.jpg)
ក្រុមហ៊ុនផ្សារមូលបត្រកម្ពុជា(CSX) នៅខណ្ឌដូនពេញ ។ ហ៊ាន រង្សី
ភ្នំពេញ៖ មន្ដ្រីជាន់ខ្ពស់នៅក្រុមហ៊ុនផ្សារមូលបត្រកម្ពុជា (CSX) បានឲ្យដឹងថា ទោះបីជាការបិទខ្ទប់កំពុងអនុវត្តក្នុងរយៈពេលជាង ២ សប្ដាហ៍មកហើយក៏ដោយ ប្រតិបត្តិការជួញដូរនៅលើផ្សារហ៊ុនបានកើនឡើងយ៉ាងខ្លាំង ដោយសារតែការបញ្ជាទិញ ៩៩ ភាគរយតាមរយៈវេទិកាជួញដូរអនឡាញ ហៅថា «ប្រព័ន្ធជួញដូរចល័ត» (MTS)។
ជាមួយនឹងការកើនឡើងខ្លាំងចំនួនអ្នកជំងឺកូវីដ១៩ថ្មី ជាប់ទាក់ទងនឹងការឆ្លងក្នុងព្រឹត្តិការណ៍សហគមន៍ ២០ កុម្ភៈ រដ្ឋាភិបាលកាលពីថ្ងៃទី ១៤ ខែមេសា បានប្រកាសការបិទខ្ទប់ទាំងស្រុងនៅទីក្រុងភ្នំពេញ និងក្រុងតាខ្មៅខេត្តកណ្ដាល ចាប់ពីថ្ងៃទី ១៥ និងបន្តដល់ថ្ងៃទី ៥ ខែឧសភា ដើម្បីគ្រប់គ្រងហានិភ័យនៃការរីករាលដាលវីរុសកូរ៉ូណា។
លោកស្រី គឹម សុផានីតា ប្រធាននាយកដ្ឋានប្រតិបត្តិការផ្សារមូលបត្របានប្រាប់ភ្នំពេញប៉ុស្ដិ៍ថា ផ្សារហ៊ុនកំពុងប្រតិបត្តិការយ៉ាងរលូន ចាប់តាំងពីការបិទខ្ទប់ត្រូវបានដាក់ឲ្យអនុវត្ត។ លោកស្រីបន្ថែមថា ការបញ្ជាទិញប្រហែល ៩៩ ភាគរយត្រូវបានទទួលពីប្រព័ន្ធជួញដូរចល័ត (MTS)។
លោកស្រីថ្លែងថា៖ «CSX និងក្រុមហ៊ុនជើងសាររបស់យើង ភាគច្រើនកំពុងធ្វើការងារពីផ្ទះ និងតភ្ជាប់ពីចម្ងាយទៅកុំព្យូទ័រនៅការិយាល័យសម្រាប់ប្រតិបត្តិការប្រចាំថ្ងៃ។ ធនាគារទូទាត់សាច់ប្រាក់ ទាំងអស់របស់យើង បន្តប្រតិបត្តិការដោយមិនមានការរំខាននោះទេ»។
លោកស្រីលើកឡើងថា៖ «មានការកើនឡើងទំហំជួញដូរគួរឲ្យកត់សម្គាល់ ក្នុងអំឡុងពេលសប្ដាហ៍បិទខ្ទប់ធៀបនឹងសប្ដាហ៍មុន ភាគច្រើនលើភាគហ៊ុនតម្លៃទាប»។ លោកស្រីបន្តថា ភាគហ៊ុនប្រហែល ៣៦ ០០០ ត្រូវបានជួញដូរប្រចាំថ្ងៃ ជាមធ្យមធៀបនឹង ២៨ ០០០ ក្នុងសប្ដាហ៍មុន។
ប្រព័ន្ធជួញដូរចល័ត (MTS) គឺជាប្រព័ន្ធដែលទើបនឹងបង្កើតថ្មីមួយរបស់ CSX ដែលវិនិយោគិនដែលអាចជួញដូរភាគហ៊ុនតាមមធ្យោយបាយរហ័ស សុវត្ថិភាព និងងាយស្រួល។ អ្នកប្រើប្រាស់មកពីគ្រប់ទីកន្លែងអាចដាក់ការបញ្ជាទិញដោយខ្លួនឯង ពិនិត្យមើលទិន្នន័យទីផ្សារបច្ចុប្បន្ន និងប្រវត្តិទីផ្សារ ព្រមទាំងជួញដូរទិន្នន័យគណនី តាមរយៈទូរស័ព្ទស្មាតហ្វូន ឬថេបភ្លិត ដែលត្រូវបានតភ្ជាប់ជាមួយអ៊ីនធឺណិត។
យោងតាមលោកស្រី សុផានីតា តំបន់សេដ្ឋកិច្ចពិសេសភ្នំពេញ (PPSP) គឺជាភាគហ៊ុនដែលជួញដូរច្រើនជាងគេបំផុតក្នុងអំឡុងពេលនៃការបិទខ្ទប់នេះ ដោយមានភាគហ៊ុន ៣០ ០០០ ជួញដូរប្រចាំថ្ងៃជាមធ្យម និងតម្លៃ ៥៦ លានរៀល។ លោកស្រីបន្ថែមថា សន្ទស្សន៍ CSX ពិតជាល្អ ក្នុងអំឡុងពេលការបិទខ្ទប់នេះជាងសប្ដាហ៍មុនៗ ដោយសារតែវាបានមើលឃើញការកើនឡើងតិចតួច ០,៧ ភាគរយ និងនៅសល់ជាង ៦៤០ ពិន្ទុទៀត។ ចាប់តាំងពីពាក់កណ្ដាលខែកុម្ភៈ សន្ទស្សន៍ CSX មានស្ថិរភាពប្រហែល ៦៤០ ពិន្ទុ។
លោកស្រី នីតា លើកឡើងថា៖ «ចាប់ពីការរីករាលដាលជំងឺកូវីដ១៩ ការជួញដូររាយទាំងអស់លើសលុបដោយវិនិយោគិនក្នុងស្រុក។ ក្នុងអំឡុងពេលការបិទខ្ទប់ការជួញដូរទាំងអស់គឺជាការជួញដូររាយ។ វិស័យហិរញ្ញវត្ថុគឺជាចំណុចស្នូលមួយនៃសកម្មភាពសេដ្ឋកិច្ចពិសេសរបស់កម្ពុជា។ CSX ក្នុងនាមជាផ្នែកមួយនៃប្រព័ន្ធហិរញ្ញវត្ថុបានប្ដេជា្ញចិត្តថា នឹងបន្តប្រតិបត្តិការដោយមិនគិតពីស្ថានការពិបាក ដើម្បីធានាអត្ថប្រយោជន៍ល្អបំផុតរបស់វិនិយោគិនរបស់យើង។ នៅសប្ដាហ៍មុនៗ បានបង្ហាញរួចហើយនូវប្រតិបត្តិការជាបន្តរបស់យើង។ មិនមានឧបសគ្គសម្រាប់ពួកយើងនោះទេ ប្រសិនបើការបិទខ្ទប់ត្រូវបានបន្តទៀតនោះ»៕LA
