ក្រុងញូវយ៉កៈ ការជួសជុលប្រព័ន្ធទប់ស្កាត់ការរលត់ម៉ាស៊ីនដែលត្រូវបានសង្ស័យថាជាបុព្វហេតុនៃការធ្លាក់យន្តហោះ Boeing 737 MAX 8 ដែលសម្លាប់មនុស្ស ១៨៩ នាក់នៅឥណ្ឌូនេស៊ីនោះបានធ្វើឡើងរួចរាល់ហើយ ខណៈដែលក្រុមហ៊ុន Boeing ព្យាយាមចៀសផុតពីការហាមឃាត់ការហោះហើរយន្តហោះរបស់ខ្លួនរយៈពេលវែង។ នេះបើយោងតាមប្រភពមួយនៅក្នុងឧស្សាហកម្មអាកាសចរណ៍។
ក្រុមហ៊ុន Boeing គ្រោងនឹងដាក់បង្ហាញលទ្ធផលជួសជុលនេះទៅកាន់ក្រុមមន្ត្រី និងអ្នកបើកបរយន្តហោះរបស់ក្រុមហ៊ុនអាកាសចរណ៍អាមេរិកនានា ដូចជាក្រុមហ៊ុន American airline ក្រុមហ៊ុន Southwest airline និង United airline នៅទីក្រុង Renton រដ្ឋវ៉ាស៊ីនតោន ជាទីកន្លែងដំឡើងយន្តហោះ។ នេះបើតាមប្រភពផ្សេងៗ។
ប្រភពពីវិស័យអាកាសចរណ៍ម្នាក់បានប្រាប់ទីភ្នាក់ងារព័ត៌មាន AFP ដោយសុំមិនបញ្ចេញឈ្មោះថា៖ «ក្រុមហ៊ុន Boeing បានបញ្ចប់វិធានការកែតម្រូវជាចាំបាច់រួចហើយសម្រាប់យន្តហោះ MAX»។
ប្រភពមួយពីរដ្ឋាភិបាលអាមេរិកបានបន្ថែមថា រដ្ឋបាលអាកាសចរណ៍ស៊ីវិលសហព័ន្ធ (FAA) នឹងទទួលបានលទ្ធផលជួសជុលនេះ «នៅដើមសប្តាហ៍នេះ»។
នៅពេលត្រូវបានសួរថា តើដំណើរការទទួលស្គាល់ការជួសជុលនេះអាចចំណាយពេលយូរប៉ុនណាបន្ទាប់ពីលទ្ធផលជួសជុលនេះបានធ្លាក់ដល់ដៃអាជ្ញាធរនោះ ប្រភពនេះបានឲ្យដឹងថា មិនទាន់មានអ្វីត្រូវបានសម្រេចនៅឡើយទេ។
រដ្ឋបាល FAA បានបដិសេធធ្វើអត្ថាធិប្បាយ។
ការធ្លាក់យន្តហោះរបស់Lion Air នៅខែ តុលា ឆ្នាំមុន និងយន្តហោះ Ethiopian Airlines នៅខែនេះ បានបង្កើនក្តីបារម្ភអំពីការទទួលស្គាល់ពីសុវត្ថិភាពរបស់យន្តហោះ 737 MAX 8៕ AFP/KC