ភ្នំពេញៈ ក្រសួងពាណិជ្ជកម្មបានចុះបញ្ជីម៉ាកពាណិជ្ជកម្ម កើនសរុបចំនួន ២៦៩ ម៉ាក ក្នុងឆ្នាំ ២០១៨ ដែលធ្វើឲ្យចំនួនសរុបនៃម៉ាកពាណិជ្ជកម្មក្រុមហ៊ុន ដែលចុះបញ្ជីនៅក្រសួងពាណិជ្ជកម្មនៅឆ្នាំនេះកើនដល់ ៤ ១៨៦ គឺកើនឡើងពី ៣ ៩១៧ កាលពីឆ្នាំ ២០១៧។ នេះបើតាមរបាយការណ៍ប្រចាំឆ្នាំរបស់ក្រសួងពាណិជ្ជកម្ម។
លោក អប រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានប្រាប់ភ្នំពេញប៉ុស្ដិ៍កាលពីម្សិលមិញថា កំណើនការចុះបញ្ជីម៉ាកពាណិជ្ជកម្ម កំពុងឆ្លុះបញ្ចាំងពីការយល់ដឹងអំពីអត្ថប្រយោជន៍ម៉ាកពាណិជ្ជកម្មរបស់ប្រតិបត្តិករក្រុមហ៊ុន។
របាយការណ៍បង្ហាញថា ក្រសួងក៏បានទទួលពាក្យសុំចុះបញ្ជីម៉ាកពាណិជ្ជកម្មកើនចំនួន ៨១៩ ក្នុងឆ្នាំ ២០១៨ ផងដែរ ដែលធ្វើឲ្យចំនួនសរុបនៃពាក្យសុំ ឡើងដល់ ៥ ៩៤២ នៅឆ្នាំនេះ ធៀបនឹងឆ្នាំ ២០១៧ មានចំនួន ៥ ១២៣។
ក្នុងចំណោមការពាក្យសុំចុះបញ្ជីទាំងនោះ មាន ២ ២៤០គឺជាម៉ាកពាណិជ្ជកម្មក្នុងស្រុក។ នេះបើយោងតាមរបាយការណ៍។ លោកថ្លែងថា៖ «វាបង្ហាញថា ការយល់ដឹងអំពីម៉ាកពាណិជ្ជកម្មត្រូវទទួលបាននៅក្នុងប្រទេស កម្ពុជា ខណៈក្រសួងពាណិជ្ជកម្មកំពុងព្យាយាមផ្សព្វផ្សាយពីអត្ថប្រយោជន៍នៃម៉ាកពាណិជ្ជកម្ម និងកម្មសិទ្ធិបញ្ញា»។
លោកថ្លែងថា៖ «ប្រតិបត្តិករក្រុមហ៊ុនបានដឹងហើយថា ម៉ាកពាណិជ្ជកម្ម នឹងការពារផលិតផល និងធានាគុណភាពរបស់ពួកគេ ព្រមទាំងបង្កើនទំនុកចិត្តដល់អតិថិជន»។ លោកបានថ្លែងបន្តទៀតថា៖ «នៅក្នុងម៉ាកពាណិជ្ជកម្ម ប្រតិបត្តិករក្រុមហ៊ុន អាចប្ដឹងប្រឆាំងនឹងបញ្ហាស្មុគស្មាញណាមួយដែលធ្វើឲ្យប៉ះពាល់ដល់អត្ថប្រយោជន៍ផលិតផលរបស់ពួកគេ»។
ប្រទេស កម្ពុជា បានចូលរួមក្នុងពិធីសារ Madrid Protocol កាលពីខែមីនា ឆ្នាំ ២០១៥ ដោយកិច្ចព្រមព្រៀងនេះចាប់ផ្ដើមអនុវត្តកាលពីខែមិថុនា ឆ្នាំ ២០១៥។
ស្ថិតក្រោមប្រព័ន្ធ Madrid ម៉ាកពាណិជ្ជកម្ម ដែលត្រូវបានចុះបញ្ជីដោយក្រុមហ៊ុននៅកម្ពុជា អាចត្រូវបានទទួលស្គាល់ដោយសមាជិកទាំង ៩៨ របស់សន្ធិសញ្ញានេះ ដែលគ្របដណ្ដប់លើប្រទេស ១១៤។
របាយការណ៍នេះបានបង្ហាញថា ម៉ាកពាណិជ្ជកម្ម ស្ថិតក្រោមប្រព័ន្ធ Madrid ដែលបានដាក់ពាក្យសុំចុះបញ្ជីនៅឆ្នាំនេះបានធ្លាក់ចុះ ៨,៩៣% ធៀបនឹងឆ្នាំមុន។ ទោះបីយ៉ាងនេះក្តី ក្រសួងបានចុះបញ្ជីម៉ាកពាណិជ្ជកម្ម ១១៥៣ ស្ថិតក្រោមប្រព័ន្ធ Madrid នៅឆ្នាំនេះ។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានឲ្យដឹងថា ចំនួនម៉ាកពាណិជ្ជកម្ម ដែលចុះបញ្ជីនោះគឺជាសញ្ញាល្អមួយ និងបង្ហាញអំពីការងារដ៏ពិបាករបស់ក្រសួងពាណិជ្ជកម្ម ក្នុងការផ្សព្វផ្សាយម៉ាកពាណិជ្ជកម្មនេះ។
លោកឲ្យដឹងថា វាបង្ហាញថា សហគ្រាសធុនតូច និងមធ្យម កាន់តែច្រើនកំពុងទទួលបានការយល់ដឹងអំពីម៉ាកពាណិជ្ជកម្មនេះ។ លោកបានថ្លែងថា៖ «វាជាសញ្ញាដ៏ល្អមួយសម្រាប់ប្រទេសនេះ ដែល SME គោរពតាមច្បាប់ និងយល់ដឹងពីអត្ថប្រយោជន៍អំពីសញ្ញាពាណិជ្ជកម្ម»។
លោកបានបន្តទៀតថា៖ «ក្រសួងពាណិជ្ជកម្មក៏បានចាត់វិធានការកាន់តែច្រើនផងដែរសម្រាប់ម៉ាកពាណិជ្ជកម្មក្លែងក្លាយ ដើម្បីបង្កើនទំនុកចិត្តសម្រាប់ប្រតិបត្តិករក្រុមហ៊ុន និងអតិថិជន»៕LA