ភ្នំពេញ៖ ស្របពេលការកើនឡើងចំនួនអ្នកឆ្លងជំងឺកូវីដ ១៩ ថ្មី ជាពិសេសជាប់ទាក់ទងនឹងព្រឹត្តិការណ៍សហគមន៍ ២០ កុម្ភៈ គ្រឹះស្ថានហិរញ្ញវត្ថុទាំងឡាយនៅកម្ពុជា (FIs) បានបង្ហាញពីការកើនឡើងយ៉ាងខ្លាំងនៃប្រតិបត្តិការឌីជីថល ជាពិសេសក្នុងអំឡុងពេលការបិទខ្ទប់ថ្មីៗនេះ។
រដ្ឋាភិបាលកម្ពុជា បានប្រកាសកាលពីថ្ងៃទី ១៤ បិទខ្ទប់ទីក្រុងភ្នំពេញទាំងមូល និងក្រុងតាខ្មៅ ដែលចាប់ផ្ដើមអនុវត្តចាប់ពីថ្ងៃទី ១៥ ខែ មេសា ឆ្នាំ ២០២១ ដល់ថ្ងៃទី ២៨ ខែ មេសា ឆ្នាំ ២០២១ ដើម្បីគ្រប់គ្រងការរីករាលដាលជំងឺកូវីដ ១៩។
ទន្ទឹមនឹងនេះ ធនាគារជាតិនៃកម្ពុជា បានចេញសេចក្ដីប្រកាសព័ត៌មានមួយកាលពីថ្ងៃទី ២០ ខែមេសា ជំរុញឲ្យ FIs ត្រូវប្រើប្រាស់ការទូទាត់អេឡិចត្រូនិកឲ្យបានច្រើនតាមដែលអាចធ្វើបាន ជាពិសេសការប្រើប្រាស់ការទូទាត់តាមទូរស័ព្ទចល័តដែលមានសុវត្ថិភាព មានភាពងាយស្រួល និងរហ័សបំផុត។
លោក កាំង តុងងី ប្រធានសមាគមមីក្រូហិរញ្ញវត្ថុកម្ពុជា (CMA) ដែលជាប្រធានផ្នែកទំនាក់ទំនងសមាគម CMA បានប្រាប់ ភ្នំពេញ ប៉ុស្ដិ៍ នៅថ្ងៃនេះថា សមាគមនេះជានិច្ចកាលជំរុញឲ្យមានការប្រើប្រាស់ឌីជីថលក្នុងចំណោមសមាជិកជាការទូទាត់ដោយមិនប្រើសាច់ប្រាក់ (cashless payment) ឬការទូទាត់ឌីជីថល ដោយសារតែវាមានសារៈសំខាន់បំផុតចំពោះ MFIs គឺវាអាចជួយកាត់បន្ថយការចំណាយ និងបង្កើនប្រសិទ្ធភាពការងាររបស់ពួកគេ។
លោកថ្លែងថា៖ «ក្នុងអំឡុងពេលការបិទខ្ទប់នេះ ការទូទាត់គ្មានសាច់ប្រាក់មានសារៈសំខាន់ជាងការទូទាត់ដែលបានធ្វើកន្លងមក ដើម្បីកាត់បន្ថយការរីករាលដាលជំងឺកូវីដ ១៩ ដែលអាចកើតឡើង។ ហើយទោះយ៉ាងណា វាសម្រាប់ FIs ជាច្រើន មិនមានកម្មវិធីឌីជីថលខ្លួនឯងសម្រាប់អតិថិជន ពួកគេអាចមានដៃគូជាមួយក្រុមហ៊ុនផ្ញើប្រាក់បញ្ញើ ឬ FIs ធំៗផ្សេងទៀតជាមួយកម្មវិធីឌីជីថលក្នុងការអនុញ្ញាតឲ្យអតិថិជនរបស់ពួកគេបង់ប្រាក់ពីចម្ងាយបាន»។
លោកបានពន្យល់ថា ក្នុងអំឡុងពេលនៃការបិទខ្ទប់នេះ អតិថិជនដែលមានបំណងសងប្រាក់កម្ចីរបស់ពួកគេ នៅតែអាចបង់ត្រឡប់ទៅ MFIs បានតាមរយៈគ្រឺស្ថាន AMK, Wing, ToanChet App របស់ធនាគារអេស៊ីលីដា ABA ឬបណ្ដាញឌីជីថលរបស់ FI ផ្សេងទៀត ខណៈដែលបុគ្គលិករបស់ FI មិនត្រូវអនុញ្ញាតឲ្យធ្វើដំណើរបានផងដែរ។
លោកក៏បានពន្យល់បន្ថែមថា បច្ចុប្បន្នកម្មវិធី Fintech ថ្មីដែលត្រូវបានអភិវឌ្ឍដោយ NBC ដែលហៅថា «បាគង» នៅពេលនេះ គឺជាកម្មវិធីឌីជីថលសំខាន់បំផុតរបស់ FIs ដែលត្រូវតភ្ជាប់។
លោក សាយ សូនី ប្រធានប្រតិបត្តិការគ្រឹះស្ថានមីក្រូហិរញ្ញវត្ថុប្រាសាក់ បានប្រាប់ ភ្នំពេញ ប៉ុស្ដិ៍ នៅថ្ងៃនេះថា បច្ចុប្បន្នអតិថិជនរបស់លោកអាចប្រើប្រាស់កម្មវិធី Prasac Mobile និងកម្មវិធីធនាគារអ៊ីនធឺណិត ដើម្បីធ្វើប្រតិបត្តិការគ្មានសាច់ប្រាក់ប្រចាំថ្ងៃ ដូចជាការផ្ទេរប្រាក់ ការទូទាត់វិក្កយបត្រនានា ព្រមទាំងការសងប្រាក់កម្ចីរបស់ពួកគេ។ សម្រាប់ប្រតិបត្តិការគ្មានសាច់ប្រាក់ គឺពួកគេអាចមកការិយាល័យ ឬសេវាបម្រើផ្ទាល់ខ្លួននៅបញ្ឈរម៉ាស៊ីនអេធីអឹមនៅទូទាំងប្រទេស។
