.jpg)
ជ័រកៅស៊ូ ត្រូវបានជារចេញពីដើម នៅក្នុងចំការមួយនៅខេត្តកំពង់ចាម។ ហេង ជីវ័ន
ភ្នំពេញៈ ការនាំចេញកៅស៊ូបានកើនឡើង ២១ ភាគរយនៅឆមាសទី ១ ឆ្នាំនេះធៀបនឹងរយៈពេលដូចគ្នាក្នុងអំឡុងឆ្នាំ ២០១៧ ខណៈកម្ពុជាបន្តបង្កើនសមត្ថភាពប្រមូលផល។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូនៃក្រសួងកសិកម្មបានថ្លែង កាលពីម្សិលមិញថា ក្រុមហ៊ុនផលិតក្នុងស្រុកបាននាំចេញកៅស៊ូ ៨៤ ៤១៩ តោនក្នុងអំឡុង ៦ ខែដំបូងនៃឆ្នាំ ២០១៨ ដែលកើនឡើង ១៤ ៣៧៦ តោនធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍របស់នាយកដ្ឋានកៅស៊ូនៃក្រសួងកសិកម្មផ្ទៃដីដាំដុះកៅស៊ូ សរុបមានចំនួន ៤៣៦ ២៩៩ ហិកតា ផ្ទៃដីចៀរជ័រមានចំនួន ១៧៣ ០១៧ ហិកតាដែលស្មើនឹង ៣៩ ភាគរយនៃការដាំដុះសរុប។
លោក ប៉ុល សុផា បន្តថាតម្លៃកៅស៊ូបានធ្លាក់ចុះក្នុងអំឡុង ៦ ខែដំបូងឆ្នាំនេះ ដោយតម្លៃនាំចេញជាមធ្យមនៃកៅស៊ូធម្មជាតិ បានធ្លាក់ចុះ ១៨,៩៨ ភាគរយធៀបនឹងរយៈពេលដូចគ្នាកាលពីឆ្នាំមុនមកនៅត្រឹម ១៤៣៤ ដុល្លារក្នុងមួយតោន។
លោកបានថ្លែងថា និន្នាការដាំដុះ និងការនាំចេញកំពុងរក្សាកំណើនដែលជាសញ្ញាល្អមួយ ប៉ុន្តែតម្លៃកៅស៊ូកំពុងប្រែប្រួល ដោយសារតែទីផ្សារពិភពលោក និងភាពចម្រូងចម្រាសរបស់បណ្ដាប្រទេសនានាដូចជាអាមេរិក ចិន និងកូរ៉េខាងជើង។
លោកមានប្រសាសន៍ថា៖ «បញ្ហាប្រឈមរបស់យើងចំពោះកៅស៊ូគឺមានតែការប្រែប្រួលតម្លៃប៉ុណ្ណោះ ប៉ុន្តែការនាំចេញរបស់យើងកំពុងរក្សាការកើនឡើង ហើយវានឹងកើនឡើងដល់ ២២០ ០០០ តោននៅចុងឆ្នាំនេះ»។
លោកបន្តថា៖ «ការដាំដុះកៅស៊ូនៅតែមានសក្ដានុពលល្អសម្រាប់ការជំរុញកំណើនសេដ្ឋកិច្ច»។
លោក ម៉ែន សុភ័ក្រ អគ្គលេខាធិការសមាគមអភិវឌ្ឍន៍កៅស៊ូកម្ពុជាបានថ្លែងថា បរិមាណការនាំចេញកៅស៊ូកម្ពុជាកំពុងបន្តកើនឡើង ដោយសារដើមកៅស៊ូដែលបានដាំដុះរយៈពេល ៣ ឆ្នាំកន្លងមកអាចប្រមូលផលបានដែលបង្កើនការផ្គត់ផ្គង់ ខណៈតម្រូវការអន្តរជាតិបន្តស្ទុះងើប។
លោកថ្លែងថា តម្លៃកៅស៊ូបានកើនខ្ពស់ជាងតម្លៃរួចដើមហើយសម្រាប់កសិករដាំដុះកៅស៊ូ ប៉ុន្តែវានៅតែមិនខ្ពស់គ្រប់គ្រាន់ក្នុងការបង្កើនប្រាក់ចំណេញសម្រាប់ការខាតបង់របស់ក្រុមហ៊ុនផលិតក្នុងស្រុកនោះទេ ដោយសារតែការវិនិយោគទ្រង់ទ្រាយធំ។
លោកបានមានប្រសាសន៍ថា៖ «បច្ចុប្បន្នតម្លៃកៅស៊ូ គឺពេញចិត្តសម្រាប់កសិករ ប៉ុន្តែវានៅតែមិនចំណេញសម្រាប់ពួកយើងដែលជាវិនិយោគិន»៕ LA
