ភ្នំពេញៈ ការស្ថាបនាផ្លូវក្រវាត់ក្រុងខ្សែទី ៣ ដែលមានប្រវែងជិត ៥៣ គីឡូម៉ែត្រតភ្ជាប់ពីផ្លូវជាតិលេខ ៤ កាត់តាមផ្លូវជាតិលេខ ៣ ឆ្ពោះទៅផ្លូវជាតិលេខ ១ រហូតមកដល់ពេលនេះសម្រេចបានប្រមាណជិត ៤០ ភាគរយហើយ ខណៈការសាងសង់នឹងបញ្ចប់តាមផែនការនៅចុងឆ្នាំ ២០២១ ខាងមុខ។ នេះបើតាមអ្នកនាំពាក្យក្រសួងសាធារណការ និងដឹកជញ្ជូន។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន កាលពីថ្ងៃចន្ទបានប្រាប់ភ្នំពេញប៉ុស្តិ៍ថា ការសង់ផ្លូវក្រវាត់ក្រុងនេះកំពុងមានដំណើរការទៅមុខតាមផែនការ ដោយមិនមានការរអាក់រអួល ឬពន្យារពេលដោយសារការផ្ទុះឡើងនៃជំងឺកូវីដ ១៩ នោះទេ។
លោកបន្តថា ផ្លូវខ្សែក្រវាត់ទី ៣ នេះមិនត្រឹមតែអាចបញ្ជៀសការកកស្ទះចរាចរណ៍ក្នុងការដឹកជញ្ជូនទំនិញឆ្លងកាត់ភ្នំពេញប៉ុណ្ណោះទេ ប៉ុន្តែវាថែមទាំងជាផ្លូវសេដ្ឋកិច្ចអន្តរជាតិសម្រាប់ការដឹកទំនិញឆ្លងកាត់ប្រទេសកម្ពុជា ពីសំណាក់ប្រទេសក្នុងតំបន់ផងដែរ។
លោកថ្លែងថា៖ «សរុបមកដល់ពេលនេះការសាងសង់សម្រេចបានប្រមាណ ៣៩,៧៦ ភាគរយហើយ។ លទ្ធផលនៃការសាងសង់ គឺស្របតាមផែនការដែលបានកំណត់»។
លោកបន្ថែមថា ផ្លូវក្រវាត់ក្រុងខ្សែទី ៣ នឹងចូលរួមចំណែកយ៉ាងច្រើនក្នុងការជួយជំរុញកំណើនសេដ្ឋកិច្ចកម្ពុជា ខណៈវានឹងទាក់ទាញរោងចក្រ សហគ្រាស តំបន់ឧស្សាហកម្ម និងគម្រោងវិនិយោគធំៗជាច្រើនបែរឆ្ពោះទៅកាន់ទីនោះ។ លោកប្រាប់ទៀតថា ក្រៅពីជួយការកាត់បន្ថយការកកស្ទះចរាចរណ៍នៅកណ្តាលក្រុងភ្នំពេញ វាក៏នឹងជួយកាត់បន្ថយពេលវេលា និងការចំណាយថវិកាក្នុងការដឹកជញ្ជូនបានមួយកម្រិតដែរ។ លោកអះអាងថា៖ «ផ្លូវនេះនឹងផ្តល់អត្ថប្រយោជន៍យ៉ាងច្រើនសម្រាប់សេដ្ឋកិច្ចជាតិ និងប្រជាជន»។
បញ្ហាហេដ្ឋារចនាសម្ព័ន្ធផ្លូវថ្នល់ និងការចំណាយខ្ពស់លើការដឹកជញ្ជូនតែងត្រូវបានអ្នកវិនិយោគលើកឡើងថា គឺជាមូលហេតុចម្បងមួយដែលធ្វើឲ្យថ្លៃដើមផលិតនៅកម្ពុជាមានកម្រិតខ្ពស់ជាងប្រទេសជិតខាង និងពិបាកប្រកួតប្រជែងលើទីផ្សារអន្តរជាតិ។
ប្រធានសមាគមភ័ស្តុភារកម្មកម្ពុជា (CLA) លោក ស៊ិន ចន្ធី បាននិយាយថា ខណៈបច្ចុប្បន្នទីតាំងផែស្ងួត និងក្រុមហ៊ុនដឹកជញ្ជូនភាគច្រើនសុទ្ធតែនៅក្នុងក្រុង ឬក្បែរក្រុងភ្នំពេញដែលវាតែងធ្វើឲ្យការដឹកជញ្ជូនជួបបញ្ហាជាច្រើន ពិសេសការខកខានពេលវេលា ដោយសារស្ទះចរាចរណ៍។ លោកបន្តថា ពេលមានផ្លូវថ្មីធំទូលាយនឹងជំរុញឲ្យវិស័យដឹកជញ្ជូននៅកម្ពុជាកាន់តែមានសក្តានុពល ហើយតម្លៃដឹកជញ្ជូនក៏អាចធ្លាក់ចុះមួយកម្រិតដែរ។
លោកបានថ្លែងថា៖ «ប្រាកដណាស់ផ្លូវខ្សែក្រវាត់ទី ៣ នឹងជួយច្រើនដល់វិស័យដឹកជញ្ជូននៅកម្ពុជា»។ លោកបន្តថា៖ «ខ្ញុំគិតថាពេលផ្លូវនេះបើកដំណើរការនឹងមានផែស្ងួត ក្រុមហ៊ុនដឹកជញ្ជូន និងតំបន់សេដ្ឋកិច្ចពិសេសមួយចំនួនលេចរូបរាងនៅទីនោះ»។
លោកប្រាប់ទៀតថា ឧត្តមភាពក្នុងការប្រកួតប្រជែងតម្លៃសម្រាប់ផលិតផលនាំចេញពីកម្ពុជាទៅកាន់ទីផ្សារអន្តរជាតិ ក៏នឹងកើនឡើងផងដែរ ពេលការដឹកជញ្ជូនមានភាពឆាប់រហ័ស និងតម្លៃទាបជាងមុន។
ផ្លូវក្រវាត់ក្រុងខ្សែទី ៣ ដែលមានប្រវែងសរុប ៥២,៩៨៣ គីឡូម៉ែត្រនេះ បានបើកការដ្ឋានសាងសង់កាលពីខែមករា ឆ្នាំ ២០១៩ ដោយលោកនាយករដ្ឋមន្ត្រី ហ៊ុន សែន៕