The Phnom Penh Post Search

Search form




Logo of Phnom Penh Post newspaper Phnom Penh Post - ការទាញ​យក​តំណក់​ប្រេង​ដំបូង​របស់​កម្ពុជា​​​ កំពុង​ដំណើរការ​តាម​ផែនការ

ការទាញ​យក​តំណក់​ប្រេង​ដំបូង​របស់​កម្ពុជា​​​ កំពុង​ដំណើរការ​តាម​ផែនការ

Content image - Phnom Penh Post
កម្មករ​ធ្វើ​ការ​របស់​ក្រុមហ៊ុនប្រេង KrisEnergy នៅ​ប្រទេស​បង់ក្លាដេស។

ការទាញ​យក​តំណក់​ប្រេង​ដំបូង​របស់​កម្ពុជា​​​ កំពុង​ដំណើរការ​តាម​ផែនការ

ភ្នំពេញៈ ក្រុមហ៊ុន KrisEnergy ដែល​ទទួល​សិទ្ធិ​អភិវឌ្ឍ​អណ្តូង​ប្រេងកាត​នៅ​ប្លុក A របស់​កម្ពុជា​កំពុង​ដើរ​តាម​ផែនការ​ក្នុង​ការទាញ​យក​​តំណក់​ប្រេងឆៅ​ជា​លើកដំបូង​នៅ​កម្ពុជា​ចុងឆ្នាំ​ ២០១៩ នេះ ខណៈ​ក្រុមហ៊ុន​បាន​រៀបចំ​ហេដ្ឋារចនាសម្ព័ន្ធ​សំខាន់ៗ​ក្នុង​ការគាំទ្រ​ដល់​ការផលិត​ប្រេង​ជិត​រួចរាល់​។ នេះ​បើតាម​អ្នក​នាំពាក្យ​ក្រសួង​រ៉ែ និង​ថាមពល​។

លោក ជៀប សួរ អ្នក​នាំពាក្យ​ក្រសួង​រ៉ែ និង​ថាមពល​បាន​ឲ្យ​ដឹង​កាលពី​ថ្ងៃ​ម្សិលមិញ​ថា មន្ត្រី​ជំនាញ​របស់​ក្រសួង​ទើប​បាន​ប្រជុំ​ជាមួយ​ក្រុម​ការងារ​របស់​ក្រុមហ៊ុន KrisEnergy ដើម្បី​ពិនិត្យ​មើល​ការងារ​របស់​ក្រុមហ៊ុន​ដែល​សម្រេច​បាន​ថ្មីៗ និង​ផ្ទៀងផ្ទាត់​នឹង​ផែនការ​ក្នុងការ​ឈានដល់​ការទាញ​យក​តំណក់​ប្រេង​លើកដំបូង​។

លោក​បញ្ជាក់​ថា​សកម្មភាព​ការងារ​បាន​ឆ្លើយតប​នឹង​ផែនការ​ដែល​អាច​ធ្វើឲ្យ​សកម្មភាព​ទាញ​យក​ដំណក់​ប្រេងឆៅ​ជា​លើកដំបូង​នឹង​ធ្វើ​ឡើង​នៅ​ចុង​ឆ្នាំ​ ២០១៩ នេះ​តាម​ការគ្រោងទុក​។ តែ​លោក​បញ្ជាក់​ថា ការធ្វើ​ពាណិជ្ជកម្ម​ពី​ផលិតកម្ម​ប្រេង​របស់​ក្រុមហ៊ុន​នេះ​នឹង​អាច​ត្រូវ​រង់ចាំ​រហូត​ឆ្នាំ​ ២០២០​។

លោក​បញ្ជាក់​ថា​៖ «​ហេដ្ឋារចនាសម្ព័ន្ធ​សំខាន់ៗ​ដើម្បី​ឈាន​ដល់​ការផលិត​ប្រេង​បាន​រៀបចំ​បាន​ច្រើន​ហើយ​អ៊ីចឹង​ហើយ តាម​តារាង​ពេលវេលា [​ក្រុមហ៊ុន KrisEnergy] នឹង​អាច​ផលិត​តំណក់​ប្រេង​ដំបូង​នៅ​ចុង​ឆ្នាំ​ ២០១៩ ហ្នឹងហើយ​»​។

