ទីក្រុងហ្វ្រែងហ្វឺតៈ ការលេចចេញជាថ្មីនៃការរាតត្បាតវីរុសកូរ៉ូណា និងការចាប់ផ្តើមដ៏ពិបាកចំពោះការចាក់វ៉ាក់សាំងទំនងជានាំឱ្យប៉ះពាល់ដល់គំនិតរបស់ទេសាភិបាលធនាគារកណ្តាលអឺរ៉ុប (ECB) នៅពេលពួកគេជួបប្រជុំនៅថ្ងៃព្រហស្បតិ៍សប្តាហ៍នេះ ប៉ុន្តែពួកគេត្រូវបានគេរំពឹងថានឹងឈប់ធ្វើសកម្មភាពថ្មីៗ។
ក្រុមប្រឹក្សាភិបាលធនាគារកណ្តាលអឺរ៉ុបមានសមាជិក ២៥ រូប ទំនងជានឹងរក្សាទុកគោលនយោបាយរូបិយវត្ថុធូររលុងរបស់ខ្លួន បន្ទាប់ពីចាក់បញ្ចូលកញ្ចប់ថវិកាជំរុញបន្ថែមទៅក្នុងសេដ្ឋកិច្ចសម្រាប់តំបន់ចាយប្រាក់អឺរ៉ូនៅកិច្ចប្រជុំកាលពីខែមុន។
ស្ថានប័នហិរញ្ញវត្ថុនេះបានពង្រីកកម្មវិធីទិញសញ្ញាបណ្ណ (PEPP) បន្ទាន់នៃការរាតត្បាតរបស់ខ្លួនពីចំនួន ៥០០ ពាន់លានអឺរ៉ូ (៦០០ ពាន់លានដុល្លារ) ដល់ ១,៨៥ ពាន់ពាន់លានអឺរ៉ូ (២,២៣ ពាន់លានដុល្លារ) និងពន្យារពេលគម្រោងនេះរហូតដល់ខែមីនា ឆ្នាំ ២០២២។ស្ថាប័ននេះក៏បានប្រកាសផ្តល់កម្ចីការប្រាក់ថោកដល់ធនាគារលក់រាយផងដែរ។
លោក Andrew Kenningham នៃក្រុមហ៊ុន Capital Economics បាននិយាយថា៖ «អ្នកធ្វើគោលនយោបាយនឹងរីករាយនៅក្រៅកិច្ចប្រជុំ និងប្រកាសឡើងវិញថា ពួកគេនឹងធ្វើអ្វីដែលចាំបាច់ដើម្បីគាំទ្រដល់តំបន់ចាយប្រាក់អឺរ៉ូតាមរយៈការរាតត្បាតនេះ»។
លោក និយាយថា ក្តីព្រួយបារម្ភចម្បងរបស់ពួកគេនឹងជាផលប៉ះពាល់នៃការរីករាលដាលលើក្តីសង្ឃឹមចំពោះការងើបឡើងវិញផ្នែកសេដ្ឋកិច្ចក្នុងត្រីមាសទី១ នៃឆ្នាំ ២០២១។
រដ្ឋាភិបាលនៃប្រទេសក្នុងតំបន់អឺរ៉ុបជាច្រើនកំពុងតែដាក់ការរឹតបន្តឹងដ៏តឹងរ៉ឹងជាថ្មីដើម្បីទប់ស្កាត់ការរីករាលដាលកូវីដ ១៩ ក្នុងរលកទី២។
ការផ្តល់វ៉ាក់សាំងកូវីដ ១៩ លើកដំបូងតិចជាងការរំពឹងទុកជាពិសេសនៅក្នុងសហភាពអឺរ៉ុបបានជំរុញបន្ថែមឱ្យមានក្តីបារម្ភដែលថា ការរីករាលដាលនេះអាចធ្វើឱ្យអន្តរាយកាន់តែយូរ។
ធនាគារនេះកាលពីខែធ្នូបានព្យាករកំណើនសេដ្ឋកិច្ចក្នុងតំបន់ចាយប្រាក់អឺរ៉ុបដែលមាន ១៩ ប្រទេសមានចំនួន ៣,៩ ភាគរយ ក្នុងឆ្នាំ ២០២១ បន្ទាប់ពីការធ្លាក់ចុះដែលប៉ាន់ស្មានមាន ៧,៣ ភាគរយ ក្នុងឆ្នាំ ២០២០។
លោកស្រី Christine Lagarde ប្រធាន ECB ពេលថ្មីៗនេះបាននិយាយថា លោកស្រីគ្មានហេតុផលជឿថាការព្យាករខុសត្រង់ចំណុចនេះទេ។
ប៉ុន្តែវានឹងក្លាយជាក្តីព្រួយបារម្ភ ប្រសិនបើរដ្ឋជាសមាជិកបានពង្រីកការបិទប្រទេសលើសពីខែមីនានោះ។
នៅក្រោម Lagarde ធនាគារកណ្តាលបានបង្ហាញនូវការគាំទ្រដែលមិនធ្លាប់មានពីមុនមកដើម្បីដឹកនាំតំបន់ចាយប្រាក់អឺរ៉ូតាមរយៈវិបត្តិសេដ្ឋកិច្ច ខណៈពេលដែលលោកស្រីក៏បានទទូចដល់រដ្ឋាភិបាលឱ្យប្រឹងប្រែងបន្តិចតាមរយៈការជំរុញសារពើពន្ធ។
ទន្ទឹមនឹងការទិញសញ្ញាបណ្ណបន្ទាន់ ECB បានរក្សាអត្រាការប្រាក់ឱ្យនៅកម្រិតទាបបំផុតហើយវានៅតែទិញប្រាក់ ២០ ពាន់លានអឺរ៉ូ (២៤ ពាន់លានដុល្លារ) ក្នុង ១ ខែក្នុងបំណុលក្រុមហ៊ុន និងរដ្ឋាភិបាលក្រោមគម្រោងទិញទ្រព្យសម្បត្តិមុនការផ្ទុះឡើងកូវីដ ១៩៕ RR