ក្រុងវ៉ាស៊ីនតោនៈ លោកប្រធានាធិបតី ដូណាល់ ត្រាំ បានថ្លែងកាលពីថ្ងៃចន្ទថា លោកអាចធ្វើឲ្យប្រទេសម៉ិកស៊ិកបញ្ឈប់លំហូរចូលរបស់ជនអន្តោប្រវេសន៍គ្មានឯកសារចូលក្នុងអាមេរិកធ្វើជាលក្ខខណ្ឌមួយ សម្រាប់ការចរចាជាថ្មីនូវកិច្ចព្រមព្រៀងពាណិជ្ជកម្មសេរី អាមេរិកខាងជើង (NAFTA)។
លោកបានសរសេរនៅលើបណ្តាញសង្គម Twitter ថា៖ «ម៉ិកស៊ិកដែលច្បាប់ស្ដីពីអន្ដោប្រវេសន៍របស់ប្រទេសនេះមានភាពតឹងតែងយ៉ាងខ្លាំងនោះ ត្រូវតែបញ្ឈប់ប្រជាជនមិនឲ្យធ្វើដំណើរតាមរយៈម៉ិកស៊ិក និងចូលក្នុងទឹកដីអាមេរិក»។
លោកបន្ថែមថា៖ «យើងអាចធ្វើឲ្យបញ្ហានេះទៅជាលក្ខខណ្ឌថ្មីមួយនៃកិច្ចព្រមព្រៀង NAFTA ថ្មីរបស់យើង។ ប្រទេសរបស់យើងមិនអាចទទួលយកអ្វីកំពុងកើតឡើងបានទេ យើងត្រូវតែផ្ដល់មូលនិធិកសាងជញ្ជាំងព្រំដែន ឲ្យបានឆាប់រហ័សផងដែរ»។
ការប្រកាសតាមប្រព័ន្ធបណ្តាញសង្គមនេះបានធ្វើឡើងជាងមួយសប្ដាហ៍ បន្ទាប់ពីមេដឹកនាំអាមេរិករូបនេះបានថ្លែងថា ការចរចាដើម្បីកែលម្អកិច្ចព្រមព្រៀងពាណិជ្ជកម្មសេរីអាមេរិកខាងជើងជាមួយប្រទេសម៉ិកស៊ិក និងកាណាដាកំពុង «ដំណើរការទៅបានយ៉ាងប្រសើរបំផុត» ទោះបីជាលោកបានថ្លែងថា មិនមានការកំណត់ពេលវេលាដើម្បីបញ្ចប់កិច្ចព្រមព្រៀងថ្មីនេះក៏ដោយ។
ការគំរាមកំហែងរបស់លោក ត្រាំ ថានឹងចាកចេញពីកិច្ចព្រមព្រៀង NAFTA បានធ្វើឲ្យមានការបារម្ភទៅដល់ឧស្សាហកម្មអាមេរិក និងសមាជិករបស់គណបក្សសាធារណរដ្ឋផ្ទាល់របស់លោកដែលបានឲ្យដឹងថា អាមេរិកបានទទួលអត្ថប្រយោជន៍ពីកិច្ចព្រមព្រៀងនេះ។
ការគំរាមកំហែងនេះបានធ្វើឲ្យមានការបារម្ភដល់ប្រទេសកាណាដា និងម៉ិកស៊ិកផងដែរ៕ LA