.jpg)
ព្រលានយន្តហោះអន្តរជាតិ ព្រះសីហនុ។ ហេង ជីវ័ន
ភ្នំពេញៈ អ្នកនៅក្នុងឧស្សាហកម្មអាកាសចរណ៍បានឲ្យដឹងថា ប្រទេស កម្ពុជា គួរតែពិចារណាចូលរួមនៅក្នុងអនុសញ្ញា Capetown ដើម្បីទទួលបានអត្ថប្រយោជន៍សម្រាប់វិស័យអាកាសចរណ៍ ខណៈកម្ពុជាកំពុងទទួលបានកំណើននៅក្នុងវិស័យនេះ។
អនុសញ្ញា Capetown គឺជាយន្តការមួយ ដែលអាចឲ្យក្រុមហ៊ុនអាកាសចរណ៍ជួល ឬទិញយន្តហោះ និងឧទ្ធម្ភាគចក្រ ក្នុងតម្លៃកាន់តែទាប ព្រមទាំងការទិញបច្ចេកវិទ្យាអាកាសចរណ៍ចុងក្រោយមួយចំនួន។
ស្ថានទូតអាមេរិកប្រចាំនៅទីក្រុងភ្នំពេញសហការជាមួយសភាពាណិជ្ជកម្មអាមេរិកប្រចាំកម្ពុជា (AmCham Cambodia) និងរដ្ឋលេខាធិការដ្ឋានអាកាសចរស៊ីវិលរបស់កម្ពុជា កាលពីថ្ងៃសុក្រមុន បានរៀបចំសិក្ខាសាលាមួយស្ដីពី «អាកាសចរណ៍ និងអនុសញ្ញា Capetown»។
ថ្លែងទៅកាន់ក្រុមអ្នកយកព័ត៌មានក្នុងព្រឹត្តិការណ៍នេះ លោក Michael Newbill ភារធារីនៅស្ថានទូតអាមេរិកប្រចាំទីក្រុងភ្នំពេញ បានឲ្យដឹងថា វិស័យទេសចរណ៍របស់កម្ពុជាកំពុងរីកចម្រើនយ៉ាងរហ័ស ដែលនាំយកឱកាសកំណើនដ៏ធំមួយសម្រាប់អាកាសចរណ៍របស់ប្រទេសនេះ។
ខណៈពលរដ្ឋព្រមទាំងភ្ញៀវទេសចរត្រូវការហេដ្ឋារចនាសម្ព័ន្ធអាកាសចរណ៍ និងសេវាទំនើប ដើម្បីគាំទ្រកំណើនការធ្វើដំណើរ និងពាណិជ្ជកម្មអន្តរជាតិ លោក Michael បានឲ្យដឹងថា ការទទួលយកអនុសញ្ញា Capetown អាចអនុញ្ញាតឲ្យក្រុមហ៊ុនអាកាសចរណ៍របស់កម្ពុជា ជួល ឬទិញយន្តហោះ និងឧទ្ធម្ភាគចក្រ ក្នុងតម្លៃកាន់តែទាប ព្រមទាំងការទិញបច្ចេកវិទ្យាអាកាសចរណ៍ចុងក្រោយមួយចំនួននៅលើទីផ្សារនេះ។
លោកថ្លែងថា៖ «ប្រសិនបើអ្នកសម្លឹងមើលកំណើនទេសចរណ៍នៅក្នុងប្រទេស កម្ពុជា វាខ្ពស់ខ្លាំង ហើយវិស័យអាកាសចរណ៍ គឺជាវិស័យដ៏ធំបំផុត និងវិជ្ជមានបំផុត សម្រាប់កំណើន ហើយយើងចង់បន្តកំណើននោះ»។
សិក្ខាសាលាអនុសញ្ញា Cape Town គឺជាកម្មវត្ថុ ក្នុងការជួយដល់ក្រុមហ៊ុនអាកាសចរណ៍របស់កម្ពុជា យល់ដឹងកាន់តែប្រសើរអំពីអត្ថប្រយោជន៍របស់អនុសញ្ញា Cape Town និងរៀនសូត្រកាន់តែច្រើនអំពីរបៀបដែលអនុសញ្ញានេះអាចគាំទ្រចំនួនកំណើនក្រុមហ៊ុនអាកាសចរណ៍ ឧទ្ធម្ភាគចក្រជាច្រើនរបស់ប្រទេសនេះ ដែលរួមទាំងរបៀបក្នុងការកាត់បន្ថយការចំណាយលើការទិញ និងការជួលយន្តហោះ ព្រមទាំងផ្ដល់ប្រភពហិរញ្ញវត្ថុថ្មីៗផងដែរ។
មានតំណាង ១៣ មកពីវិស័យអាកាសចរណ៍របស់អាមេរិក ដែលបានចូលរួមនៅក្នុងព្រឹត្តិការណ៍ ដូចជាក្រុមហ៊ុន Boeing ក្រុមហ៊ុន General Electric ក្រុមហ៊ុន Aircastle និង Magellan Aviation Group។
លោក ស៊ិន ចាន់សេរីវុត្ថា អ្នកនាំពាក្យនៅរដ្ឋលេខាធិការដ្ឋានអាកាសចរស៊ីវិល បានឲ្យដឹងថា ការទទួលយកអនុសញ្ញានេះមានប្រយោជន៍ខ្លាំងណាស់ សម្រាប់កម្ពុជា ដែលវិស័យអាកាសចរណ៍កំពុងរីកចម្រើន។
លោកឲ្យដឹងថា ក្រុមហ៊ុនអាកាសចរណ៍កម្ពុជាទាំងអស់ប្រើប្រាស់យន្តហោះប្រហែល ៣០ គ្រឿង ប៉ុន្តែមិនបានជួលយន្តហោះដោយផ្ទាល់ពីក្រុមហ៊ុនយន្តហោះនេះទេដោយសារការមិនចូលរួមក្នុងអនុសញ្ញានេះ។
លោក សេរីវុត្ថា បានឲ្យដឹងថា ក្រុមហ៊ុនអាកាសចរណ៍ក្នុងស្រុក ត្រូវការក្រុមហ៊ុនទី៣ ដែលភាគច្រើននៅក្នុងប្រទេសផ្សេងទៀតដើម្បីធានាក្នុងការជួលយន្តហោះរបស់ខ្លួន។
លោកថ្លែងថា៖ «យើងនឹងចូលរួម ប៉ុន្តែវានឹងមានការពិបាកមួយចំនួន។ ដើម្បីចូលរួមក្នុងអនុសញ្ញា capetown យើងនឹងចាំបាច់ត្រូវប្រឈមនឹងបញ្ហាមួយចំនួន ដូចជាត្រូវកែតម្រូវច្បាប់ ដែលជាប់ពាក់ព័ន្ធមួយចំនួន»។
លោកបន្ថែមថា ដើម្បីចូលរួមដោយជោគជ័យនៅក្នុងអនុសញ្ញានេះចាំបាច់ត្រូវការពេលវេលា ធនធានមនុស្ស និងការគាំទ្រពីរដ្ឋាភិបាល»៕LA
