.jpg)
កង់ជាច្រើនដែលមានដាក់តាំងលក់នៅក្នុងទីផ្សារប្រទេសប៊ុលហ្គារី។ រូបថត AFP
ភ្នំពេញៈ ការនាំចេញផលិតកម្មកង់ពីកម្ពុជាទៅកាន់ទីផ្សារអន្តរជាតិក្នុងត្រីមាសទី ១ ឆ្នាំ ២០២០ សម្រេចបានក្នុងទឹកប្រាក់ប្រមាណ ១១៩ លានដុល្លារ កើនជាង ១០ លានដុល្លារបើធៀបនឹងរយៈពេលដូចគ្នាកាលពីឆ្នាំ ២០១៩។ នេះបើយោងតាមទិន្នន័យដែលដកស្រង់ចេញពីការផ្សាយរបស់ស្ថានីយទូរទស្សន៍ BTV។
ទិន្នន័យបានឲ្យដឹងថា ក្នុងត្រីមាសទី ១ ឆ្នាំ ២០២០ កម្ពុជាបាននាំចេញកង់ទៅកាន់ទីផ្សារអន្តរជាតិមានចំនួន ៤៩៨ ពាន់គ្រឿងដែលស្មើនឹងទឹកប្រាក់ប្រមាណ ១១៩ លានដុល្លារ កើនឡើងជាង ១០ លានដុល្លារបើធៀបទៅនឹងរយៈពេលដូចគ្នាឆ្នាំ ២០១៩។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ភ្នំពេញប៉ុស្តិ៍ កាលពីថ្ងៃព្រហស្បតិ៍ថា ការនាំចេញកង់ពីកម្ពុជាទៅក្រៅប្រទេសនឹងបន្តកើនឡើងទៀត ព្រោះបញ្ហាចរាចរណ៍ និងការធ្វើលំហាត់ប្រាណដើម្បីសុខភាពកំពុងជំរុញមនុស្សកាន់តែច្រើនឲ្យគិតពីការប្រើប្រាស់កង់។
លោកបន្តថា នេះជាទីផ្សារធំ និងមានសក្តានុពលកាន់តែខ្លាំងនៅក្នុងពេលអនាគត ខណៈបច្ចុប្បន្នមានប្រទេសលើពិភពលោកជាច្រើនបាននាំគ្នាគិតពីការអភិវឌ្ឍផ្លូវធ្វើដំណើរសម្រាប់កង់។
លោកថ្លែងថា៖ «ការនាំចេញកង់នឹងបន្តកើនឡើងទៀតក្នុងត្រីមាសទី ២ នេះ ព្រោះការកាត់បន្ថយការប្រើប្រាស់មធ្យោបាយសាធារណៈ (ដើម្បីទប់ស្កាត់ការឆ្លងជំងឺកូវីដ ១៩) និងការធ្វើលំហាត់ប្រាណដោយជិះកង់នឹងមិនមាននិន្នាការធ្លាក់ចុះនោះទេ»។
ជាមួយនឹងភាពវិជ្ជមានផ្នែកទីផ្សារនេះលោក លឹម ហេង បានអះអាងថានេះជាឱកាសសម្រាប់ការវិនិយោគលើការផលិតកង់នៅកម្ពុជាសម្រាប់នាំចេញផងដែរ។
អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជាលោក ហុង វណ្ណៈ បាននិយាយថា នាអំឡុងពេលដែលការនាំចេញផលិតផលនៅលើពិភពលោកភាគច្រើនត្រូវធ្លាក់ចុះដោយសារការរីករាលដាលជំងឺកូវីដ-១៩ ការនាំចេញកង់ពីកម្ពុជាបែរជាកើនឡើងក្នុងកម្រិតមួយដែលអាចទទួលយកបាន។
នេះជាសញ្ញាល្អដែលបញ្ជាក់ថា ការនាំចេញកង់នឹងបន្តភាពរឹងមាំរបស់ខ្លួនបន្ថែមទៀតនៅពេលខាងមុខ។ លោកបន្តថា ដោយសារកង់ត្រូវការគ្រឿងផ្គុំផ្សេងៗទៀតនោះ ដូច្នេះបើការនាំចេញកង់មានបរិមាណច្រើន តម្រូវការគ្រឿងផ្គុំក៏នឹងមានច្រើនដែរ។
លោកអះអាងថា៖ «ខណៈការបញ្ជាទិញទំនិញមួយចំនួនត្រូវអ្នកបញ្ជាទិញលុបចោលនាអំឡុងត្រីមាសទី ១ ដោយសារក្តីបារម្ភពីជំងឺកូវីដ ១៩ ការនាំចេញកង់ពីប្រទេសកម្ពុជានៅរក្សាបាននូវភាពវិជ្ជមាន។ កំណើននេះនឹងចូលរួមចំណែកយ៉ាងសំខាន់ក្នុងការជួយអភិវឌ្ឍសេដ្ឋកិច្ចជាតិ»។
បើតាមលោក វណ្ណៈ ដោយសារការប្រើប្រាស់មធ្យោបាយសាធារណៈមួយចំនួនត្រូវបានហាមឃាត់ដើម្បីបង្ការការឆ្លងរាលដាលជំងឺផ្លូវដង្ហើមកូវីដ-១៩ ដូច្នេះតម្រូវការកង់នឹងមិនធ្លាក់ចុះទេ។
យោងតាមគេហទំព័រ Bike-EU.com ដែលជាគេហទំព័រឯកទេសផ្នែកឧស្សាហកម្មកង់បានឲ្យដឹងថា កម្ពុជាបានក្លាយជាប្រទេសផ្គត់ផ្គង់កង់ឈានមុខគេទៅ EU ចាប់ផ្ដើមចាប់តាំងពីឆ្នាំ ២០១៧ ដោយបានវ៉ាដាច់កោះតៃវ៉ាន់ដែលបានកាន់តំណែងនេះក្នុងរយៈពេលជាង ២ ទសវត្សរ៍។
Bike-EU.com បានបង្ហាញថាកាលពីឆ្នាំ ២០១៧ កម្ពុជាបាននាំចេញកង់ជាង ១,៤២ លានគ្រឿង កើនឡើង ៩ ភាគរយ ធៀបនឹង ១,២៩ លានគ្រឿងកាលពីឆ្នាំ ២០១៦។
របាយការណ៍របស់ធនាគារពិភពលោកបង្ហាញថា កម្ពុជាបាននាំចេញកង់សរុប ១,៥២ លានគ្រឿង ទៅទីផ្សារអឺរ៉ុបកាលពីឆ្នាំ ២០១៨ ដែលមានតម្លៃជាទឹកប្រាក់ ៣៣១ លានដុល្លារ។ ទំហំទឹកប្រាក់នេះបានធ្វើឲ្យការនាំចេញកង់ទៅទីផ្សារអឺរ៉ុបក្លាយជាផលិតផលសំខាន់ទី ៣ របស់កម្ពុជាទៅទីផ្សារនោះ បន្ទាប់ពីសម្លៀកបំពាក់ និងស្បែកជើង៕
