ភ្នំពេញ៖ សាលារាជធានីភ្នំពេញបានឲ្យដឹងថា អាជ្ញាធរនៅមិនទាន់ធ្វើការសម្រេចចិត្តនៅឡើយទេថាតើត្រូវបន្តការផ្តល់ជូននូវការធ្វើដំណើរដោយមិនគិតប្រាក់តាមកាណូតទៀតឬយ៉ាងណាសម្រាប់ឆ្នាំក្រោយ ខណៈការធ្វើដំណើរដោយមិនគិតប្រាក់នេះនឹងត្រូវបញ្ចប់នៅចុងឆ្នាំនេះ។ នេះបើតាម លោក ម៉េត មាសភក្ដី អ្នកនាំពាក្យសាលារាជធានីភ្នំពេញ។
សេវាកាណូតដឹកអ្នកដំណើរ តាមបណ្ដោយទន្លេសាប និងទន្លេបាសាក់ ដែលមានចំណត ៤ កន្លែងនៅរាជធានីភ្នំពេញ និងចំណតចុងក្រោយនៅក្រុងតាខ្មៅ ខេត្តកណ្ដាល ផ្ដល់កាណូតដឹកអ្នកដំណើរ ៤ គ្រឿង ពីចំណតឫស្សីកែវ ទៅចំណតតាខ្មៅ ដោយប្រតិបត្តិការចាប់ពីម៉ោង ៦ ព្រឹកដល់ ៦ ល្ងាច។
លោក ភក្ដី ឲ្យដឹងថា តាំងពីកាណូតដឹកអ្នកដំណើរនេះប្រតិបត្តិការចាប់ពីខែមេសា ឆ្នាំនេះ វាបានដឹកជញ្ជូនអ្នកដំណើរជាមធ្យម ១០០ នាក់ក្នុង ១ ថ្ងៃ ហើយរំពឹងថា ចំនួនអ្នកដំណើរនឹងបន្តកើនឡើង។
លោកថ្លែងថា៖ «និន្នាការរបស់អ្នកដំណើរនៅរក្សាកំណើន យើងជឿជាក់ថា កាណូតដឹកអ្នកដំណើរនេះ នឹងកាន់តែមានប្រជាប្រិយភាព ជាសាធារណៈ»។
លោកបន្តថា៖ «ប្រជាជនមានយល់ដឹងពីសេវាកម្មព័ត៌មាននេះជាបណ្ដើរៗ និងយល់ដឹងពីអត្ថប្រយោជន៍សម្រាប់ការប្រើប្រាស់កាណូតដឹកអ្នកដំណើរនេះ»។
កាណូតដឹកអ្នកដំណើរនេះគឺជាការផ្ដល់ចុងក្រោយបំផុត សម្រាប់មធ្យោបាយដឹកជញ្ជូនសាធារណៈថ្មី នៅទីក្រុងភ្នំពេញ ខណៈបច្ចុប្បន្នមានសេវារថយន្តក្រុងសាធារណៈ និងសេវារថភ្លើងពីព្រលានយន្តហោះអន្តរជាតិភ្នំពេញ ទៅសា្ថនីយរថភ្លើងកណ្ដាល នៅមហាវិថីមុនីវង្ស។
លោកថ្លែងថា៖ «តាមផែនការ ការធ្វើដំណើរមិនគិតប្រាក់នេះនឹងបញ្ចប់ត្រឹមចុងឆ្នាំនេះ ហើយសាលារាជធានីនឹងធ្វើការសម្រេចចិត្តនៅពេលក្រោយថា តើនឹងផ្ដល់សេវាមិនគិតប្រាក់នេះបន្តទៀត ឬអត់?»៕LA