លោកថ្លែងថា៖ «លើសពីនោះ យើងក៏ជាសមាជិករបស់ប្រព័ន្ធបាគង Retail Pay និងប្រព័ន្ធ CSS របស់ធនាគារជាតិ ដូច្នេះអតិថិជនអាចធ្វើប្រតិបត្តិការតាមធនាគារ ឬប្រតិបត្តិការអន្តរធនាគារជាមួយគ្រឹះស្ថានហិរញ្ញវត្ថុ និងធនាគារជាង ២០ ទៀត»។
លោកបន្តថា សម្រាប់ធនាគារចល័ត និងអ៊ីនធឺណិត អតិថិជនអាចធ្វើប្រតិបត្តិការមួយចំនួនដូចជា សាច់ប្រាក់ដោយប្រាក់កូដ ការផ្ទេរមូលនិធិ ការទូទាត់វិក្កយបត្រ ការបញ្ចូលប្រាក់ទូរស័ព្ទ ការសួរទឹកប្រាក់ និងរបាយការណ៍គណនី។ល។
លោកលើកឡើងថា ជាឧទាហរណ៍នៅត្រីមាសទី១ ឆ្នាំ ២០២១ អតិថិជនធ្វើប្រតិបត្តិការ ៣ ៩៣៣ ២១៤ ដង តាមរយៈធនាគារចល័ត និងអ៊ីនធឺណិតជាមួយនឹងចំនួនទឹកប្រាក់ជាង ៧៨ លានដុល្លារ និងប្រតិបត្តិការ ៣០៥ ១៦៨ ដង នៅលើម៉ាស៊ីនអេធីអឹមជាមួយទឹកប្រាក់ជិត ២៥ លានដុល្លារ។
ធនាគារអេស៊ីលីដា បានប្រកាសកាលពីថ្ងៃទី ១៩ ខែមេសាថា ទោះបីជាការបិទខ្ទប់ទីក្រុងក៏ដោយ ក៏ធនាគារមួយនេះនៅតែរក្សាប្រតិបត្តិការ ខណៈដែលអតិថិជនអាចប្រើប្រាស់កម្មវិធីចល័ត។
លោកបញ្ជាក់ថា៖ «យើងសូមជូនដំណឹងដល់អតិថិជនទាំងអស់ និងសាធារណជនថា ក្នុងអំឡុងពេលនៃការបិទខ្ទប់បណ្ដោះអាសន្ននៅទីក្រុងភ្នំពេញ និងក្រុងតាខ្មៅ ធនាគារអេស៊ីលីដា នៅតែបន្តផ្ដល់សេវាធនាគារតាមរយៈកម្មវិធីទូរស័ព្ទ ACLEDA សេវាធនាគារបម្រើខ្លួនឯង និងម៉ាស៊ីនអេធីអឹម ២៤ ម៉ោង (24/7) ហើយគ្រប់សាខាទាំងអស់នៅតែបើកដំណើរការជាធម្មតា។ ក្នុងអំឡុងពេលនេះ សាខាទាំង ៨ នៅទីក្រុងភ្នំពេញរបស់យើង នឹងបើកដំណើរការ ដើម្បីបម្រើអតិថិជន»។
ទោះយ៉ាងណា យោងតាមលោក តុងងី CMA មិនមានទិន្នន័យជាក់លាក់ស្ដីពីនិន្នាការនៃការប្រើប្រាស់ការទូទាត់ឌីជីថលនៅឡើយទេ ក្នុងអំឡុងពេលការបិទខ្ទប់នេះ ប៉ុន្តែលោកអង្កេតឃើញមានការកើនឡើងគួរឲ្យកត់សម្គាល់។
លោកបន្តថា ការិយាល័យ MFI ភាគច្រើនត្រូវបានបិទនៅក្នុងតំបន់បិទខ្ទប់ ប៉ុន្តែការិយាល័យទាំងនេះមានសេវាម៉ាស៊ីនអេធីអឹម កំពុងព្យាយាមធ្វើឲ្យប្រាកដថា អតិថិជនរបស់ពួកគេអាចដកប្រាក់របស់ពួកគេបាន ២៤ ម៉ោង (24/7)។
បើយោងតាមរបាយការណ៍ប្រចាំឆ្នាំ ២០២០ របស់ធនាគារជាតិនៃកម្ពុជា ទ្រព្យសកម្មសរុបនៅក្នុងធនាគារ និងគ្រឹះស្ថានមីក្រូហិរញ្ញវត្ថុ (MFIs) របស់ប្រទេសកម្ពុជា បានកើនឡើងដល់ ៥៩,៤ ពាន់លានដុល្លារ កាលពីចុងឆ្នាំមុន កើនឡើង ១៥,៧ ភាគរយ ធៀបនឹងចុងឆ្នាំ ២០១៩។
កម្ចីនៅក្នុងធនាគារ និង MFIs បានកើនឡើង ១៤,៨ ភាគរយដល់ ៣៧,៣ ពាន់លានដុល្លារ ត្រឹមចុងឆ្នាំមុន ខណៈដែលប្រាក់បញ្ញើបានកើនឡើង ១៥,៤ ភាគរយដល់ ៣៣,៨ ពាន់លានដុល្លារ៕LA