ក្រុងសេអ៊ូលៈ ទិន្នន័យបានបង្ហាញកាលពីថ្ងៃចន្ទថា ការនាំចូលស្រាបៀររបស់ប្រទេសកូរ៉េខាងត្បូងពីប្រទេសជប៉ុនបានធ្លាក់ចុះជិតដល់កម្រិតសូន្យកាលពីខែមុនក្នុងគ្រាដែលមានការធ្វើពហិការរបស់អ្នកទិញទំនិញប្រើប្រាស់ដែលបណ្ដាលឡើងដោយសារជម្លោះពាណិជ្ជកម្ម និងប្រវត្តិសាស្ដ្រដ៏ជូរចត់រវាងទីក្រុងសេអ៊ូល និងទីក្រុងតូក្យូ។
តួលេខបានពីវិទ្យាស្ថានផ្សព្វផ្សាយស្ថិតិពាណិជ្ជកម្មកូរ៉េ (KTSPI) បានបង្ហាញថា ក្រុមហ៊ុនរបស់ប្រទេសជប៉ុនជាច្រើនបាននាំចេញស្រាបៀរមានតម្លៃ ២២៣ ០០០ ដុល្លារទៅប្រទេសកូរ៉េខាងត្បូងកាលពីខែសីហាធ្លាក់ចុះ ៩៧ ភាគរយធៀបនឹង ៧,៥៧ លានដុល្លារកាលពីឆ្នាំមុន។
យោងតាមវិទ្យាស្ថាន KTSPI មុនពេលជម្លោះពាណិជ្ជកម្មដែលបានបង្កើនការបារម្ភអំពីទំនាក់ទំនងរវាងប្រទេសជិតខាងគ្នានេះដែលប្រទេសទាំង ២ នេះជាសម្ព័ន្ធមិត្តរបស់អាមេរិកនោះ ស្រាបៀរជប៉ុនគឺជាភេសជ្ជៈពេញនិយមរបស់ប្រជាជនកូរ៉េខាងត្បូងរយៈពេលយូរមកហើយ និងជាស្រាបៀរអាចជំនួសស្រាបៀរផ្ទាល់របស់ប្រទេសពួកគេបាន។ ការនាំចូលស្រាបៀរពីជប៉ុននេះស្ថិតនៅលើកំពូលតារាងនាំចូលចាប់តាំងពីឆ្នាំ ២០១០។
មន្ដ្រីមកពី KTSPI បានប្រាប់ទីភ្នាក់ងារព័ត៌មាន AFP ថា៖ «ចំណាត់ថ្នាក់ [នាំចូលស្រាបៀរ] របស់ប្រទេសជប៉ុនបានធ្លាក់ចុះទៅដល់ត្រឹមទី ១៣ កាលពីខែមុន»។ មន្ដ្រីដដែលបានបន្ថែមថា ស្រាបៀរមកពីប្រទេសចិន ហូឡង់ និងបែលហ្ស៊ីក នៅពេលនេះមានចំណែកធំបំផុតនៃការនាំចូលរបស់ប្រទេសកូរ៉េខាងត្បូង។
ទីក្រុងសេអ៊ូល និងទីក្រុងតូក្យូបានជាប់ពាក់ព័ន្ធក្នុងជម្លោះពាណិជ្ជកម្មចាប់តាំងពីខែកក្កដាមក នៅពេលដែលប្រទេសជប៉ុនបានរឹតបន្តឹងការគ្រប់គ្រងលើការនាំចេញសារធាតុគីមី ៣ ប្រភេទដែលមានសារៈសំខាន់ចំពោះផលិតផលសំខាន់ៗរបស់ក្រុមហ៊ុនបច្ចេកវិទ្យាកូរ៉េខាងត្បូងដូចជាក្រុមហ៊ុន Samsung ជាដើម។
ការរឹតបន្តឹងនេះបានធ្វើឡើងបន្ទាប់ពីមានសេចក្តីសម្រេចមួយចំនួនរបស់តុលាការកូរ៉េ-ខាងត្បូងដែលបញ្ជាឲ្យក្រុមហ៊ុនជប៉ុនត្រូវបង់សងសំណងសម្រាប់ពលកម្មដោយបង្ខំក្នុងអំឡុងសង្គ្រាមលោកលើកទី ២។
ប្រជាជនរបស់ប្រទេសកូរ៉េខាងត្បូងចាប់តាំងពីពេលនោះបានបង្កើនការធ្វើពហិការកាន់តែខ្លាំងឡើងដោយប្តេជ្ញាមិនទិញទំនិញរបស់ជប៉ុន ដែលរួមមានស្រាបៀរ ផលិតផលគ្រឿងសម្អាង និងរថយន្ត ក្នុងចំណោមទំនិញផ្សេងទៀត។
ទន្ទឹមនឹងនេះដែរ ជនជាតិកូរ៉េខាងត្បូងជាប់ចំណាត់ថ្នាក់ទី ២ បន្ទាប់ជនជាតិចិនដែលទៅទស្សនាប្រទេសជប៉ុនកាលពីឆ្នាំមុន ប៉ុន្តែពួកគេបានគេចចេញពីប្រទេសនេះកាន់តែច្រើនឡើងៗចាប់ពីដើមខែកក្កដាមក។
ប្រតិបត្តិករទេសចរណ៍បានប្រាប់ AFP ថាជាមធ្យមប្រជាជនកូរ៉េ ១២ ១៤០ នាក់ក្នុង ១ ថ្ងៃបានធ្វើដំណើរទៅប្រទេសជប៉ុនពីព្រលានយន្តហោះ In-cheon ក្នុងអំឡុងថ្ងៃបុណ្យប្រមូលផលរយៈពេល ៤ ថ្ងៃកាលពីសប្ដាហ៍មុនដែលធ្លាក់ចុះ ៣៩ ភាគរយធៀបនឹងថ្ងៃឈប់សម្រាកនេះកាលពីឆ្នាំមុន។
ក្រុមហ៊ុនអាកាសចរណ៍របស់ប្រទេសកូរ៉េខាងត្បូងមួយចំនួនដែលរួមទាំងក្រុមហ៊ុនអាកាសចរណ៍ Korean Air ផងដែរបានផ្អាកផ្លូវហោះហើរទៅប្រទេសជប៉ុន ដោយសារតែការធ្លាក់ចុះតម្រូវការ។
ក្រុមហ៊ុនផលិតរថយន្តរបស់ប្រទេសជប៉ុនក៏បានមើលឃើញការលក់ធ្លាក់ចុះផងដែរនៅកូរ៉េខាងត្បូងក្នុងរយៈពេលប៉ុន្មានខែថ្មីៗនេះ៕ LA