.jpg)
កម្មករចាប់ត្រីពីក្នុងបែ នៅតាមដងទន្លេសាប។ ហេង ជីវ័ន
ភ្នំពេញៈ កម្ពុជាបាននាំចូលផលិតផលជលផលពីប្រទេសវៀតណាម យ៉ាងតិចក្នុងតម្លៃ ៦០ លានដុល្លារ ក្នុង ១ ឆ្នាំៗ ដើម្បីបំពេញតម្រូវការនៅក្នុងស្រុក។ នេះបើយោងតាមសារព័ត៌មាន Vietnam Plus។
សារព័ត៌មានខាងលើបានឱ្យដឹងថា ទោះបីកម្ពុជាមិនមែនជាទីផ្សារសំខាន់សម្រាប់ផលិតផលជលផលវៀតណាម ក៏ការនាំចូលនេះបានរួមចំណែកយ៉ាងសំខាន់ដល់ស្ថិរភាពពាណិជ្ជកម្មឆ្លងដែនក៏ដូចជា ការបង្កើតការងារ និងប្រាក់ចំណូលសម្រាប់ប្រជាជនក្នុងតំបន់។
លោក លីម សុខហេង ម្ចាស់កសិដ្ឋានចិញ្ចឹមត្រីនៅក្នុងខណ្ខព្រែកព្នៅ រាជធានីភ្នំពេញដែលមានស្រះចិញ្ចឹមត្រីចំនួន ៤ បានប្រាប់ ភ្នំពេញ ប៉ុស្តិ៍ថា ត្រីប្រាមានតម្លៃប្រមាណ ៤ ៦០០ រៀល ក្នុង ១ គីឡូក្រាម ដោយតម្លៃនេះកើនឡើង បន្ទាប់ពីក្រសួងកសិកម្ម រុក្ខាប្រមាញ់ និងនេសាទបានប្រកាសផ្អាកនាំចូលត្រីចំនួន ៤ ប្រភេទពីប្រទេសវៀតណាមនាពេលកន្លងមក។
លោកបានបន្តថា កសិដ្ឋានលោកអាចប្រមូលផលត្រីប្រាក្នុង ១ រដូវបានជាង ១ ពាន់តោនដែលភាគច្រើនត្រូវបានផ្គត់ផ្គង់ទៅលើទីផ្សារក្នុងទីក្រុងភ្នំពេញ និងចែកចាយបន្តទៅបណ្តាខេត្តផ្សេងទៀត។
លោកបាននិយាយថា៖ «បើយើងទប់ការនាំចូលវានឹងជួយឱ្យផលិតផលក្នុងស្រុកមានទីផ្សារល្អ និងតម្លៃសមរម្យដែលអាចទទួលបានប្រាក់ចំណេញ។ ខ្ញុំគិតថា ត្រីនឹងមានទីផ្សារល្អទាល់តែមានគោលនយោបាយពីរដ្ឋាភិបាលបន្ថែមទៀតគាំទ្រដល់កសិករផ្នែកវារីវប្បកម្ម»។
ក្រសួងកសិកម្ម រុក្ខាប្រមាញ់ និងនេសាទកាលពីថ្ងៃទី ៨ ខែ មករា ឆ្នាំ ២០២១ បានចេញសេចក្តីប្រកាសព័ត៌មានមួយសម្រេចផ្អាកការនាំចូលត្រីមួយចំនួនដែលវារីវប្បករក្នុងស្រុកអាចផលិតបានច្រើនដូចជា ត្រីប្រា ត្រីពោ ត្រីអណ្តែង និងត្រីឆ្តោ ព្រមទាំងត្រីមួយចំនួនទៀត។ ទោះយ៉ាងណាពេលនេះក្រសួងកសិកម្មបានអនុញ្ញាតឱ្យមានការនាំចូលត្រី ៤ ប្រភេទនេះធម្មតាវិញហើយ។
លោក សុខ សុភ័ក្ត្រ រដ្ឋលេខាធិការនៃក្រសួងពាណិជ្ជកម្មបានឱ្យដឹងក្នុងកិច្ចប្រជុំពិគ្រោះយោបល់ទាក់ទងនឹងការផ្អាកជាបណ្តោះអាសន្ននូវការនាំចូលត្រីកាលពីខែមុនថា ក្រសួងកសិកម្មនៅតែបន្តការអនុញ្ញាតឱ្យនាំចូលផលិតផលជលផល ជាពិសេសត្រី ៤ ប្រភេទខាងលើនេះដោយផ្អែកតាមសេចក្តីត្រូវការក្នុងស្រុក និងឈរលើមូលដ្ឋានពាណិជ្ជកម្មសេរី។
លោកថ្លែងថា៖ «កម្ពុជាគួរពង្រឹងសមត្ថភាពប្រកួតប្រជែងវារីវប្បករក្នុងស្រុក ដោយឈរលើគោលការណ៍ពាណិជ្ជកម្មសេរី និងពង្រឹងការកសាង និងអនុវត្តបទប្បញ្ញត្តិបច្ចេកទេស ដើម្បីធានាគុណភាព និងសុវត្ថិភាពចំណីអាហារ»។
លោក សុខ រ៉ាដែន ប្រធានសមាគមវារីវប្បកម្មនៅកម្ពុជាបានប្រាប់ ភ្នំពេញ ប៉ុស្តិ៍ កាលពីខែមករាថា បច្ចុប្បន្នរដ្ឋាភិបាលកំពុងជំរុញ និងលើកទឹកចិត្តឱ្យបង្កើនសមត្ថភាពផលិតផលិតផលជលផលឱ្យបានកាន់តែច្រើនដើម្បីធានាការផ្គត់ផ្គង់នៅក្នុងស្រុកមុននឹងឈានដល់ការនាំចេញនៅពេលអនាគត។
លោក រ៉ាដែន បន្ថែមថា ទោះជាយ៉ាងណា រដ្ឋាភិបាលក៏ត្រូវជំរុញ និងលើកកម្ពស់ហេដ្ឋារចនាសម្ព័ន្ធក្នុងវិស័យជលផល ពិសេសប្រព័ន្ធទឹក។
លោកបាននិយាយឱ្យដឹងថា៖ «ដើម្បីជំរុញការនាំចេញឱ្យបានច្រើនលុះត្រាតែផលិតផលរបស់យើងមានគុណភាពល្អ យើងអាចផលិតចំណីត្រីដោយខ្លួនឯង និងមានតម្លៃទាបសមរម្យហើយតម្លៃអគ្គិសនីក៏ទាបដែរ ដើម្បីអាចប្រកួតប្រជែង»។
កម្ពុជានាំចេញផលនេសាទសរុប ៣ ៥៩០ តោន ទៅទីផ្សារអន្តរជាតិក្នុងតម្លៃសរុបជាង ៨,៣៣ លានដុល្លារ កាលពីឆ្នាំ ២០២០ ធ្លាក់ ៧៤,៥៣ ភាគរយ ធៀបនឹងឆ្នាំ ២០១៩ ដែលមានចំនួន ១៤ ១០០ តោន។ នេះបើតាមរបាយការណ៍របស់ក្រសួងកសិកម្ម៕ LA
