ភ្នំពេញ: ការដឹកជញ្ជូនអ្នកដំណើរតាមផ្លូវអាកាសបានធ្លាក់ចុះ ៦៨ ភាគរយ ខណៈការដឹកជញ្ជូនទំនិញតាមផ្លូវអាកាសវិញធ្លាក់ចុះ ៣០ ភាគរយក្នុងឆមាសទី ១ ឆ្នាំ ២០២០ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមក្រសួងសាធារណការ និងដឹកជញ្ជូន។
តួលេខដែលបញ្ចេញដោយលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនក្នុងកិច្ចប្រជុំរដ្ឋមន្ត្រីដឹកជញ្ជូន អាស៊ាន-ចិន កាលពីសប្តាហ៍កន្លងទៅបានបង្ហាញថា ប្រទេសកម្ពុជាទទួលបានអ្នកដំណើរតាមផ្លូវអាកាសចំនួន ១,៩៥ លាននាក់ក្នុងរយៈពេល ៦ ខែដំបូង ឆ្នាំ ២០២០ នេះធ្លាក់ចុះ ៦៨ ភាគរយ ខណៈការដឹកជញ្ជូនទំនិញមានចំនួន ២៥ ០០០ តោនធ្លាក់ចុះ ៣០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោក ខែក នរិនដា នាយកផ្នែកទំនាក់ទំនងសាធារណៈនៃក្រុមហ៊ុន Cambodia Airport ប្រាប់ភ្នំពេញប៉ុស្តិ៍កាលពីថ្ងៃចន្ទថា ការរឹតត្បិតការធ្វើដំណើរសកលលោកដែលជាវិធានការដើម្បីទប់ស្កាត់ការរីករាលដាលនៃជំងឺកូវីដ១៩ បានជះឥទ្ធិពលយ៉ាងធ្ងន់ធ្ងរដល់ការហោះហើរនៅអាកាសយានដ្ឋានអន្តរជាតិទាំង ៣ របស់ប្រទេសកម្ពុជាដែលបានបង្ហាញពីការធ្លាក់ចុះសរុប ៧៦,៥ ភាគរយក្នុងអំឡុងឆមាសទី ១ ឆ្នាំ ២០២០ ធៀបនឹងឆមាសទី ១ ឆ្នាំមុន។
លោកបន្តថា ការដឹកជញ្ជូនទំនិញតាមផ្លូវអាកាសទទួលរងផលប៉ះពាល់អវិជ្ជមាន ខណៈសេដ្ឋកិច្ចមាននិន្នាការធ្លាក់ចុះ។
លោកបញ្ជាក់ថា៖ «យើងមិនរំពឹងថាសកម្មភាពនៃការដឹកជញ្ជូននេះនឹងចាប់ផ្តើមមានកំណើនវិញរហូតដល់ត្រីមាសទី៣ ឬត្រីមាសទី ៤ ឆ្នាំ ២០២០ នេះឡើយ។ ក្នុងករណីណាក៏ដោយការចរាចរតាមផ្លូវអាកាសទំនងជាមិនត្រឡប់មកកម្រិតធម្មតាឆាប់ៗនោះទេ ឬដូចកម្រិតនៃកំណើនក្នុងឆ្នាំ ២០១៩ និងឆ្នាំមុនៗនោះឡើយ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) ប្រាប់ភ្នំពេញប៉ុស្តិ៍កាលពីថ្ងៃចន្ទថា ការធា្លក់ចុះអ្នកដំណើរ និងការដឹកទំនិញតាមផ្លូវអាកាសក្នុងរយៈពេលនេះ ដោយសារការបិទទិដ្ឋាការសម្រាប់អ្នកទេសចរដែលជាវិធានការរបស់រដ្ឋាភិបាលក្នុងការទប់ស្កាត់ការរាតត្បាតវីរុសកូរ៉ូណា។
លោកស្រីបញ្ជាក់ថា៖ «ការដឹកទំនិញក៏ដូចគ្នាដែរ កាលណាមិនមានអ្នកទេសចរចេញចូលច្រើនធ្វើឲ្យតម្រូវការទំនិញនានាក៏ធ្លាក់ចុះទៅតាមនោះដែរ»។
លោកស្រីបន្ថែមថា៖ «យើងនៅតែឃើញមានអ្នកធ្វើដំណើរមកប្រទេសកម្ពុជា ដើម្បីស្វែងរកឱកាសវិនិយោគ ដែលពួកគេរំពឹងថាអាចវិនិយោគលើអ្វីមួយនៅប្រទេសយើង ដូច្នេះទើបពួកគាត់ហោះហើរមកកម្ពុជា»។
លោកស្រីឲ្យដឹងថា សព្វថ្ងៃវិស័យទេសចរណ៍រងផលប៉ះពាល់យ៉ាងខ្លាំងដែលអាជីវកម្មប្រមាណ ៩០ ភាគរយត្រូវបានបិទទ្វារ។
លោក វ៉ា ស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ការរីករាលដាលជំងឺកូវីដ១៩ បានជះឥទ្ធិពលជាអវិជ្ជមានដល់វិស័យដឹកជញ្ជូនរបស់កម្ពុជាយ៉ាងខ្លាំង។
លោកបន្តថា រដ្ឋាភិបាលកំពុងខិតខំប្រឹងប្រែងកសាងហេដ្ឋារចនាសម្ព័ន្ធដើម្បីជួយអភិវឌ្ឍសេដ្ឋកិច្ចសង្គម ហើយខិតខំរកដំណោះស្រាយក្នុងការកាត់បន្ថយ ចំណាយថ្លៃដើមលើការដឹកជញ្ជូន និងភ័ស្តុភារកម្ម។
លោកថា៖ «វិស័យដឹកជញ្ជូនតាមផ្លូវអាកាសនឹងមិនងាយងើបឡើងវិញនោះទេ»។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានថ្លែងថាស្ថាប័ននេះនឹងជំរុញការអភិវឌ្ឍ ដឹកជញ្ជូនតាមផ្លូវអាកាសប្រកបដោយសុវត្ថិភាពខ្ពស់ស្របតាមបទដ្ឋានអន្តរជាតិ៕ LA