ភ្នំពេញៈ លោក ថង សាវុន អភិបាលខេត្តរតនគិរីបានអះអាងថា កាលពីឆ្នាំ ២០១៩ ការនាំចេញកសិផលពីខេត្តនេះទៅកាន់ទីផ្សារអន្តរជាតិសម្រេចបានប្រមាណ ៨៧ ៦០៤ តោន ស្មើនឹងតម្លៃ ៣៧ លានដុល្លារ។
ការអះអាងនេះត្រូវបានធ្វើឡើងក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងាររបស់ខេត្តរតនគិរីនៅទីស្តីការគណៈរដ្ឋមន្ត្រីកាលពីថ្ងៃចន្ទ។
លោក ថង សាវុន បានឲ្យដឹងថា ការនាំចេញផលិតផលកសិផលនេះត្រូវបានធ្វើឡើងតាមរយៈក្រុមហ៊ុនវិនិយោគលើដីសម្បទានសេដ្ឋកិច្ចចំនួន ២៧ ក្រុមហ៊ុនដែលកំពុងប្រតិបត្តិការនៅក្នុងខេត្ត។ ក្រុមហ៊ុនទាំងនោះកំពុងវិនិយោគលើដំណាំ កៅស៊ូ ស្វាយចន្ទី ចេកអំបូងលឿង ស្វាយ ស្រកានាគ ខ្នុរ ដូង ទុរេន មៀន និងក្រូច ជាដើម។
លោកបន្តថា គិតមកទល់ពេលនេះក្រុមហ៊ុនទាំងនោះទទួលបានអាជ្ញាប័ណ្ណវិនិយោគដីសម្បទានសេដ្ឋកិច្ចពីរដ្ឋាភិបាលលើផ្ទៃដីសរុប ១២៤ ៦៦៩ ហិកតា ក្នុងនោះការអនុវត្តដាំដុះលើផ្ទៃដី ៥៥ ០៤៣ ហិកតា។
លោកបញ្ជាក់ថា លើសពីនេះខេត្តមានរោងចក្រកែច្នៃកៅស៊ូក្រែបចំនួន ៧ ទីតាំង និងសិប្បកម្មកៅស៊ូសន្លឹកចំនួន ៩ ទីតាំង ដែលមានសមត្ថភាពផលិតកែច្នៃជ័រកៅស៊ូក្រែបជាមធ្យម ៣០ ៤៧៩ តោនក្នុង ១ ឆ្នាំ។
សព្វថ្ងៃក្រុមហ៊ុនសហគ្រាសទាំងនោះបានដើរតួនាទីយ៉ាងសំខាន់ក្នុងការផ្តល់ឱកាសការងារដល់ប្រជាជនប្រមាណ ១១ ១៣៦ នាក់។ លោកនិយាយថា៖ «ជាក់ស្តែងបច្ចុប្បន្នមានតម្រូវការកម្លាំងពលកម្មប្រមាណជាង ២ ០០០ នាក់បន្ថែមទៀតសម្រាប់បម្រើឲ្យវិស័យកសិកម្ម និងកសិឧស្សាហកម្ម»។
យោងតាមក្រសួងកសិកម្ម រុក្ខាប្រមាញ់ និងនេសាទ ការនាំចេញកសិផលរបស់កម្ពុជាទាំងផ្លូវការ និងក្រៅផ្លូវការទៅកាន់ទីផ្សារអន្តរជាតិក្នុងរយៈពេល ៦ ខែដំបូង ឆ្នាំ ២០២០ នេះសម្រេចបានជាង ៤ លានតោន។
របាយការណ៍បង្ហាញថា កសិផលសំខាន់ៗដែលកម្ពុជានាំចេញផ្លូវការ រួមមាន អង្ករ ដំឡូងមី ម្រេច កៅស៊ូ ស្វាយ ស្វាយចន្ទី ចេក ពោត សណ្តែកសៀង បន្លែ និងថ្នាំជក់។ ចំណែកការនាំចេញក្រៅផ្លូវការគឺស្រូវ និងដំឡូងមីស្រស់ទៅប្រទេសវៀតណាម។
អ្នកស្រី ភ្លុក បុទុមបុប្ផា ម្ចាស់ចម្ការកៅស៊ូ ម្រេច ដូង ទុរេន ដែលដាំដុះលើផ្ទៃដីសរុបជាង ២០០ ហិកតា នៅខេត្តរតនគិរីបានប្រាប់ភ្នំពេញប៉ុស្តិ៍ថា ការប្រមូលផលកៅស៊ូរបស់អ្នកស្រីជាមធ្យម ១ ០០០ តោន ក្នុង ១ ឆ្នាំដែលអាចផ្តល់ចំណូលជាមធ្យម ៨ ០០០ ដុល្លារ បន្ទាប់ពីកាត់ថ្លៃចំណាយរួច ខណៈការប្រមូលផលម្រេចបាន ៦៥ តោន នៅរដូវប្រមូលឆ្នាំ ២០២០ នេះ (៧៥ តោនឆ្នាំ ២០១៩) ក្នុងនោះម្រេចសល់ក្នុងស្តុកជាង ២៥ តោន។
អ្នកស្រីបានបញ្ជាក់ថា៖ «សព្វថ្ងៃតម្លៃកៅស៊ូជាមធ្យម ១ ០២៣ ០០០ រៀល ក្នុង ១ តោន ដែលតម្លៃនេះទាបជាងឆ្នាំមុន។ រីឯម្រេចវិញមានតម្លៃ ៨ ០០០ រៀល ក្នុង ១ គីឡូក្រាម ដែលតម្លៃនេះគឺអត់ចំណេញទេ ព្រោះតម្លៃធ្លាក់រាល់ឆ្នាំ ជាក់ស្តែងខ្ញុំសល់ក្នុងស្តុកប្រមាណ ២៥ តោនពេលនេះ»។
របាយការណ៍ក្រសួងកសិកម្មបានឲ្យដឹងថា កាលពីឆ្នាំ ២០១៩ កម្ពុជាបាននាំចេញផលិតផលកសិកម្មមានតម្លៃជាង ៥,៤ ពាន់លានដុល្លារ ក្នុងនោះរួមមាន អង្ករ ម្សៅដំឡូងមី ដំឡូងមីស្រស់ គ្រាប់ស្វាយចន្ទី ពោត ស្វាយ និងបន្លែ ជាដើម៕