ភ្នំពេញ: ការនាំចេញជ័រកៅស៊ូទៅកាន់ទីផ្សារអន្តរជាតិកើនតិចតួចបំផុត ខណៈតម្លៃកៅស៊ូក៏បានធ្លាក់ចុះបន្តិចបន្តួចក្នុងរយៈពេល ៩ ខែដើមឆ្នាំ ២០២០ ជាពេលដែលជំងឺកូវីដ ១៩ បានរាតត្បាតធ្វើឲ្យប៉ះពាល់ដល់ដំណើរការផលិតកម្មឧស្សាហកម្មនៅទូទាំងសកលលោក។
ទិន្នន័យពីក្រសួងកសិកម្ម រុក្ខាប្រមាញ់ និងនេសាទបានបង្ហាញថា ការនាំចេញកៅស៊ូពីប្រទេសកម្ពុជាសម្រេចបានចំនួន ១៧៩ ៦២១ តោនក្នុងរយៈពេល ៩ ខែដើមឆ្នាំ ២០២០ នេះកើនឡើង ៣,៧៨ ភាគរយ ធៀបរយៈពេលដូចគ្នាកាលពីឆ្នាំមុននេះ រីឯតម្លៃជ័រកៅស៊ូជាមធ្យមលើទីផ្សារអន្តរជាតិចំនួន ១ ២៨៨ ដុល្លារ ក្នុង ១ តោន ដោយធ្លាក់ចុះជាមធ្យមចំនួន ៥១ ដុល្លារ ធៀបនឹងរយៈពេលដូចគ្នាកាលពីឆ្នាំមុន។
ទោះបីយ៉ាងណាក្នុងខែកញ្ញាឆ្នាំនេះ តម្លៃជ័រកៅស៊ូលក់ចេញជាមធ្យមកើន ២៦ ដុល្លារ ក្នុង ១ តោន បើធៀបនឹងតម្លៃកាលពីខែសីហា ប៉ុន្តែតម្លៃនោះទាបជាង ៦៤ ដុល្លារ ក្នុង ១ តោនបើធៀបនឹងខែកញ្ញាឆ្នាំមុន។
លោក ហេង ស្រេង អ្នកចាត់ការទូទៅក្រុមហ៊ុនចម្ការកៅស៊ូបឹងកេតនៅខេត្តកំពង់ចាមប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា ក្រុមហ៊ុនលោកបាននាំចេញជ័រកៅស៊ូពីថយចុះប្រហែល ៣០ ភាគរយ ប៉ុន្តែតម្លៃកៅស៊ូងើបឡើងបន្តិចវិញក្នុងរយៈពេលចុងក្រោយនេះ។
លោកបន្តថា ដោយសារភាពមិនច្បាស់លាស់នៃទីផ្សារ និងតម្លៃបានបង្ខំឱ្យក្រុមហ៊ុនលោកកែប្រែដីចម្ការកៅស៊ូជាចម្ការចេកអំបូងលឿងវិញដែលកំពុងមានតម្រូវការទីផ្សារខ្ពស់ជាពិសេសទីផ្សារប្រទេសចិន។ រហូតមកដល់ពេលនេះក្រុមហ៊ុនបានកែប្រែដីជាចម្ការចេកកើនរហូតដល់ជាង ២ ០០០ ហិកតា។
លោកថ្លែងថា៖ «កត្តាតម្លៃកៅស៊ូបន្តធ្លាក់ថ្លៃជាបន្តបន្ទាប់ ខ្ញុំសម្រេចកាប់ដើមកៅស៊ូចោលអស់ជាច្រើនពាន់ហិកតា ដើម្បីដាំដំណាំចេកអំបូងលឿងវិញ ព្រោះចេកកំពុងមានតម្លៃខ្ពស់ និងទីផ្សារល្អជាង»។
អ្នកស្រី ភ្លុក បុទុមបុប្ផា ម្ចាស់ចម្ការកៅស៊ូ ម្រេច ដូង ទុរេន ដែលដាំដុះលើផ្ទៃដីសរុបជាង ២០០ ហិកតា នៅខេត្តរតនគិរីក៏បានត្អូញត្អែរពីការលំបាកក្នុងរបរកសិឧស្សាហកម្មមួយនេះដោយ ១ ឆ្នាំសល់ប្រហែល ៨ ០០០ ដុល្លារប៉ុណ្ណោះបន្ទាប់ពីការទូទាត់ការចំណាយរួច។
អ្នកស្រីថ្លែងថា៖ «ដោយបញ្ហាអាកាសធាតុបង្កឱ្យមានព្យុះភ្លៀងញឹកញាប់ធ្វើឱ្យខ្ញុំខកខានការប្រមូលផលកៅស៊ូ»។
ទិន្នន័យក្រសួងកសិកម្មបន្ថែមថាគិតមកដល់ពេលនេះផ្ទៃដីដាំដុះកៅស៊ូសរុបចំនួន ៤០៣ ១៩៥ ហិកតា ក្នុងនោះផ្ទៃដីចៀរជ័រចំនួន ២៩០ ៦០៩ ហិកតា ស្មើនឹង ៧២ ភាគរយ។
យោងតាមរបាយការណ៍របស់ Research and Markets តម្លៃកៅស៊ូក្រែបនឹងបន្តធ្លាក់ថ្លៃចាប់ពីឆ្នាំនេះបន្តរហូតដល់ឆ្នាំ ២០២១។ ប្រទេសចិន មានតម្រូវការកៅស៊ូច្រើនជាងគេបំផុតនៅលើសកលលោកដែលមានរហូតដល់ ៤១ ភាគរយ នៃបរិមាណផលិតផលកៅស៊ូសរុបលើពិភពលោក៕ LA