យោង​តាម​ការបញ្ជាក់​របស់​លោក ជៀប សួរ ហេដ្ឋារចនាសម្ព័ន្ធ​ដើម្បី​ដំណើរការ​ទាញ​យក​ប្រេង​សម្រាប់​ផលិតកម្ម​មាន​កត្តា​ ៤ ​សំខាន់ៗ​។ កត្តា​ទាំង​នោះ​រួមមាន​ទី​ ១ ផ្លេតហ្វម​ក្បាល​អណ្តូង (​ជា​បណ្តាញ​ដើម្បី​ភ្ជាប់​ពី​មាត់​អណ្តូង​ទៅក្នុង​អណ្តូង​) ទី ២ គឺ​ការធ្វើ Drilling Rig (​ម៉ាស៊ីន​សម្រាប់​ភ្ជាប់​ទៅ​ផ្លេតហ្វម ដើម្បី​ធ្វើការ​ខួងអណ្តូង​ដើម្បី​យក​ប្រេង​មក​)​។ ទី​បី Production Barge (​ជា​កប៉ាល់​មាន​ម៉ាស៊ីន​សម្រាប់​ធ្វើ​ផលិតកម្ម​ញែក​ប្រេង ទឹក ឧស្ម័ន​ចេញ​ដើម្បី​ញែក​យក​ប្រេងឆៅ​) និង floating production storage and offloading (​កប៉ាល់​សម្រាប់​ស្តុក និង​បញ្ជូន​ប្រេង​ចេញលក់​)​។

លោក ជៀប សួរ បញ្ជាក់​ថា​ក្រុមហ៊ុន KrisEnergy បាន​ជ្រើសរើស​ក្រុមហ៊ុន​ជំនាញ​រួចហើយ​សម្រាប់​ធ្វើ​កិច្ចការ​សាងសង់​ហេដ្ឋារចនាសម្ព័ន្ធ​ទី​ ១ ទី​ ២ និង​ទី​ ៣ ខណៈ កំពុង​បើក​ឲ្យ​មាន​ការដេញថ្លៃ​សម្រាប់​ដំណាក់កាល​ទី​បួន​ដែល​រំពឹង​ថា នឹង​ជ្រើស​បាន​ក្នុង​ពេល​ឆាប់ៗ​។

ក្រុមហ៊ុន KrisEnergy បាន​ចូល​មក​ក្នុង​ប្លុក A កាលពី​ឆ្នាំ​ ២០១០ ហើយ​បាន​ទិញ​យក​ភាគហ៊ុន Chevron ក្នុង​តម្លៃ​ ៦៥ លាន​ដុល្លារ​នៅក្នុង​ប្លុក A កាលពី​ឆ្នាំ ២០១៤ ដែល​ធ្វើឲ្យ​ក្រុមហ៊ុន​នេះ​កាន់កាប់​ភាគហ៊ុន​ស្ទើរតែ​ទាំងអស់​ក្នុង​ប្លុក​នេះ​។ KrisEnergy កាន់កាប់ ៩៥ ភាគរយ​នៃ​អណ្ដូងប្រេង​អប្សរា នៅ​ប្លុក A ខណៈ​រដ្ឋាភិបាល​កម្ពុជា​កាន់កាប់​ភាគហ៊ុន​នៅ​សល់​ ៥ ភាគរយ​។

ប្លុក A ត្រូវ​បាន​ជឿជាក់​ថា​នឹង​មាន​ប្រេង​ប្រហែល ៣០ ​លាន​បារ៉ែល​ដែល​នឹង​ត្រូវ​បាន​ទាញ​យក​ក្នុង​រយៈពេល ៩ ​ឆ្នាំ​៕

អត្ថបទគួរចាប់អារម្មណ៍