.jpg)
បុគ្គលិកកំពុងអង្គុយមើលតាមតម្លៃសន្ទស្សន៍ភាគហ៊ុននៅការិយាល័យផ្សារហ៊ុននាពេលកន្លងមក។ រូបថត ហេង ជីវ័ន
ភ្នំពេញៈ អ្នកជំនាញជំរុញឲ្យក្រុមហ៊ុនចុះបញ្ជីក្នុងផ្សារមូលបត្រកម្ពុជា (CSX) គួរពិចារណាបង្កើនទំហំការបែងចែកភាគលាភប្រចាំឆ្នាំដល់អ្នកកាន់កាប់ភាគហ៊ុនរបស់ខ្លួនឲ្យបានខ្ពស់ជាងបរិមាណដែលធ្លាប់ផ្តល់ឲ្យកន្លងមកដើម្បីទាក់ទាញវិនិយោគិនឲ្យចាប់អារម្មណ៍ការជួញដូរនៅក្នុងផ្សារហ៊ុនដ៏ក្មេងខ្ចីនៅកម្ពុជាមួយនេះ។
ថ្លែងក្នុងវេទិកាក្រុមហ៊ុនចុះបញ្ជីជាលើកដំបូងស្ដីពី «សក្ដានុពលនៃកំណើនប្រកបដោយចីរភាព» លោក សេង ចាន់ធឿន នាយកគ្រប់គ្រងក្រុមហ៊ុនមូលបត្រ អេស ប៊ី អាយ រ៉ូយ៉ាល់ ស៊ីឃ្យូរីធី បានលើកឡើងថា មានកត្តាជាច្រើនដែលនាំឲ្យផ្សារមូលបត្រមិនសូវមានសកម្មភាពទិញ-លក់ខ្លាំង ដែលត្រូវការមានដំណោះស្រាយជាច្រើន។
យ៉ាងណាក៏ដោយក្នុងចំណោមដំណោះស្រាយមួយចំនួនលោកបញ្ជាក់ថា ក្រុមហ៊ុនចុះបញ្ជីគួរបង្កើនការផ្តល់ទំហំភាគលាភទៅអ្នកកាន់កាប់ភាគហ៊ុនដើម្បីទាក់ទាញឲ្យមានសកម្មភាពទិញ-លក់។
ខណៈលោកមិនបានបញ្ជាក់ពីអត្រាជាក់ស្តែងដែលក្រុមហ៊ុនគួរកំណត់លោកថា បច្ចុប្បន្ន គ្រឹះស្ថានហិរញ្ញវត្ថុបានផ្តល់អត្រាការប្រាក់ជាមធ្យមដល់ទៅ ៧ ភាគរយក្នុង ១ ឆ្នាំ សម្រាប់ការដាក់ប្រាក់បញ្ញើជាប្រាក់រៀលដែលអត្រានេះអាចជាអត្រាគោលសម្រាប់ក្រុមហ៊ុនចុះបញ្ជី។
លោកថ្លែងថា៖ «គឺក្រុមហ៊ុនខ្លួនឯងអាចជួយបង្កើនសន្ទនីយភាពទីផ្សារ [មានការផ្គូរផ្គងរវាងអ្នកលក់ និងអ្នកទិញ]។ ផ្តល់[ភាគលាភ] ឲ្យគេច្រើនជាងមុន ពេលហ្នឹងវិនិយោគិននឹងចូលមកទីផ្សារច្រើនជាងមុន»។
លោកបន្តជាឧទាហរណ៍ថា ករណីការបែងចែកភាគលាភទាបរបស់ក្រុមហ៊ុនរដ្ឋាករទឹកស្វយ័តក្រុងភ្នំពេញ PPWSA អាចជាឧទារហរណ៍បង្ហាញពីការមិនសូវចាប់អារម្មណ៍ទិញ-លក់ដោយសារភាគលាភទាប។
