់ពីលទ្ធភាព កាត់បន្ថយការនាំចូល និងបង្កើតឱកាសការងារទៀតផង។
លោកថ្លែងថា៖ «ការចូលរួមយ៉ាងសកម្មពីដៃគូឯកជនប្រាកដជានឹងជួយលើកស្ទួយវិស័យកសិកម្មកម្ពុជា តាមរយ:ការបន្តជំរុញការធ្វើពាណិជ្ជនីយកម្ម និងការអភិវឌ្ឍវិស័យកសិឧស្សាហកម្មដែលវានឹងជួយបង្កើនតម្លៃបន្ថែមលើកសិផល រក្សានិរន្តរភាពការផលិត ការផ្គត់ផ្គង់ និងបន្តចូលរួមបង្កើនចំណូលដល់គ្រួសារស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥»។
លោកស្រី កែវ មុំ អគ្គនាយិកាក្រុមហ៊ុន LY LY Food Industry Co.,- LTD និយាយថា ក្នុងរយៈពេលប៉ុន្មានឆ្នាំចុងក្រោយនេះចំនួនប្រជាជនដែលធ្វើការដាំដុះបន្លែ ផ្លែឈើមានច្រើន ប៉ុន្តែពួកគេតែងតែជួបបញ្ហាពិបាករកទីផ្សារនៅពេលរដូវប្រមូលផលម្តងៗ ដែលធ្វើឲ្យពួកគេត្រូវខាតបង់ប្រាក់ ព្រមទាំងឈានទៅដល់ការបោះបង់ចោលការដាំដុះ ឬធ្វើចំណាកស្រុកផងក៏មាន។
អ្នកស្រីបន្តថា កិច្ចសន្យាផលិតកម្មកសិកម្មមិនត្រឹមតែជួយដល់អ្នកដាំដុះប៉ុណ្ណោះទេ តែក៏ជួយឲ្យគុណភាពផលិតផលកម្ពុជាត្រូវបានគេទទួលស្គាល់ជាអន្តរជាតិផងដែរ។
អ្នកស្រីនិយាយថា៖ «ខ្ញុំពិតជាមានមោទនភាពយ៉ាងខ្លាំង ព្រោះរាល់ផលិតផលដែលផលិតចេញពីកសិផលខ្មែរអាចប្រកួតប្រជែងនៅលើទីផ្សារអន្តរជាតិបាន»។
លោក សុង សារ៉ន ប្រធានសហព័ន្ធស្រូវអង្ករកម្ពុជាមិនអាចទាក់ទងបានទេកាលពីម្សិលមិញ ប៉ុន្តែកាលពីពេលកន្លងមក លោកនិយាយថា ការធ្វើកិច្ចសន្យាផលិតកម្មកសិកម្ម គឺជាការចាំបាច់ក្នុងការលើកកម្ពស់ផលិតកម្មកម្ពុជាឲ្យបានកាន់តែរឹងមាំ និងមានឧត្តមភាពលើទីផ្សារអន្តរជាតិ។
ប្រធាននាយកដ្ឋានកសិឧស្សាហកម្ម ក្រសួងកសិកម្ម រុក្ខាប្រមាញ់ និងនេសាទ លោក គង់ ភាជ បានប្រាប់ភ្នំពេញប៉ុស្តិ៍ថា កិច្ចសន្យាផលិតកម្មកសិកម្មកំពុងដើរតួនាទីយ៉ាងសំខាន់ក្នុងការជួយពង្រឹងការដាំដុះ និងទំនុកចិត្តដល់ប្រជាកសិករ ដោយចំនួនការចុះកិច្ចសន្យាផលិតកម្មកសិកម្មបានកើនឡើងយ៉ាងច្រើន។
លោកបានបន្តថា កិច្ចសន្យាផលិតផលកសិកម្មមានគុណសម្បត្តិជាច្រើន ដោយវាមិនត្រឹមតែជួយអ្នកដាំដុះឲ្យធានាបាននូវទីផ្សារមួយច្បាស់លាស់ប៉ុណ្ណោះទេ ប៉ុន្តែថែមទាំងអាចអ្នកដាំដុះទទួលបាននូវការជួយផ្នែកបច្ចេកទេស ធនធាន និងពូជអ្នកជំនាញ ឬអាជ្ញាធរផងដែរ។
លោកបន្ថែមថា បច្ចុប្បន្នកម្ពុជាលែងជាប្រទេសធ្វើកសិកម្មសម្រាប់តែហូបលក្ខណៈគ្រួសារទៀតហើយ។
លោកថ្លែងថា៖ «កិច្ចសន្យាផលិតកម្មកសិកម្មមានន័យថា ជាការជួយគិតគ្នា ក្នុងការស្វែងរកទីផ្សារ ពូជ និងស្វែងរកវិធីដោះស្រាយរួមគ្នា»។
បើយោងតាមលោក ភាជ កាលពីឆមាសទី ១ ឆ្នាំ ២០១៩ ចំនួននៃការចុះកិច្ចសន្យាផលិតផលកសិកម្មនេះមានត្រឹមតែ ៩៣ ប៉ុណ្ណោះ ដែលភាគច្រើននៅក្នុងវិស័យស្រូវអង្ករ៕ LA
