.jpg)
ជីកសិកម្មជាទូទៅត្រូវបានប្រជាកសិករប្រើប្រាស់ដើម្បីបង្កើនគុណភាព និងបរិមាណផលិតផល។ រូបថត ហ្វេសប៊ុក
ភ្នំពេញៈ កម្ពុជាបាននាំចូលជី និងថ្នាំកសិកម្មក្នុងបរិមាណជាង ១,២ លានតោនកាលពីឆ្នាំ ២០១៩ កើនជាង ៩ ភាគរយបើធៀបទៅនឹងឆ្នាំ ២០១៨ ដែលមានចំនួនជាង ១,១ លានតោន។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍បានឲ្យដឹងថា ក្នុងចំណោមនោះការនាំចូលជីកសិកម្មមានបរិមាណជាង ១,១៤ លានតោន និងថ្នាំកសិកម្មមានចំនួន ៨១ ០៩៧ តោន។
បើយោងតាមរបាយការណ៍កម្ពុជាបានធ្វើការនាំចូលជី និងថ្នាំកសិកម្មពីក្រៅប្រទេសជាមធ្យមជាង ៩ ម៉ឺនតោនក្នុង ១ ខែ ដើម្បីបម្រើសេចក្តីត្រូវការក្នុងវិស័យកសិកម្ម។ ជី និងថ្នាំកសិកម្មប្រមាណ ២ ៦០០ ប្រភេទត្រូវនាំចូលមកកម្ពុជា។
លោក ជីវ ប៉ោហ័រ ប្រធានក្រុមហ៊ុន ជីវ ប៉ោហ័រ អ៊ិចផត អ៊ិមផត ដែលក្រុមហ៊ុននាំចូលជីប្រូតេអ៊ីន សញ្ញាខ្ទីងមាស (CPH) ពីប្រទេសថៃបានប្រាប់ភ្នំពេញប៉ុស្តិ៍ កាលពីថ្ងៃអង្គារថា ក្រុមហ៊ុនរបស់លោកបានដាក់ពាក្យស្នើសុំនាំចូលជីពីក្រសួងចំនួន ៦ ០០០ តោនក្នុង ១ ឆ្នាំ ប៉ុន្តែជាក់ស្តែងក្រុមហ៊ុនបានធ្វើការនាំចូលតែជាង ៣ ០០០ តោនប៉ុណ្ណោះកាលពីឆ្នាំ ២០១៩។
លោកបានថ្លែងថា៖ «ជីដែលក្រុមហ៊ុនខ្ញុំនាំចូលគឺលក់ដាច់ច្រើនចាប់ខែឧសភាដល់សីហាដែលជារដូវបង្កបង្កើនផល»។
ជាមួយគ្នានេះក្រុមហ៊ុននាំចូលជីធម្មជាតិជប៉ុនមួយដែលសុំមិនបញ្ចេញឈ្មោះបានឲ្យដឹងថា ក្រុមហ៊ុនលោកបាននាំចូលជីជាមធ្យម ២០ ០០០ តោនក្នុង ១ ឆ្នាំដើម្បីចែកចាយដល់ប្រជាកសិករនៅកម្ពុជា។ លោកប្រាប់ទៀតថា ទន្ទឹមនឹងការនាំចូលដ៏ច្រើននេះ បច្ចុប្បន្ននៅទីផ្សារកម្ពុជាក៏កំពុងមានការចរាចរជីបន្លំគុណភាពច្រើនផងដែរ។ លោកថ្លែងថា៖ «ការលក់ដូររបស់ក្រុមហ៊ុនខ្ញុំកំពុងតែពិបាក ព្រោះផលិតផលក្លែងក្លាយច្រើនពេក ហើយផលិតផលក្លែងក្លាយគេលក់ក្នុងតម្លៃថោកដែលនាំឲ្យប្រជាកសិករមួយចំនួនជ្រើសរើសជីតម្លៃទាបទៅប្រើប្រាស់»។
ក្រសួងកសិកម្ម រុក្ខាប្រមាញ់ និងនេសាទបានផ្តល់វិញ្ញាបនបត្របញ្ជាក់បញ្ជិកាថ្នាំ និងជីកសិកម្មចំនួន ២៣៥ ក្រុមហ៊ុននៅទូទាំងប្រទេសកាលពីឆ្នាំ ២០១៩។
មានក្រុមហ៊ុនសរុប ២២៦ ត្រូវបានក្រសួងកសិកម្មចេញលិខិតអនុញ្ញាតឲ្យនាំចូលជី និងថ្នាំកសិកម្មកាលពីឆ្នាំមុនក្នុងនោះក្រុមហ៊ុននាំចូលជីកសិកម្ម មានចំនួន ១០៧ និងក្រុមហ៊ុននាំចូលថ្នាំចំនួន ៦១ ព្រមទាំងក្រុមហ៊ុននាំចូលទាំងជី និងថ្នាំកសិកម្មចំនួន ៥៨។
យោងតាមក្រសួងកសិកម្មការបង្កបង្កើនផលស្រូវរដូវវស្សារបស់កសិករសម្រេចបានជាង ២,៧ លានហិកតានៃផែនការនៅទូទាំងប្រទេសកាលពីឆ្នាំមុន ខណៈការបង្កបង្កើនផលស្រូវប្រាំងសម្រេចចំនួនជាង ៥២ ម៉ឺនហិកតា។
ទន្ទឹមនឹងនេះការដាំដុះដំណាំរួមផ្សំ និងដំណាំឧស្សាហកម្មចំនួនសរុប ៧៣ ១៦៨ ហិកតាកាលពីឆ្នាំមុន។ នេះបើតាមក្រសួងកសិកម្ម៕ LA