លោកថ្លែងថា៖ «ប្រសិនបើយើងនៅតែផ្តល់ភាគលាភទាប វានឹងនៅតែពិបាកក្នុងការទាក់ទាញអ្នកវិនិយោគ។ អ៊ីចឹង ខ្ញុំគិតថាក្រុមហ៊ុនគួរតែបង្កើនការបែងចែកភាគលាភ»។
បច្ចុប្បន្នមានក្រុមហ៊ុនចុះបញ្ជី ៥ នៅ CSX។ ក្រុមហ៊ុន ២ ក្នុងចំណោមក្រុមហ៊ុនទាំងនោះបានសន្យាថា នឹងបែងចែកភាគលាភដល់ភាគទុនិកឯកជនរបស់ខ្លួន ៥ ភាគរយប្រចាំឆ្នាំក្នុងរយៈ ៥ ឆ្នាំ និង ៣ ឆ្នាំ នៃក្រុមហ៊ុននីមួយៗ។ កំពង់ផែស្វយ័តភ្នំពេញ (PPAP) សន្យាបែងចែកភាគលាភ ៥ ភាគរយប្រចាំឆ្នាំក្នុងរយៈពេល ៥ ឆ្នាំដំបូង ហើយកំពង់ផែស្វយ័តក្រុងព្រះសីហនុ (PAS) ៥ ភាគរយក្នុងរយៈពេល ៣ ឆ្នាំដំបូង។
អ្នកស្រី ជ័យ សុគន្ធា នាយិកាទីផ្សារ PAS ដែលបានបែងចែកភាគលាភ ៧,៩ ភាគរយកាលពីឆ្នាំមុន បានឲ្យដឹងថា មានទំនាក់ទំនងវិជ្ជមានរវាងការបែងចែកភាគលាភ និងតម្លៃភាគហ៊ុន។ អ្នកស្រីសង្កេតឃើញថា នៅពេលក្រុមហ៊ុនប្រកាសផ្ដល់ភាគលាភកាន់តែខ្ពស់ តម្លៃភាគហ៊ុនរបស់ PAS កើនឡើងខ្ពស់ជាងមុនផងដែរ។
អ្នកស្រីលើកឡើងថា៖ «នៅពេលយើងទទួលបានប្រាក់ចំណេញកាន់តែច្រើន យើងនឹងបែងចែកភាគលាភនៅក្នុងអត្រាកាន់តែខ្ពស់ផងដែរ។ យើងក៏ចង់ទាក់ទាញក្រុមវិនិយោគិនផងដែរ»។
លោក រស់ គឹមលាង អគ្គនាយករង PPWSA បានយល់ស្របថា ការផ្ដល់ភាគលាភកាន់តែខ្ពស់អាចជួយទាក់ទាញក្រុមវិនិយោគិនឲ្យធ្វើការជួញដូរ ប៉ុន្តែថា ក្រុមហ៊ុនរបស់លោកមានការពិបាកមួយចំនួន ក្នុងការផ្ដល់ភាគលាភកាន់តែច្រើន។ ខណៈ PPWSA បានផ្ដល់ភាគលាភ ៣,៩៩ ភាគរយកាលពីឆ្នាំមុន លោក គឹមលាង បានឲ្យដឹងថា អត្រានេះមិនអាចធ្វើឲ្យភាគហ៊ុនិកពេញចិត្តនោះទេ។
លោកបានបញ្ជាក់ថា៖ «ការពិតគឺថា យើងត្រូវការប្រាក់កាន់តែច្រើនសម្រាប់ការអភិវឌ្ឍហេដ្ឋារចនាសម្ព័ន្ធ ដូច្នេះយើងត្រូវការទុនបម្រុងបានពីប្រាក់ចំណេញ សម្រាប់មូលនិធិដៃគូរបស់យើង នៅពេលយើងខ្ចីប្រាក់ពីដៃគូអភិវឌ្ឍន៍។ នេះគឺជាមូលហេតុ ដែលយើងពិបាកក្នុងការផ្តល់ភាគលាភឲ្យបានខ្ពស់»៕LA
